Read Ebaibuli 1961 1 Timoteo 6 Bible Online

1 Timoteo 6 - Ebaibuli 1961 bible

1 Timoteo 6

¹ Kere lueraas ibulesin kwap kajookot, koomitos ijakakec araut luibusakinito ayoŋio kere, kinyek ekiror loka Edeke ka aisisianakin da ainyanakinio.

² Ido luejaas ijaka luiyuunito, sirikemwaŋata kes, naarai eraas iinacan, konye gwai kiyatakis aijaanakin kes, naarai luedumunete ajokis naka aswamukec eraas luiyuunito, luminan da. Kisisianakin ŋun, kicor da.

³ Arai isisianakini ituŋanan nuegelara komam enupit akiro nuejarete nuka Ejakaitiwok Yesu Kristo, ka aisisianakin da naetupit ayoŋit Edeke,

⁴edakunun, komam ejeni akirot, konye edek ipegeta, ka ijiisio luka akiro, mama eponiata ekokote, aŋolopa, ainyanakin, aomoom nueroko,

⁵ iceleta luka ituŋa luamunaar acoakec, lualemar abeit, lueomito ebe ayoŋit Edeke ŋes adumun ameda.

⁶ Konye ayoŋit Edeke nepepe kalakara ŋes ameda naepol.

⁷ Naarai mam kiyaunit ibore toma akwap, ido mam kipedori ayaŋaar ibore;

⁸ konye kijaa ka inyamat ka inapen, kalakaros kaŋul.

⁹ Konye luekotos abar ebirokinos acodunio ka atacit, ka eimiel loepol loemamei acoa ka loimadiŋi da, aitulum ituŋa toma aolior ka amudiar.

¹⁰ Naarai amin apesan ŋes aliasit naka aronisio kere; ejaas ituŋa luiŋaŋatos ŋun, kesodete kitapaaros anyoun kotoma aiyuun, kicumakinos cut kican luipu.

¹¹ Konye jo, wu etuŋanan loka Edeke, koker ŋun, kotupenenei adolit, ayoŋit Edeke, aiyuun, amin, atitiŋikin, ka aiyapepera da.

¹² Koji ejie lokajokan loka aiyuun; kitiŋ aijar naka ikar kere, nakinyarakinitai, nailimorit alimoret naejok kakonyen nuka ikajenak luipu.

¹³ Kecori jo kakonyen nuka Edeke loeinakini kere aijar, ka Kristo Yesu loetejenuni alimoret naejok mama ejai Pontio Pilato,

¹⁴kidarenenei aicorakinet komamei akemer, komamei da aitoronet, kiton atakanun naka Ejakaitiwok Yesu Kristo;

¹⁵ naitodikini kapakioke Elopet apedor ediopet bon loituritoi, Ekabaka loka ikabakan, Ejakait da loka ijaka,

¹⁶ lobon ejai amamus atwanare, loiboie toma aica namam edolokinio, lomam idiotuŋanan eanyunit, emamei da yenepedori aanyun. Kojai aibuses ka apedor naka ikar kere mamakeŋ, Amen.

¹⁷ Kicorenenei lukabarak luka ikar kalu kinyeis aitopoloor, karaida amunokin abar namam erai naduc, konye komunokinos Edeke, lokiinakini oni iboro kere kabarara tetere kisiyalamanakin kaŋun,

¹⁸Kiswamata nuejok, kobarata kotoma aswamisio nuejok, koraas ikakorak, ikamorak da,

¹⁹ kidiasete bonik apetetait naejok kanuka apaarasia nuepote, tetere itiŋete aijar naerai aijar obe.

²⁰ Wu jo Timoteo, kidar nakititinitai. Kinacite akiro nutai numam eraas nuka edini, ka airebokin akiro nuenyaritai aijen kotoma aiŋal,

²¹ ejaas icetuŋa lualimosi ŋun, kosodete apaar kotoma aiyuun. Kojai asianut kayes.