Read Ebaibuli 1961 Yosua 6 Bible Online

Yosua 6 - Ebaibuli 1961 bible

Yosua 6

¹Kogoloro noi Yeriko kanuka idwe luka Isirael: amamei yenelomari karaida yenelomuni.

² Kotema EJAKAIT Yosua atiar, “Koany, ainak Yeriko akanikon, ka ekabakake, ka ituŋa lukirigin luetitiŋ.

³Irimorete yesi ere, ituŋa kere lukajiok, irimorete ere irwan atipet. Iswamai ijo kwaŋin apaarasia akanykape.

⁴ Itiŋete isasedotin ikanykaarei arupepen akanykaarei nuka amumwara nuka imerekekin koiŋaren kasaduku: ido kapaaran nakikanyetekaarei irimorete ere irwan akanykaarei, kokusete isasedotin arupepen.

⁵Ejaun do ebe, naekutakiniata noi amumwarat naka emerekek, naipupunioto yesi aruo naka arupepe, ibwoŋakinete ituŋa kere eibwoŋ loepol: etiyakin arwatat naka ere, edokarete ituŋa ŋinituŋanan ederori kiŋarenike.”

⁶Abu Yosua okoku loka Nun konyarau isasedotin, kotema kes atiar, “Kodakata asaduku naka aitutuket, kitiŋata isasedotin ikanykaarei arupepen akanykaarei nuka amumwara nuka imerekekin koiŋaren kasaduku naka EJAKAIT.”

⁷Kotemasi kesi ituŋa atiar, “Kotuboros, kirimosi ere, koloto ituŋa luekapakina kiŋaren kasaduku naka EJAKAIT.”

⁸ Kojaun kwaŋin ebe, naalimokinia Yosua ituŋa, koloto isasedotin ikanykaarei luetiŋito arupepen akanykaarei nuka amumwara nuka imerekekin kakonyen nuka EJAKAIT, kokutata arupepen: kotupak kes asaduku naka aitutuket naka EJAKAIT.

⁹ Koloto ituŋa luakapakina kiŋaren kisasedotin luakusete arupepen, kotupata lukokau asaduku, kokusete isasedotin arupepen elosete.

¹⁰Kicorak Yosua ituŋa ebe, “Mam ibwoŋakinete karaida ikusiporotoi apupunio, karaida alimun adiokirot kaitukekus, aitodol apaaran nakecorakinia yes aibwoŋakin; ŋes konyet ibwoŋakiniata.”

¹¹Kwaŋin kisirimo asaduku naka EJAKAIT ere, airimor ŋes irwan atipet: koboŋosi oidukurun, koperoto oidukurun.

¹² Kodilok Yosua anyoun tupuruc, kodakata isasedotin asaduku naka EJAKAIT.

¹³ Kolosenenete isasedotin ikanykaarei luetiŋito arupepen akanykaarei nuka amumwara nuka imerekekin koiŋaren kasaduku naka EJAKAIT, kokusete arupepen: kiŋarenikinitos ituŋa luakapakina lujiis kes; kotupata lukokau asaduku naka EJAKAIT, kokusete isasedotin arupepen elosete.

¹⁴Kapaaran nakiareit da kirimosi ere irwan atipet, koboŋosi oidukurun: kiswamata kwaŋin apaarasia akanykape.

¹⁵Kosodi kanen kapaaran nakikanyetekaarei, kodilokis anyoun ecila kide, kirimosi ere kwape ejaar epone ŋol irwan akanykaarei: konye kapaaran kaŋin apotu kirimosi ere irwan akanykaarei.

¹⁶ Kosodi kanen irwan nakikanyetekaarei nakekutakiniata isasedotin arupepen, kotema Yosua ituŋa atiar, “Kibwoŋata; naarai kiinak EJAKAIT yes ere.

¹⁷ Itateleori EJAKAIT ere, ŋes ka luejaas toma kere; dimarai Rakab naadote ŋes ejari, ŋes ka ŋul kere luejaas kaŋes togo, naarai abu ŋesi kibwa ikiyakia lukiijukarit.

¹⁸ Ka yes da, kocoito noi kosaca ibore yenitateleoritai kinyeis naidauniata aitaleor, ayaŋaar ibore yenitateleoritai; kosodete kwaŋin ayaun aiken oidukurun luka Isirael ka aitican kes.

¹⁹Konye epuesa kere, ka esabu, ka amoti nuka aisinit ka asuat eraas nukalaunak kama ejai EJAKAIT: eyaŋaunio aiŋadis naka EJAKAIT,”

²⁰ Kosodete ituŋa eibwoŋ, kokutata isasedotin arupepen: kosodi kanen kepuput ituŋa aruo naka arupepe, kibwoŋata ituŋa eibwoŋ loepol, kotiyakin arwatat, kodokasi ituŋa ore, ŋinituŋanan kodero kiŋarenike, kirumata ere.

²¹ Komudiasi cut kere luajaas toma ore, ikiliok ka aŋor, ludidik ka lumojoŋ, imoŋin ka amerekekin, ka asigirian, kakwanis naka ekileŋ.

²² Kotema Yosua ituŋa luarei luarosete akwap ebe, “Koloto togo loka naadote, kitolomut aberu, ka luejaatar kere, kwape kiyapoikinioto ŋes.”

²³ Kolomasi ikatumunak lukarotak, kitolomut Rakab ka papake, ka totoke, ka iinacanake, ka luajaatar kere; kitolomut da lukokekike kere; kibwaikis kes kiŋa kiidukurun luka Isirael.

²⁴Kicweikis ere, ka luejaas toma kere: dimarai epuesa ka esabu, ka amoti nuka aisinit ka asuat, apotu kesi kibwaikis ŋul aiŋadis naka etogo loka EJAKAIT.

²⁵ Konye Rakab naadote, ka ekal loka papake, ka luajaatar kere abu Yosua kitajar; kiboikin mama ejai Isirael, kiton lolo; naarai abu ŋesi kibwa ikiyakia luejukarit Yosua airot Yeriko.

²⁶ Kicorak Yosua kes kaiyaposit kapak kaŋin ebe, “Kikenoi kakonyen nuka EJAKAIT etuŋanan loenyouni aiduk ere lo Yeriko, Etwani ekiyaike naepesikinia ŋesi apetetake, Etwani da eŋooritike naesipokinia ŋesi ikekiake.”

²⁷ Kojaenena EJAKAIT ka Yosua; kojenun da ŋesi kakwap kere.