Read Ebaibuli 1961 2 Isesalonikan 2 Bible Online

2 Isesalonikan 2 - Ebaibuli 1961 bible

2 Isesalonikan 2

¹ Konye iinacan, kiŋaiŋait yes, kakiro nuka abunore naka Ejakaitiwok Yesu Kristo, ka atukonokiniwok nepepe kaŋes,

²kinyeis aisunyit airiaŋiriaŋa kotoma aomisiokus, karaida aiyaloŋoŋ, karaida komoyo, karaida kakirot, karaida kobalua loebuni kamakosi, ebe adolu apaaran naka Ejakait.

³ Kinyek idiotuŋanan aitapaar yes kopone kere; naarai mam apaaran ŋin ebuni, dimarai isiauni atiakatiakaun ajaun, epukorio da etuŋanan ŋol lokepali, okoku loka amudiar,

⁴ loirebirebi, ido loitopoloor bon aitelekarit ibore kere yenenyaritai edeke, arai yenemaio; kosodi iboikin oyekalu loka Edeke, kitodiara ebe ŋes Edeke.

⁵Mam kereka iitunito ebe nakijaar kayes abu kalimok yes ŋun?

⁶Ido ijenete yenitikokinit kwana, tetere epukorio ŋes kapakike.

⁷ Naarai ageu aiyeiyea naka epali aswam; konye loitikokinit kwana iswamai aitodol naelemarere ŋol awai.

⁸ Kosodi konyet epukorio lokepali, eari Ejakait Yesu ŋes keiyeŋane loka aitukuke, ka amudiar da kotoma atakanun naka abunoreke.

⁹ Abunore naka ŋol lokepali naiswamai Satan ejaun kapedor kere, kaanyuneta ka nukaumokin da nukeŋalak,

¹⁰ ka aitapaar kere namam adolit mama ejaas ŋul lueoliorito, naarai mam apotu kocamut amin abeit, kosodete aitajario.

¹¹ Kanuka ŋun ijukakini kes Edeke aswam naka apaar, tetere iyunete nuka aiŋal,

¹²tetere etubokinio kere lumam iyuunito abeit, konye luisiyalamikinito amamus adolit.

¹³ Konye kiburao sio aimalaenen Edeke apaarasia kere kanukus, iinacan luemina Ejakait, naarai abu Edeke koseik yes ameun kageunet aitajario, kanuka aitalaunio naka Emoyo, ka aiyuun da abeit.

¹⁴ Abu konyarak yes ŋin kanuka Akosikiro Nukajokak, kanuka adumun aibuses naka Ejakaitiwok Yesu Kristo.

¹⁵Aso do iinacan, kobwaata kicasito, kikamut iponesio lukisisianakinitai, arai kotoma akirot, arai kotoma obaluakosi.

¹⁶ Konye Ejakaitiwok Yesu Kristo elopet, ka Edeke Papawok, lokimina oni, loabu koinak da aitalakar naka ikar kere, ka amun naejok kotoma asianut,

¹⁷kitalaka ikusitauon, kiticat da kotoma kaŋiniswam ka ŋinikirot da naejok.