Read Ebaibuli 1961 Tito 3 Bible Online

Tito 3 - Ebaibuli 1961 bible

Tito 3

¹ Kisiitu kes anonokikin ikayaitok ka lukapolou da, korimasi, kitemokino kaŋiniswam kere naejok,

² kinyeis amoromor idiotuŋanan, kinyeis da aŋolopamit, luiyapaara, kitodikis ituŋa kere aiyapepera kere.

³ Naarai kirai kolo oni da lukibaŋaaka, lukiulaka, lukiŋala, ibulesin luka aiŋobel ka nuisiyalamikinete nukiponesio luipu, ketorito kotoma ameŋeranut ka ekokote, lukilaitai, lukilait luce;

⁴ konye naketakanunia asianut ka amin naka Eketajaraniwok Edeke,

⁵ abu kitajar oni, mere kanuka aswamisio nukiswamat kadolit, dimarai kwape ejaar akeitim, kanuka ailotario naka aurio nakiareit ka aisiteteunio naka Emoyo Lokalaunan,

⁶ nakibukok akwamakin oni kanuka Yesu Kristo Eketajaraniwok,

⁷ tetere kitojokio araut lukidolit kanuka akesianut, karaut da ikerumak kwape ejaar amun naka aijar naka ikar kere.

⁸Namunot akirot ŋin. Akoto jo aitogogoŋ akiro ŋun, tetere luapotu kiyuut Edeke ibwaikinito itauonokec aigaŋ aswamisio nuejok; eraas ŋun nuejok ido nueinunete ituŋa ajokis.

⁹ Konye kinac ipegeta lukabaŋaanut, ka iitabon luka aur ka aŋolopa ka ijiisio luka ikisila, naarai eraas lumam ajokis ka lutai da.

¹⁰ Koŋer ituŋanan yenekot agitara, kidau aikwenyar irwan atipet ka nakiareit,

¹¹ ijeni ebe yenikoni nen erii, adiak da, itetelekara bon.

¹² Nakejukakinia jo Aretemo arai Tukiko, kokukunyuun abunore mamakaŋ Nikopoli, naarai alosikinit aiboi nen adaun apaarasia nuka aaterot.

¹³ Kokukunyikin aitwar ejok Sena ericakisila, ka Apolo; tetere mam etwakiarete ibore.

¹⁴ Konye kisisiaut luwok aigaŋ aswamisio nuejok kiton aijaikin luipudasi, tetere mam eraas luemameete araito.

¹⁵Kiyogaete jo kere luejaas keoŋ, Kiyoga ŋul lukiminasi oni kotoma aiyuun. Asianut kojai kayes kere,