Read Ebaibuli 1961 1 Yokana 4 Bible Online

1 Yokana 4 - Ebaibuli 1961 bible

1 Yokana 4

¹ Luminan, sirikiyuut ŋolimoyo, konye kitemoto imoyon arai eraas luka Edeke; naarai alomasi inabin luipu lukeŋalak toma akwapin.

² Kana ŋes ijenuniata Emoyo loka Edeke; ŋolimoyo loelimori ebe abu Yesu Kristo toma akuan, erai loka Edeke.

³ Ŋolimoyo da lomam elimori Yesu, mam erai loka Edeke, ŋol erai lokasurup loka Kristo, loipuput ebe ebunit, kwana da ejai toma akwapin.

⁴ Idwe ludidik, iraas yesi luka Edeke, ipikosi kes, naarai epol ŋol loejai tomakus adepar ŋol loejai toma akwapin.

⁵ Eraas kesi luka akwapin, kanuka ŋun inerasi nuka akwapin, iirarete da akwapin kes.

⁶ Kirai oni luka Edeke. Yenejeni Edeke kiirari oni, yenimam erai yenika Edeke mam kiirari oni. Kana ŋes kijenunia emoyo loka abeit ka emoyo loka apaar.

⁷ Luminan, kaminanaros, naarai amin erai naka Edeke, ŋin da kere yenemina eurio kama ejai Edeke, ejeni da Edeke.

⁸Yenimam emin mam ejeni Edeke, naarai erai Edeke amin.

⁹ Kana ŋes etakanunia amin naka Edeke mamawok, naarai abu Edeke kijuk Okokuke loteluna toma akwapin tetere kijari kanukeŋ.

¹⁰ Kana ŋes ejaar amin, mere ebe kimina oni Edeke, konye abu ŋesi komina oni, kijuk da Okokuke araun alucet naka adiakanaretawok.

¹¹ Luminan, arai kimina Edeke oni kwaŋin, kiburao oni da aminanara.

¹² Emamei cut ituŋanan yeneanyunit Edeke apaarasia kere; arai kiminanara, esalit Edeke tomawok, akemin da apoloor kotomawok.

¹³ Kana ŋes kijenunia ebe kisalit tomakeŋ, ka ŋes da tomawok, naarai abu koinak oni nuka Emoyoke.

¹⁴ Kianyunit, kitejenuni da ebe abu Papa kijuk Okokuke araun Eketajaran loka akwapin.

¹⁵ Arai elimori ituŋanan ebe Yesu ŋes Okoku loka Edeke, esali Edeke tomakeŋ, ŋes da toma Edeke,

¹⁶Kijeni, kipou keyuut da, amin naejai Edeke mamawok. Edeke ŋes amin; ŋin da yenesalit toma amin, esalit toma Edeke, Edeke da esalit tomakeŋ.

¹⁷ Kana ŋes apolooror amin nepepe kaoni, tetere kija katitiŋ kapaaran naka aitub akiro; naarai kwape eraar ŋesi, kirai oni da kwaŋin toma akwapin nu.

¹⁸Emamei akurian kotoma amin, naarai amin naapoloor ireŋeari akurian. Naarai ejai akurian aiticanio, yenekuriana da mam epolooro kotoma amin.

¹⁹Kimina oni, naarai ŋes kigei amin oni.

²⁰Arai inera ituŋanan ebe, “Amin Edeke,” kolaite da onaceke, erai ikeŋalan. Naarai yenimam emina onaceke loeanyunit, mam epedori amin Edeke lomam eanyunit.

²¹ Ejai da oni aicorakinet na kamakeŋ, ebe yenemina Edeke, komina da onaceke.