Read Ebaibuli 1961 Ikatubok 13 Bible Online

Ikatubok 13 - Ebaibuli 1961 bible

Ikatubok 13

¹ Kiswamata bobo idwe luka Isirael nueroko kakonyen nuka EJAKAIT: kijaik EJAKAIT kes akan naka Ipilisitian ikar akaisaoŋon.

² Ajai etuŋanan loka Sora loka ekek loka Idanin, ekekiror Manoa; arai akeberu arakan, mam aurie.

³ Kitakanikin emalaika loka EJAKAIT aberu, kotema ŋes atiar, “Aso koany, irai ijo arakan, mam iwurie; konye ipotuuni, iwuruuni ikoku yenisapat.

⁴ Aso cado kocoite, keŋaiŋait, sirikimat ebino karaida nuitemerete, sirikinyam da idiobore yenimam elai:

⁵ Naarai koany, ipotuuni ijo, iwuruuni ikoku yenisapat; mam ejutet icaki akouke: naarai eraun ikoku Enasirit loka Edeke ageun kakoik: egeuni da ŋesi aitajar Isirael kakan naka Ipilisitian.”

⁶ Kosodi aberu abunore alimokin okilenike ebe, “Abu etuŋanan loka Edeke kobu neajai, akekonyen koputos bala akonyen nuka emalaika loka Edeke, loeyoŋitai; mam abu keŋitu ŋes neabunio, karaida ŋes alimokin eoŋ ekekiror.

⁷Konye abu katema eoŋ atiar, ‘Koany, ipotuuni, iwuruuni ikoku yenisapat; sirikimat ebino karaida nuitemerete, sirikinyam da idiobore yenimam elai: naarai eraun ikoku Enasarit loka Edeke ageun kakoik kiton apaaran naka atwanareke.’ ”

⁸Kosodi Manoa ailip EJAKAIT ebe, “Wu EJAKAIT, keŋaiŋait, koboŋ bobo etuŋanan loka Edeke loibu kijuk mamakosi, kisisianak isio nukiswamakini ikoku yeneuruunio.”

⁹Kopup Edeke eporoto loka Manoa; koboŋ emalaika loka Edeke mama ejai aberu iboie komanikor: konye mam okilenike Manoa ajaas kaŋes.

¹⁰Kiwonya aberu koker, kolimok okilenike, kotema ŋes atiar, “Koany, ketakanikin eoŋ etuŋanan loabunit neajai eoŋ apaaran ya,”

¹¹Konyou Manoa, kotup akeberu, kodol neejai etuŋanan, kotema ŋes atiar, “gjo ŋes etuŋanan loineras kaberu?” Koboŋok ebe, “Eoŋ lopelo.”

¹²Kotema Manoa atiar, “Aso kedolot akonikiro, kekonakisi ai ikoku, ido anyoin aswamuke?”

¹³Kotema emalaika loka EJAKAIT Manoa atiar, “Kocoite aberu ŋun kere nuabu kalimok ŋes.

¹⁴Siri ŋes kenyam ibore yenelomuni komusabibu, karaida aimat ebino, arai nuitemerete, karaida ainyam idiobore yenimam elai; koric ŋesi kere nuecorakinit ŋes.”

¹⁵ Kotema Manoa emalaika loka EJAKAIT ebe, “Keŋaiŋait kosalak ber ijo tetere sio kipuikini jo ikalol.”

¹⁶Kotema emalaika loka EJAKAIT Manoa atiar, “Karaida kasala, mam anyami atapakon: arai ikoto apuikin ainakinet naicweio, ibusakinit ijo ainakin ŋes EJAKAIT.” Naarai mam Manoa ajeni ebe erai ŋesi emalaika loka EJAKAIT.

¹⁷Kotema Manoa emalaika loka EJAKAIT atiar, “Iŋai bo ekonikiror, tetere kitopoloori jo kedolot akonikiro?”

¹⁸ Kotema emalaika loka EJAKAIT ŋes atiar, “Kanukinyo iŋisitor ijo ekakiror, naarai erai lokaumokin?”

¹⁹ Koyaŋa Manoa ikalol ka ainakineteke naka akiria, koinak EJAKAIT komoru: kiswama emalaika nukaumokin, kosesenata Manoa ka akeberu.

²⁰ Naarai kedoka akim kiton akuj anyoun kotem, abu emalaika loka EJAKAIT kodokaria kakim naka etem: kosesenata Manoa ka akeberu; kibiroros kwap ebuburia.

²¹ Konye mam bobo emalaika loka EJAKAIT abu kitakanikin Manoa karaida akeberu. Kojen do Manoa ebe kerai ŋesi emalaika loka EJAKAIT.

²² Kotema Manoa akeberu atiar, “Abeit kitwaki, naarai kianyu Edeke.”

²³ Konye kotema akeberu ŋes atiar, “Arai kitojokit EJAKAIT aiar oni, timam kecamu ainakinet naicweio ka ainakinet naka akiria kakaniwok, timam da kiitodik oni akiro nu kere, timam kiilimok oni kapak kana akiro nuikote nen.”

²⁴ Kouru aberu ikoku yenisapat, komaik ekekiror Samuson: kopoloor ikoku, kisirereŋ EJAKAIT ŋes.

²⁵ Kogeu emoyo loka EJAKAIT aijukit ŋes koMakanedan, kidiŋ Sora ka Esitaol.