Read Ebaibuli 1961 1 Timoteo 4 Bible Online

1 Timoteo 4 - Ebaibuli 1961 bible

1 Timoteo 4

¹ Konye inera Emoyo kaitebeikin ebe kotoma apakio nuepote etiakatiakaunos ice ainyein aiyuun, epupete imoyon luepaarete, ka aisisianakin naka ajokin,

²kanuka aisoswanut naka ikeŋalak, luicweio aomisiokec kemacar loesarani,

³ imikete aimany, italeete lunyaman, luabu Edeke kosub tetere ijaunete luiyuunito ka luejenete noi abeit kaimal.

⁴ Naarai ejok ŋinibore kere yenikesubi Edeke, emamei da ibore yeneŋerio, arai ecamunio kaimal;

⁵naarai italaunitai kanuka akirot naka Edeke ka ailip da.

⁶Arai isiituni iinacan akiro ŋun iraun ekejaanakinan loejok loka Kristo Yesu, kitanete jo akiro nuka aiyuun, ka aisisianakin naejok naibu kotup.

⁷ Kinac awaragasia numam eraas nuka edini, nukabaŋaanut. Konye kitwasama bon kotoma ayoŋit Edeke;

⁸ naarai aitwasam akuan ejai ameda naedit, konye ayoŋit Edeke ejai ameda kakiro kere, naarai ejai aisumunet naka aijar naka tinenikwana, ka aijar da naebuni.

⁹ Namunot akirot na, ido naibusakinit ituŋa kere acamun.

¹⁰ Naarai kitaaritoi kiwuta da kanuka ŋun, naarai kimunokina Edeke lokajaran, loerai Eketajaran loka ituŋa kere, aitelekarit loka luiyuunito.

¹¹Kicorak akiro ŋun, kisisianak da kes.

¹² Kinyek idiotuŋanan aimen atumunikon, konye korau ijo aanyunet mama ejaas luiyuunito kotoma oiner, ka ejautene, kotoma amin, kotoma aiyuun, ka asegara da.

¹³Aitodol neabunio, kodunyak asoman, ka aicor, ka aisisianakin da.

¹⁴ Sirikijal ainakinet naejai kotomakon, nakiinakinitai kanuka adwaranut ka aidokokinio akanin nuka imakio.

¹⁵Koomitenenei ŋun, kojaenena kotomakec, tetere etakani akonijokiar otuŋa kere.

¹⁶ Kocoite bon ka aisisianakinikon da; kosalak toma ŋun, naarai arai kiswama kwaŋin itajara bon, ka ŋul da lukipupete jo.