Read Ebaibuli 1961 Yakob 5 Bible Online

Yakob 5 - Ebaibuli 1961 bible

Yakob 5

¹ Aso ca yes ikabarak, komonyata kibwololoto kanuka ican lukiponikinete yes.

² Abos abarakus, anyama ikajekel akusinapito.

³ Amasiki esabukus ka epuesakus, amasikinikec da eraun ajenanut mamakus, enyami awatekus kwape kakim. Ipotu kidiata iborokus luka akais nuipu toma apaarasia nukawasia.

⁴ Koany, iworoi eropit loka ikeswamak luasakata imanikoriakus, loimikitos yesi; aloma aimony naka ikadwenyak aki nuka Ejakait loka ajoresio.

⁵ Ipotu kisiyalamikinos kakwap, kominakinito aboliasio; kitutumata ikusitauon kotoma apaaran naka aario.

⁶Ipotu kitetelekasi akiro ekadoliton, koarata da; mam ŋes itepega yesi.

⁷ Aso iinacan, kotitiŋonokinete, kiton abunore naka Ejakait. Koany, idarit ekakorion araito nuka akwap nuketiai loepol, etitiŋikinit kes kiton ainakinio akiru naka aiporo ka naka akamu da.

⁸ Kotitiŋonokinete yesi da, kiticata itauonokus, naarai eapie abunore naka Ejakait.

⁹Iinacan, siriŋuurianakinos, kinyeis atubokinio; koany, ebwoi ekatubon kokek.

¹⁰ Iinacan, koyaŋaasi inabin araut aanyunet naka aiticanio ka atitiŋikin, luapotu kinerasi kokiror loka Ejakait.

¹¹ Koany, kinyarit luetitiŋikinete luisirereŋitoi. Ipotu kiirasi nuka atitiŋikin naka Yob, ido ipotu koanyut kwape kiswamakinia Ejakait ŋes kawasia, kwape eraar Ejakait lokasianut naepol ka aitim.

¹² Konye nuitelekarito kere, ikainacan, siriyapoenenete, karaida alimit akuj, karaida akwap, karaida aiyaposit ace kere, konye akusikirot, “eebo,” korai eebo, ka “mam” da korai mam, kinyeis aibirokin atubokinio.

¹³ Ejai kereka yeniticanio kotomakus? Kilip. Ejai bo yenelakara? Koye nukaiturit.

¹⁴ Ejai kereka yenedeka kotomakus? Konyarau imakio luka ekanisa, kilipakis ŋes, kinyonyoikis akinyet kokiror loka Ejakait;

¹⁵ ailip da nakaiyuun itajari ikadekan, itonyouni da Ejakait ŋes; arai da kiswamat nukadiakanar, isionio ŋes.

¹⁶Aso kolimonokinos akusidiakanareta bonik ka bonik, kilipanakinos da, tetere iŋaleunete. Ailip naka ikadoliton epedori noi aswam.

¹⁷ Kerai Eliya etuŋanan lokepone kwape kalowok, kilip noi kinye akiru aitep, ido mam abu kotepak akwap adaun ikar iuni ka ilapio ikanykape.

¹⁸ Kosodi kilip bobo, koinak da akuj akim, kora akwap araitoke.

¹⁹ Ikainacan, arai kepaa idio kayesi ainyein abeit, kosodi idiopet ainyakun ŋes,

²⁰ kitejenut ŋes ebe yeninyakuni ikadiakanaran kotoma apaar naka erotoke, itajari akeijar kotoma atwanare, erapari da adiakanareta nukepuak.