Read Ebaibuli 1961 Yosua 5 Bible Online

Yosua 5 - Ebaibuli 1961 bible

Yosua 5

¹ Kosodi kanen kepuput ikabakan kere luka Imorain, luajaas okekwa loka Yorodan ari nakoto, ka ikabakan kere luka Ikanaanin luajaas ariri naka aŋolol, kwape etoonio EJAKAIT akipi nuka Yorodan kakonyen nuka idwe luka Isirael aitodol nakiitubunor, koburut itauonokec, kipirisiar etau loka ŋinituŋanan, kanuka idwe luka Isirael.

² Kotema EJAKAIT Yosua kapak kaŋin atiar, “Kiswamau ikileŋa luka amor, kirucak bobo aikep idwe luka Isirael.”

³Kiswamau Yosua ikileŋa luka amor, kokep idwe luka Isirael, koukot loka amunyin.

⁴ Akepi Yosua ituŋa kanuka akirot kana: ituŋa kere lualomunete koMisiri, luaraas ikiliok, kes ituŋa kere lukajiok, apotu kotwakikis amodiŋ orot, kedaut alomun koMisiri.

⁵Naarai ituŋa kere lualomunete araas luakepitai: konye ituŋa kere luaurio kamodiŋ korot epote kesi koMisiri, mam akepitai.

⁶ Naarai apotu idwe luka Isirael kolototo kamodiŋ ikar akaisaoŋon, aitodol naamudiarere ateker kere, kes ituŋa lukajiok lualomunete koMisiri, naarai mam apotu kopuput eporoto loka EJAKAIT: luabu EJAKAIT kiyapoik ebe mam ecamakini kes aanyun akwap naabu kiyapoik lukapapaakec ebe kiinakin oni akwap naeleleete akile ka esik.

⁷ Idwekec, luetopolouni ŋesi aiboisikec, ŋul akepi Yosua: naarai mam akepitai, naarai mam apotu kokepa kes korot.

⁸ Kosodi kanen kedau aikep ateker kere, kiboioto kaiboisiokec koidukurun, aitodol naaŋaleunioto.

⁹ Kotema EJAKAIT Yosua atiar, “Ekokorio lolo eoŋ amorosit naka Misiri kamakus.” Ŋes do amaikinere aibois ŋin Giligal,[2] kiton lolo.

¹⁰ Kidukuroto idwe luka Isirael Giligal; kidarata aleleŋio kapaaran nakitomonet kaoŋon naka elap, eboŋ, kapuutona nuka Yeriko.

¹¹Konyamata akima nuka akwap tupuruc kedaun aleleŋio, imugatin lumam itubuunitoi ka imumwa luikawooritai, kapaaran kaŋipe kaŋin.

¹² Kitanaŋai emanu kapaaran naatupakini ŋin naanyamiata kesi akima nuka akwap; mam bobo idwe luka Isirael apotu koanyut emanu; konye anyamete araito nuka alup nuka Kanaan okaru ŋol.

¹³ Kosodi kanen ejai Yosua ariri naka Yeriko, abu kiteluo akekonye kite, ido koany, abwoi etuŋanan kitei ŋes kitetenite ekekileŋ: kolot Yosua mamake, kotema ŋes atiar, “Irai ijo lokosi, arai loka lukasurupokosi?”

¹⁴ Kotema atiar, “Mam; konye abunit eoŋ kwape ekapolon loka ajore naka EJAKAIT.” Kibiror Yosua ebuburia, koma, kotema ŋes atiar, “Anyoika nuebala ejakaitika ekekejaanakinan?”

¹⁵ Kotema ekapolon loka ajore naka EJAKAIT Yosua atiar, “Kolaca akonimuk kakejenekon; naarai aibois naibwoia ijo erai nakalaunan.” Kiswama Yosua kwaŋin.