Read Ebaibuli 1961 Iburanian 12 Bible Online

Iburanian 12 - Ebaibuli 1961 bible

Iburanian 12

¹ Aso naarai kilukunit oni kere elisina loepol loetia nen, loka ikajenak, kalacasi ŋinibore kere yenelaŋir; adiakar da naepatanikinit aigogo leonor oni, kaboloboloto katitiŋ epeget loibwaikinitai kakonyenewok,

² kasesenete Yesu, ekagean ka eketodolon loka aiyuuniwok, loabu kotitiŋik emusalaba, komen ileic, kanuka aiyalama naebwaikinitai kakonyeneke, iboie kakan nakoteten naka eicoloŋ loka Edeke.

³ Koomoomata do noi ŋol loketitiŋikini asurup naetia nen naka ikadiakanarak kanukeŋ, kinyeis aipas, kiiloros kotauonokus.

⁴Mam ber ijiito kiton abukor aokot, iwutas kadiakar.

⁵ Bobo kimurwok aicor, nainera kayes kwape odwe ebe, “Okokuka, sirimwaŋenenei alecor naka Ejakait, Kwabo sirikiilor nakiriemeriemaa ŋesi.

⁶ Naarai elecori Ejakait yenemina, Elei da ŋinikoku yenecamunit ŋesi.”

⁷Kanuka alecorio ititiŋikinete. Kiswamakini yes Edeke kwape odwe; naarai ikoku inyoin yenimam papake elecori?

⁸ Aso arai mam kilecorio, naimorikikinit kere, kwaŋin iraas lukiwurikinitai okal! kwabo mere odwe.

⁹ Bobo da ajaas oni lukapapawok luka akuan lukiileconorete, oni da kayoŋito kes. Mam itelekarit noi oni anonokikin Papa loka imoyon, kajara da?

¹⁰Naarai apotu kesi koleconorete oni apaarasia nuikidioko, kwape kekototor, konye ŋol kilecori kanuka ajokis tetere kimori alauniteke.

¹¹ Alecorio kere naka apak kana mam esubit bala nakaiyalama, dimarai nakican; konye kokau erai araito nuinapakina nuka adolit, kama kaŋul kaluituutooritai kaŋin.

¹² Kanuka ŋun koriosi yesi akusikanin nuekalanyaka, kitogogoŋoto da akusikuŋin nuilejekekas,

¹³ kiswamakis akusikejen irotin luitenara, kinyek yeneŋwalit aitapaario, konye gwai kitaŋaleunoi.

¹⁴ Kotupata ainapakin nepepe kituŋa kere, ka alaunite da, neemamea ŋin emamei yeneanyuni Ejakait.

¹⁵ Koanyanasi ebe emamei yeneolikinit asianut naka Edeke; kinyek “Aliasit naka adwaris” alibun ka aitican yes, kosodete luipu amunaar;

¹⁶ kinyek idiotuŋanan araun yenidote arai yenimam eyoŋit Edeke kwape Esau, loabu kogwela apolouke naka ekiyai kanuka adutunet adiopet naka inyamat.

¹⁷ Naarai ijenete ebe akaulo kaŋun, naakotor airum arereŋ, aponi kogiroi, naarai mam abu kodum apak naka aitoronikin, karaida abu komoote noi kakiyo.

¹⁸ Naarai mam idolokinito emoru loepedorio atirorio, loenoki da akim, karaida neejai amuton naejesi cucucuc, ka idouon luitolimakito, ka ekwam,

¹⁹ ka aruo naka arupepe, ka eporoto loka akiro, luapupete apotu kiŋaiŋaata sirikelimokin kes bobo acekirot.

²⁰ Naarai mam apotu kopedosi atitiŋikin akirot naecorakinio ebe, “Arai ketiro itiaŋ emoru ŋol ibiribirio kamor.”

²¹ Ido kerai naetakani nasogim kwaŋin, abu Musa da kobala ebe, “Akurianari noi, amaran da.”

²² Konye idolokinito Emoru Sion ka ere loka Edeke lokajaran, Yerusalem lokotoma akuj, kaneejaas ajoresio nuka imalaikan lumam imarunos,

²³ ka atukot naka ikiyaik luiwadikatai toma akuj, ka neejai Ekatubon loerai Edeke loka kere, ka neejaas imoyon luka ikadolitok luitodolikinitoi,

²⁴ ka neejai Yesu, ekadiekan loka aitutuket nakitetet, ka neejaas aokot nubwatan nuinerasi nuejok aitelekarit kwa nuka Abel.

²⁵ Kocoito ebe mam iŋerete ŋol loinera. Naarai arai mam apotu kokuata nakeŋerioto ŋol loekwenyari kes ejai akwapin, kitelekari noi oni amamus aiku, arai kiŋeri ŋol loikwenyari ejai toma akuj.

²⁶ Abu eporotoke kitamaran akwap kapak kaya, konye isumuni kwana ebe, “Irwan atipet bobo ejaŋakini, mere akwap bon, konye akuj da.”

²⁷Konye akirot ŋin ebe, “Irwan atipet bobo,” itejenuni alemario naka ŋul luitamaranio, kwape luesubitai, tetere esalete lumam itamaranio.

²⁸Kanuka ŋun naarai kidumuni ajakanut namam itamaranio, kajaas kasianut, nakijaanakinia Edeke aijaanakin naitojokit ŋesi, nepepe kayoŋit ka acoit;

²⁹ naarai erai Edekewok akim naenyamiari.