Read Ebaibuli 1961 1 Petero 4 Bible Online

1 Petero 4 - Ebaibuli 1961 bible

1 Petero 4

¹ Aso naarai Kristo aponi kisiriebai akuan, konapenenete yesi da lujiis luka aomisioit kaŋin, naarai yenisiriebio akuan enyek adiakar,

² tetere idaunete apaarasiakus nuideuna iriŋa ijaas toma akuan, mere bobo kanuka aiŋobel naka ituŋa, konye kanuka ŋun nuekot Edeke.

³ Naarai apaarasia nuatuboros kidaunito aiswamaenen nuekotos Imo, alosenen toma abenyanut, aiŋobel, emeret, aboliasio, edeŋo, ka aima da aputosia nuketal.

⁴Isiwumokinito kes naarai mam ikerete nepepe kakes kotoma oponesio ŋupeŋul luutai, komoromoroete yes;

⁵ konye inyakunete kesi akirot mama ejai ŋol loitemonokino atubokin lukajarak ka lukatwak da.

⁶ Naarai ŋin ŋes elimonokinere lukatwak da Akiro Nukajokak, tetere kes da etubokinio kwape ituŋa luejaas awat, konye kojarata kotoma omoyo kwape ka Edeke.

⁷ Eapie awasia naka iboro kere; aso koomito kacoit, kinyeis da amer, tetere ilipenenete.

⁸ Aitelekarit kere kodunyakis noi aminanara, naarai erapari amin adiakanareta nukepuak.

⁹ Kisukunyanakinete ipejok bonik ka bonik, komamei aŋuurian.

¹⁰ Kwape kedumunia ŋinituŋanan ainakinet, kijaanakis lucekus kaŋin, kwape ikeŋadak luejok luka asianut naka Edeke naka iponesio luipu;

¹¹ arai ejai yeninera, kwape yeninera akiro nuka Edeke; arai ejai yenijaanakini, kwape kanuka agogoŋ naekori Edeke; tetere itopolooritai Edeke kotoma kere kanuka Yesu Kristo. Aibuses ka ayait kojaas mamakeŋ ikar ka ikar. Amen.

¹² Luminan, siriwumokinete aitemio naka akim nakibunokinit yes, bala kidoik yes ibore yenikaumokin.

¹³ Konye kiyalamasi naarai imorete aisiriebio naka Kristo, tetere naepukorere da akeibuses, iyalamas kailel naepol.

¹⁴ Arai kiimoromoroi kanuka ekiror loka Kristo, isirereŋitoi, naarai kidoik yes Emoyo loka aibuses, ka loka Edeke da.

¹⁵Konye kinyek idio kayesi aisiriebio kanuka araut ikaaran, arai bo ikokolan, arai yeniswamai nueroko, arai kanuka araut yeniramaana;

¹⁶ konye arai kisiriebio kanuka araut Ikristayot, kinyeis ileic airum, konye kitopoloor Edeke kokiror kaŋol.

¹⁷ Naarai adol apak naegeunere atubokin lukokal loka Edeke; ido arai egeuni kaoni, anyoin bo awasia naka ŋul lumam erimasi Akiro Nukajokak nuka Edeke?

¹⁸ Bobo da, ebe, “Arai etiono aitajar ikadoliton, Ai bo do etakanunia yenikepali ka ikadiakanaran?”

¹⁹ Kanuka ŋun kiswamata ejok ŋul luisiriebio kwape ejaar akot naka Edeke, kisiŋadata Ekasuban lomunot akeceijar.