Read Ebaibuli 1961 Yosua 8 Bible Online

Yosua 8 - Ebaibuli 1961 bible

Yosua 8

¹ Kotema EJAKAIT Yosua atiar, “Sirikikurianar karaida aiyaloŋoŋ: koyaŋa ituŋa kere lukajiok nepepe kajo, konyou, kolot Ai: koany, ainak ekabaka loka Ai ka ituŋake, ka ereke ka akwapuke akanikon:

² Iswamakini Ai ka ekabakake kwape iswamakinia Yeriko ka ekabakake: konye iyaŋaarete luŋatanake, ka ibareneke kanukus: kibwaik icetuŋa agule naka ere aperun kes.”

³Konyou Yosua, ka ituŋa kere lukajiok alosit Ai: koseu Yosua ituŋa ilukumin akaisauni, ituŋa lukirigin luetitiŋ, kijuka kes kuare.

⁴ Kicorak kes ebe, “Koany, ilosete yesi aperun ere, kagule naka ere: sirikilwakiata kore, konye kitemokino kere:

⁵ Ekunyakini eoŋ ere ka ituŋa kere luejaas keoŋ: kosodi kanen, naelomuniata kesi asurokin, kwape koloje, kikeri isio kakonyenekec;

⁶Kitupete kesi sio, aitodol nekiŋalaaria isio kes kiŋa naka ere; naarai etemarete ebe, ‘Ekerete kakonyenewok, kwape koloje’; kwaŋin kikeri kakonyenekec:

⁷Inyounete yesi kaneiperunioto irumete ere: naarai kijaikini EJAKAIT Ekusideke ŋes akanikus.

⁸ Kosodi do, kidaut airum ere, kicweikis ere kakim; kwape ejaar akirot naka EJAKAIT, iswamaete kwaŋin: koany, kecorak yes.”

⁹Kijuka Yosua kes: koloto aperun, kiboioto kokidiŋ Bet-el ka Ai, ari nakoto naka Ai: konye kopero Yosua akuare ŋin kituŋa.

¹⁰ Kodilok Yosua anyoun tupuruc, kotukok ituŋa, kolot Ai, ŋes ka imakio luka Isirael kakonyen nuka ituŋa.

¹¹Kolototo ituŋa kere, kes ituŋa lukajiok luajaas kaŋes, kikunyakis, kodoloto kiŋaren naka ere, kidukuroto ari naka agolitomei naka Ai: kojai da aditot kidiŋike ka Ai.

¹² Koyaŋa ituŋa kwape ilukumin ikany, kibwaik kes kidiŋ Bet-el ka Ai aperun kari nakoto naka ere.

¹³Kitemonokisi kwaŋin ituŋa, ajore kere naajai ari naka agolitomei ka lueperunete luajaas ari nakoto naka ere: kolot Yosua akuare ŋin kidiŋ aditot.

¹⁴ Kosodi kanen keanyu ekabaka loka Ai, kisunyakis, konyout tupuruc, kolomasi ituŋa luka ere aitiji Isirael, ŋes ka ituŋake kere, kapak naaseunitai, koiŋaren naka Araba; konye mam ŋes ajeni ebe aperunitoi ŋes kagule naka ere.

¹⁵ Kijoseikis Yosua ka Isirael kere bala ipikoritai kes, kokerata orot loebei modiŋ.

¹⁶ Konyaraunai ituŋa kere luajaas ore arukio kes: korukioto Yosua, kiŋalaarai do kes kore.

¹⁷Komameun etuŋanan loasalit Ai arai Bet-el, lomam abu kotupak Isirael: kinyeis ere eŋaara, korukioto Isirael.

¹⁸ Kotema EJAKAIT Yosua atiar, “Kikeu akwarakon naejai akanikon kodod Ai; naarai ainakini ŋes akanikon.” Kikeu Yosua akwara naajai akanike adodia ere.

¹⁹Konyout luaperunito atipet kaiboisikec, kokerata napikeuni ŋesi akekan, kolomasi ore, kirumata ŋes; kisunyakisi aicweikin ere.

²⁰Keŋoliasi ituŋa luka Ai kaukec, apotu koanyut, ido koany, apurie apuru naka ere kiton akuj, komam kes epedorete akerit lailo ka laije; koboŋut ituŋa luakerete amodiŋ asurokin ikarukitok.

²¹Keanyu Yosua ka Isirael kere ebe erumata luaperunito ere, ebe da epurie apuru naka ere kuju, koboŋut bobo, koarata ituŋa luka Ai.

²² Kopotu luce kore asurokin kes; koluk do Isirael kes, ice owai lo ice da owai je: kodanyata kes, komam ideunete idio kakesi karaida aitukuu.

²³Kikamut ekabaka loka Ai ejari, koyaŋaut ŋes neajai Yosua.

²⁴Kosodi kanen kedau Isirael aiar kere lueboienenete koAi koitela, kamodiŋ da naarukorito kes, abu akwanis naka ekileŋ koar kes kere, aitodol neamudiarere, koboŋo Isirael kere Ai, kodany kakwanis naka ekileŋ.

²⁵Kere luapotu kotwaka apaaran ŋin, ikiliok ka aŋor, emwaasi ilukumin itomon ka luarei, kes ituŋa kere luka Ai.

²⁶Naarai mam Yosua abu kinyakak akekan naekeunia akekwara, aitodol naamudiaria cut kere lueboienenete koAi.

²⁷ Konye ibaren ka luŋatuna kore kaŋol apotu luka Isirael koyaŋaasi araun iŋatanakec, kwape ajaar akirot naka EJAKAIT naecorakinit Yosua.

²⁸ Kwaŋin kicwe Yosua Ai, kitaraun ŋes aapoŋor ikar kere, kosilior kiton lolo.

²⁹ Ido kikajak ŋesi ekabaka loka Ai okitoi kiton eboŋ; keloma akoloŋ kicorak Yosua, kosodete kolemut akuanake kokitoi, kocakakis orute loka ere, kotukokis nen atukit naepol naka amor, kiton lolo.

³⁰ Kosodi Yosua adukokin EJAKAIT Edeke loka Isirael etem, moru Ebal.

³¹ Kwape kicorakinitor Musa ekejaanakinan loka EJAKAIT idwe luka Isirael, kwape iwadikatere oitabo loka Musa loka ikisila, etem loka amor numam ikee, numam ikeit etuŋanan kadiosuat: koinakis kanen ainakineta nuicweio mama ejai EJAKAIT, koinakis da asuban nuka ainapakin.

³² Kiwadikak amor aikopunet naka ikisila luka Musa, naabu kiwadik, kakonyen nuka idwe luka Isirael.

³³ Kobwo Isirael kere, ka imakiokec, ka ijakakec, ka ikatubokokec, kowai lo loka asaduku, kowai je da, kakonyen nuka isasedotin Ilebin, luadakito asaduku naka aitutuket naka EJAKAIT, imoit ka iuriat da; atutubetekec kiŋaren kemoru Gerisim, atutubetekec da kiŋaren kemoru Ebal; kwape ecorakinitor Musa ekejaanakinan loka EJAKAIT, ebe isiaunete ber ailipakin idwe luka Isirael arereŋ.

³⁴ Akaulo kaŋun abu kosiom akiro kere nuka ikisila, arereŋ ka aiken, kwape ejaatar kere nuiwadikatai oitabo loka ikisila.

³⁵ Amamei adiokirot kotoma akiro kere nuecorakinit Musa, namam Yosua abu kosiom kakonyen nuka ekodet kere loka Isirael, ka aŋor, ka ludidik, ka imo luajaas nepepe kakes.