Read Ebaibuli 1961 Yakob 2 Bible Online

Yakob 2 - Ebaibuli 1961 bible

Yakob 2

¹ Iinacanaka, siritiakito ituŋa naijaatar kaiyuun naka Ejakaitiwok Yesu Kristo, Ejakait loka aibuses.

² Naarai arai elomuni etuŋanan atukosikus, loenapit egilut loka esabu, ka inapen luibusiak, elomuni da lokican enapit luenyilinyila,

³yes da isukunyikinete loenapit luibusiak, itemarete atiar, “Kiboikin ijo ne neejok,” itemarete da lokican atiar, “Kobwo ijo kalaije,” arai bo, “Kiboikin kwap kakejeka,”

⁴aso mam kereka itiakasi kotomakus, iraunos ikatubok luka aomisio nueroko?

⁵ Kiirasi, iinacanaka luminan, Mam kereka abu Edeke koseu lukican lukakwapin araut ikabarak luka aiyuun, ka ikerumak luka ajakanut naisumunikinit ŋul lueminasi ŋes?

⁶Konye ipotu yesi komwaŋa lokican. Mere kereka lukabarak kiridakinito yes, kiyaŋaarete airabis?

⁷Mere kes emoromoroete ekiror loejok lokimaikinitai yes?

⁸ Konye arai kitodoloto ekisil loka akabakanut, kwape ejaar naiwadikatai ebe, “Komina ekoniidunyet kwape iminari bon,” iswamaete ejok.

⁹ Konye arai itiakito ituŋa iswamata erono, kitoronete ikisila yes kwape ikebucarak.

¹⁰ Naarai yenerici ikisila kere, konye kibuca kediopet, egwauni akiro nuka kere.

¹¹ Naarai ŋol loabu kiner ebe, “Siridote,” abu kiner da ebe, “Siriari.” Arai mam idotei, konye iari, iraun do ijo yenibili ikisila.

¹² Kinerasi kwaŋin, kiswamata da kwaŋin, kwape luepote atubokinio akiro kokisila luka aosikinio.

¹³ Naarai etube mam itimi ŋin yenimam iswamai nukaitim; naarai eoloboboi aitim kotube.

¹⁴ Iinacanaka, ajokis anyoin, arai ebala ituŋanan ebe ejai kaiyuun, konye emameete ŋes aswamisio? Epedori kereka akeiyuun aitajar ŋes?

¹⁵Arai inyilinyilitoi onac arai inac, emameete da inyamat luka ŋinipaaran,

¹⁶ konye ebala idiopet kayesi kes ebe, “Koloto inapakina, kodumutu aibuse, kimonikinos,” kwabo mam iinakinete kes nuipuda akuan, ajokis anyoin?

¹⁷Kwaŋin aiyuun da, kemamuutu aswamisio, atwana.

¹⁸ Konye inera idiotuŋanan ebe, “Ejai jo aiyuun, eoŋ da kija kaswamisio.” Kitodikinai cani aiyuunikon komameete aswamisio, eoŋ da ketodikini jo akaiyuun kotoma aswamisio.

¹⁹ Iyuunit ijo ebe erai Edeke ediopet; iswamai ejok. Iyuunete ajokin da, komaranete.

²⁰Ijo etuŋanan lotai, ikoto kereka ajenun ebe aiyuun komameete aswamisio erai arakan?

²¹ Mam kereka aponi kitojokai Aburaam papaawok araun loedolit kanuka aswamisio, naainakinia okokuke Isaaka kotem?

²² Iany aiyuun kwape iswamaa nepepe kaswamisioke, ido etopoloor aiyuun kanuka aswamisio;

²³ Ido kitodolikinai naiwadikatai nainera ebe, “Kiyuu Aburaam Edeke, kimarakinai araut adolit”; komaikinai epapero loka Edeke.

²⁴ Ianyut kwape itojokere ituŋanan araun yenedolit kanuka aswamisio, mere kanuka aiyuun bon.

²⁵ Kwape kwaŋin da mam kereka aponi kitojokai Rakab naadote araun naedolit kanuka aswamisio, nakisukunyikinia ikiyakia, kitotor kes orot ece?

²⁶ Naarai kwape etwania akuan emamei emoyo, kwape kwaŋin da etwania aiyuun emameete aswamisio.