Read Ebaibuli 1961 Ikatubok 1 Bible Online

Ikatubok 1 - Ebaibuli 1961 bible

Ikatubok 1

¹ Kosodi kanen ketwana Yosua, kiŋitata idwe luka Isirael EJAKAIT ebe, “Iŋai bo kiŋarenikini sio alosit asurokin Ikanaanin, aitiji kes?”

² Kotema EJAKAIT atiar, “Yuda ŋes elosi: koany, ejaik akwap akanike.”

³ Kotema Yuda onaceke Simeon atiar, “Bia kauparos oroet lokabeit eoŋ, tetere kitijie Ikanaanin; kwape kwaŋin da kiupar eoŋ kajo oroet lokibeit ijo,” Kouparos Simeon kaŋes.

⁴ Kolot Yuda; kijaik EJAKAIT Ikanaanin ka Iperisin akanikec: kodanyata ituŋa ilukumin itomon kaŋul koBesek.

⁵Apotu kodumakis Adoni-besek Besek: kitijioto ŋes, kodanyata Ikanaanin ka Iperisin.

⁶Konye koker Adoni-besek; kodapata ŋes, kikamut ŋes, kotubosi ibokoro lukapolok luka akaninike ka luka akejeke da.

⁷ Kotema Adoni-besek atiar, “Apotu ikabakan akaisakanykaarei luatuboritai ibokoro lukapolok luka akaninikec ka luka akejekec kirarata ikecenyamat kokwap kemesaka: kwape abu eoŋ keswamaa, keswamaki Edeke eoŋ kwaŋin.” Koyaŋaarai ŋes Yerusalem, kotwanik ŋina.

⁸ Kitijioto idwe luka Yuda Yerusalem, kirumata ŋes, kodanyata lukanen kakwanis naka ekileŋ, kicweata ere.

⁹ Kokau kaŋun, koloto idwe luka Yuda aitiji Ikanaanin lueboiete kakwap nakiukon, kari da naka Eŋalakimak, kapuuton da.

¹⁰ Kolot Yuda asurokin Ikanaanin lueboiete koKeburon: (kerai ekiror loka Keburon sek Kiriat-araba:) kodanyata Sesai, ka Akiman, ka Talumai.

¹¹ Konyoutu kanen koloto asurokin lueboiete koDebir. (Kerai ekiror loka Debir sek Kiriat-seper.)

¹²Kotema Kaleb atiar, “Ŋol loedanyi luka Kiriat-seper, kosodi airum ere, akorakini eoŋ ŋol akokuka Akisa aimany,”

¹³ Kirum Otiniel ŋes, loarai okoku loka Kenas, onace lodidi loka Kaleb: kokorak ŋes Akisa akokuke aimany.

¹⁴ Kosodi kanen, kebu mamake abu ŋin kokoto ŋol ailipun papake emanikor: kodok kasigiriake, kotema Kaleb ŋes atiar, “Inyo bo ikoto ijo?”

¹⁵ Kotema ŋes atiar, “Koinakinai eoŋ arereŋ; naarai kiinakinit eoŋ akwap naka ari naka Eŋalakimak, koinakinai eoŋ da atanin nuka akipi.” Koinak Kaleb ŋes atanin nukokuju ka nukajesa da.

¹⁶ Koloto idwe luka Ekenit, ekamuran loka Musa, anyoun kore loka idukudukun kidwe luka Yuda amodiŋ naka Yuda, naejai eŋalakimak naka Arad; kolototo kiboioto kituŋa.

¹⁷ Koloto Yuda ka onaceke Simeon, kodanyata Ikanaanin lueboiete koSepat, komudiasi cut. Komaikinai ere Koruma.

¹⁸ Kirum Yuda Gasa da ka eikoruke, ka Asukelon ka eikoruke, ka Ekuron ka eikoruke.

¹⁹ Kojai EJAKAIT kaYuda; kireŋea lueboienenete kakwap nakiukon; naarai mam ŋes abu kopedo aireŋear lueboienenete kaditot, naarai ajaas ŋul agalin nuka asua.

²⁰ Koinakis Kaleb Keburon kwape abalar Musa: kireŋea kanen odwe luuni luka Anak.

²¹ Mam idwe luka Benyamin apotu kireŋeasi Iyebusin lueboiete koYerusalem; konye kiboioto Iyebusin kidwe luka Benyamin koYerusalem, kiton lolo.

²²Kolot ekal loka Yosep da asurokin Bet-el: kojai EJAKAIT kakes.

²³ Kijuka ekal loka Yosep ituŋa airot Bet-el. (Kerai ekiror loka akwap sek Lus.)

²⁴ Koanyut ikarotak etuŋanan elomuni kore, kotemasi ŋes atiar, “Kiŋaiŋait, kitodikinai isio neelomarere ore, kiswamakini isio jo nukasianut.”

²⁵Abu itodik kes neelomarere ore, kodanyata lukore kakwanis naka ekileŋ; konye apotu koosikis etuŋanan ŋol ka ekekike kere alosit.

²⁶Kolot etuŋanan ŋol akwap naka Ikitin, koduk ere, komaik ekekiror Lus: loerai ekekiror kiton lolo.

²⁷ Mam Manase abu kireŋea lueboiete koBet-sean ka ireriake, karaida luka Taanak ka ireriake, karaida lueboiete koDor ka ireriake, karaida lueboiete koIbuleam ka ireriake, karaida lueboiete koMegido ka ireriake: konye apotu Ikanaanin kiboioto kakwap kaŋin.

²⁸Kosodi kanen, kegogoŋor Isirael, apotu kitaraut Ikanaanin ikeswamak nakailolitoi, mam apotu kireŋeasi kes cut.

²⁹ Mam Epuraim abu kireŋea Ikanaanin lueboiete koGesir; konye kiboioto Ikanaanin koGeser kamakec.

³⁰ Mam Sebulun abu kireŋea lueboiete koKitiron, karaida lueboiete koNakalol; konye apotu Ikanaanin kiboioto kamakec, koraut ikeswamak nukailolitoi.

³¹ Mam Aser abu kireŋea lueboiete koAko, karaida lueboiete koSidon, karaida luka Akulab, karaida luka Akisib, karaida luka Keluba, karaida luka Apik, karaida luka Rekob:

³² Konye apotu Iserain kiboioto kama ejaas Ikanaanin ikulepek akwap: naarai mam apotu kireŋeasi kes.

³³ Mam Naputali abu kireŋea lueboiete koBet-semes, karaida lueboiete koBet-anat; konye kiboi kama ejaas Ikanaanin, ikulepek akwap: konye apotu lueboiete koBet-semes ka luka Bet-anak koraut ikeswamakakec nukailolitoi.

³⁴Apotu Imorain koremosi idwe luka Dan akwap nakiukon: naarai mam apotu kocamakis kes abunore aditot:

³⁵ Konye kiboikinos Imorain moru Keres, ka Aiyalon ka Saalubim: konye kolaŋir akan naka ekal loka Yosep, kwaŋin koraunos ikeswamak nukailolitoi.

³⁶ Ageunit eikor loka Imorain kaneedokarere Akurabim, anyoun komoru, kiton kuju.