Read Ebaibuli 1961 1 Petero 3 Bible Online

1 Petero 3 - Ebaibuli 1961 bible

1 Petero 3

¹ Yes aŋor da kwape kwaŋin, kononokikis ikiliokokus, tetere ice, karaida mam erimasi akirot, kiriasi iponesio luka aŋorokec komamei akirot,

² naeanyuniata iponesiokus luesegara, ka luka ayoŋit.

³ Kinyek aisiritekus araut nakokuju, naka aicip itim, ka aidelonokin esabu, ka ainap inapen,

⁴konye korai etuŋanane loibwaa lokotau, anapito namam edaun naka emoyo loiyapepera ka aiyapaara, loerai loketiai loepol kakonyen nuka Edeke.

⁵Naarai kwape kwaŋin kolo sek kisirenenoto aŋor nukalaunak nuamunosi Edeke, kononokikinito da ikiliokokec.

⁶ Kwape kerimaritor Sara Aburaam, konyarite ŋes ejakait. Iraas yesi da idweke, arai iswamaete ejok, komam kitukuriani etasuro kere.

⁷ Yes da ikiliok kwape kwaŋin, kiboienenete kakusiŋor koomito nukec, kitopoloorito aberu kwape ibore yenitelekarit akalanyanut, naarai kes da akerumak nukaupakus nuka asianut naka aijar, kinyek akusiilip aitikokinio.

⁸ Nakawasia, koraas kere luicamanara, luitimonoros, luiminanara kwape iinacan, luisiaka, luitasonos da.

⁹ Sirinyaŋarete aronis kanuka aronis, karaida amorosit kanuka amorosit; konye gwai kilipakis arereŋ, naarai aponi konyarakin ŋin, tetere irumete asianut.

¹⁰ Naarai ebe: “Yenimiela aijar, ka aanyun da apaarasia nuejok, Kitikok aŋajepeke kama karonis, Aitukuke da kinyek einer nukaimod.

¹¹Konyou kotoma aronis, kiswama ajokis; Komo ainapakin, kotup da.

¹²Naarai esesenete akonyen nuka Ejakait ikadolitok, Itoikinit da akiike apupun ailipikec. Konye egirito akonyen nuka Ejakait ŋul luiswamaete aronis.”

¹³Iŋai tope kiswamakini yes erono arai idunyakinito nuejok?

¹⁴ Konye karaida kisiriebio kanuka adolit kisirereŋitoi, Sirikikuriakaros aitukurianakec, kwabo sirikiyaloŋoŋoto,

¹⁵ konye kitalautu Kristo kotauonokus araut Ejakait. Kokapakina apaarasia kere aboŋokin ŋinituŋanan yenikiŋisi yes akiro nuka amun naejai tomakus, konye ca kaiyapepera ka ayoŋit.

¹⁶ Kojaas kaomisio nuejok, tetere kaŋun nukisiomere, irumete ileic ŋul luemoromoroete ikusiponesio luejok kotoma Kristo.

¹⁷ Naarai ejok aisiriebio kanuka aswam nuejok, arai ŋes naekot Edeke, itia kanuka aswam nueroko.

¹⁸ Naarai Kristo da aponi kisiriebai kanuka adiakanar irwan atipet, lokadolit kanuka lumam edolito, tetere kiyauni mama ejai Edeke, nakearere akuanake, konye koinakinai aijar kotoma omoyo,

¹⁹ loalosio da alimonokinia imoyon luejaas aidaris,

²⁰ lumam kerimasi kolo, naedareunitor atitiŋikin naka Edeke, kapaarasia nuka Noa, naetemonokinere ataker, kama etajarere ituŋa idis, kotoma akipi, kes ituŋa ikanykauni.

²¹ Eputosi akiro ŋun kaibatisao, naitajari yes kwana, mere alemar elos loka akuan, dimarai einer kaomisio nuejok mama ejai Edeke, kanuka ajarun naka Yesu Kristo,

²² ejai akan nakoteten naka Edeke, kedau adokar toma akuj; imalaikan, ka lukapolou, ka lukapedor da kononokikis ŋes.