Read Ebaibuli 1961 2 Timoteo 4 Bible Online

2 Timoteo 4 - Ebaibuli 1961 bible

2 Timoteo 4

¹ Kecorak jo jokan kakonyen nuka Edeke, kakonyen da nuka Kristo Yesu loebuni airabakin ikajarak ka ikatwak da, kanuka atakanunike ka akejakanut;

² kolimonok akirot, kokapakina kapak naejok, ka apak da namam ejok, kiretak, kitoron, kicor, katitiŋikin kere ka aisisianakin.

³ Naarai ebuni apak naegirioto ituŋa aisisianakin naka aijar, ejaas kaki nuipiete, etukonokinete bonik ikesisianakinak kwape ejaar aiŋobelekec bonik,

⁴ eekarete kesi ainyein aiirar abeit, epaarete mama ejaas awaragasia nutai.

⁵ Konye jo, kitikokina kakiro kere, kotitiŋikite nueroko, kiswama aswam naka ekalimonokinan loka Akiro Nukajokak, kitodolik akoniijaanakin.

⁶ Naarai kwana kabukokin eoŋ asubanit; adol apak naka akalosit.

⁷ Aji ejie lokajokan, adau abolobol, aricit aiyuun.

⁸ Amear kwana keŋadakinitai aboko naka adolit, nakainakini Ejakait, ekatubon loedolit, kapaaran kaŋin, ido mere eoŋ bon, konye kere da luaminasi atakanunike.

⁹ Kokukunyuun abunore mamakaŋ katipet.

¹⁰ Naarai kajalaki Dema, emina ikar luka tinenikwana, alot da Sesalonika; alot Keresike Galatia, ka Tito da Dalamatia.

¹¹ Luka bon ejai keoŋ. Kodum Marako koyau; naarai ibus ŋes kamakaŋ kanuka aijaanakin.

¹² Abu kejuka Tukiko Epeso.

¹³ Naibunio ijo, koyaunia elou loabu kenyek kaneejai Karapo ko Teroa, iitabon da, aitelekarit lukimukulen.

¹⁴ Abu Alegesanda ekatatan aikomon keswamak nueroko nuipu; etacakini Ejakait ŋes kwape ejaatar akeswamisio,

¹⁵Kidara ijo da kamakeŋ, naarai abu kirebok noi akirowok.

¹⁶ Kaiyarika nasodit amamei yenikowaika, konye kajalakis kere. Kinyeis ŋun aimarakinio kes!

¹⁷ Konye abu Ejakait kobwo kodiekaŋ, ketogogoŋ da, tetere etodolikini akiro nualimonokini, kopupete da Imo kere, kayuunio da kotoma aituk naka eŋatuny.

¹⁸Kayuuni Ejakait eoŋ kotoma kaŋiniswam kere naerono, ketajari da kiton akejakanut nakokuju. Kojai aibuses mamakeŋ ikar ka ikar. Amen.

¹⁹ Kiyoga Pirisika ka Akuila, ka lukokal da loka Onesiporo.

²⁰ Abu Erasito kosalak Korinto; konye abu kenyek Toropimo Mileto edeka,

²¹Kokukunyuun abunore eriŋa apaarasia nuka aaterot edoluno. Kiyogai Eubulo jo, Pudes da, ka Lino, ka Kulaudia, ka iinacan kere kiyogaete jo.

²²Kojai Ejakait kemoyokon, Asianut kojai kayes.