Read Ebaibuli 1961 Ikatubok 16 Bible Online

Ikatubok 16 - Ebaibuli 1961 bible

Ikatubok 16

¹Kolot Samuson Gasa, koany kaŋina naadote, koloma mamakeŋ.

² Kolimokinai Igasan ebe, “Abu Samuson ne.” Kolukutu ŋes, koperut ŋes akuare kere korute lokore, kililiŋata akuare kere, kobalas ebe, “Kiwala akwap, kiari ŋes.”

³Koper Samuson kiton kidiŋebai, konyou kidiŋebai, kitiŋ ikirigin luka erute lokore, ka ategerio aarei, kouto kes, ka atiket da, korioŋak kes okeperinike, kodaka kes aidi naka eroŋat loitei Keburon.

⁴Kosodi kanen akaulo kaŋun, abu ŋesi kominak aberu kaditot naka Sorek, ekekiror Delila.

⁵ Kopotu ijaka luka Ipilisitian neejai ŋin, kotemasi ŋes atiar, “Kijodijod ŋes, kojen neelomunitor akegogoŋ naepol, ka epone lokipedoria aipikor ŋes, tetere kipedori ajen ŋes aitican ŋes: kiinakini isio jo ŋinidiopet kasio atutubeta akwat atomon kanadiopet luka epuesa.”

⁶Kotema Delila Samuson atiar, “Keŋaiŋait, kolimokinai neelomunitor akonigogoŋ naepol, ka epone lokienere jo aitican.”

⁷Kotema Samuson ŋes atiar, “Arai kaenata kesi eoŋ kigegoi ikanykaarei luepalal lumam itoonitoi, ŋes kito akalanyanaror eoŋ, kiputokin kalucetuŋa.”

⁸ Kosodete ijaka luka Ipilisitian ainun ŋin igegoi ikanykaarei luepalal lumam itoonitoi, koenia ŋin ŋes.

⁹ Ajaas ŋin ikaperunok agola nakotoma. Kotema ŋin ŋes atiar, “Samuson, kibunokis jo Ipilisitian.” Koŋed igegoi kwape eŋedar eusi loka amujajut ketiro akim. Kwaŋin mam akegogoŋ ajenio.

¹⁰Kotema Delila Samuson atiar, “Koany, kimod ijo eoŋ, kilimokinit da nuka aisab: aso keŋaiŋait, kolimokinai epone lokienere jo.”

¹¹Kotema ŋes atiar, “Arai kaenata kesi eoŋ kaunoi nukitetiak numam itwasamatai adioswam, ŋes kito akalanyanaror eoŋ, kiputokin kalucetuŋa.”

¹² Kolem Delila aunoi nukitetiak, koenia ŋes, kotema atiar, “Samuson, kibunokis jo Ipilisitian.” Kiboiete ikaperunok kagola nakotoma. Koŋeda kes kakaninike bala eusi.

¹³Kotema Delila Samuson atiar, “Okwe, kimod ijo eoŋ kiton kwana, kilimokinit da nuka aisab: kolimokinai epone lokienere jo.” Kotema ŋes atiar, “Arai kicipak ijo ikatim luieipitai irwan akanykaarei oboro luicipi.”

¹⁴Abu ŋin kiketak ŋul keloit, kotema ŋes atiar, “Samuson, kibunokis jo Ipilisitian.” Kokweny kotoma ajo, kout eloit ka aicipet da.

¹⁵ Kotema ŋin ŋes atiar, “Itemari ijo biai ebe, ‘Kamina jo,’ komam ekonitau ejaas keoŋ? Kimod eoŋ irwan nu auni, mam da kilimokinit eoŋ neelomunitor akonigogoŋ naepol.”

¹⁶Kosodi kanen kicebok ŋin abokobok ŋes kaimaima ŋin paaran kakiroke, abu eketau kokadak kiton atwanare.

¹⁷ Abu kolimok ŋes nukotauke kere, kotema ŋes atiar, “Mam ejutet icakit akouka; naarai arai eoŋ Enasirit loka Edeke ageun kakoik naka totoka: arai kebareni akakou ŋes kito enyounio akagogoŋ kamakaŋ, akalanyanar, kiputokin da kalucetuŋa.”

¹⁸Kejenu Delila ebe alimoki ŋes nukotauke kere, abu kijuka anyaraun ijaka luka Ipilisitian ebe, “Kopotu do irwan na bon, naarai kalimok eoŋ nukotauke kere.” Kosodete ijaka luka Ipilisitian aponare mamake koyaunito apesan kakanikec.

¹⁹ Abu kitojoto ŋes kakejeke; kosodi ŋin anyaraun etuŋanan kobareno iketim luecipitai irwan akanykaarei; kogeu aitican ŋes, konyou akegogoŋ kamake.

²⁰ Kotema atiar, “Samuson, kibunokis jo Ipilisitian.” Kokweny kotoma ajo, kobala ebe, “Alomari kwape lem sek, kasodi ailakilakaar.” Konye mam ajeni ebe abu EJAKAIT konyou kamakeŋ.

²¹Kikamut Ipilisitian ŋes, kogorut akekonye; koyaŋaasi ŋes Gasa, koenata kirikoi luka aisinit; abu kirienenec kaidaris.

²²Konye apotu iketim kogeut apol bobo kedaun abaren ŋes.

²³Kosodete kotukonokinos ijaka luka Ipilisitian ainakin Dagon ekecedeke asubanit naepol, kalakara da: naarai abalas ebe, “Kijaik edekewok oni Samuson lokasurupiwok akaniniwok.”

²⁴ Keanyut ituŋa ŋes, apotu kituroto edekekec: naarai abalas ebe, “Kijaik edekewok oni lokasurupiwok akaniniwok, loemudiarit awokokwap, loaar luipu kaoni.”

²⁵ Kosodi kanen, kiyalamikinos ikecetauon, apotu kotemasi ebe, “Konyarautu Samuson, koboliak oni,” Konyaraut Samuson kaidaris; koboliak kes: kibwaikis ŋes kidiŋ opirin.

²⁶Kotema Samuson esapat loarikit ŋes kakan ebe, “Kocamakinai kararapa ipirin luigaŋito etogo, tetere agoŋakini kes.”

²⁷ Eleleba etogo ikiliok ka aŋor; ijaka kere luka Ipilisitian ajaas nen; ajaas ikiliok ka aŋor kwape ilukumin iuni kuju togo, lueteete Samuson eboliakini kes.

²⁸ Kiworo Samuson EJAKAIT, kobala ebe, “Wu EJAKAIT Edeke, keŋaiŋait kiitunoi, keŋaiŋait kitogogoŋoi, irwan na bon, wu Edeke, tetere enyaŋari atipet akakonye aarei kaneejaas Ipilisitian.”

²⁹Kitiŋ Samuson ipirin iarei lukokidiŋ luegaŋito etogo, kogoŋakin kes, ediopet kakekan nakoteten, ediopet da kakekan nakokediany.

³⁰Kotema Samuson atiar, “Mere katwana nepepe k Ipilisitian.” Kokukum kakegogoŋ kere; kotiyaikin etogo ijaka, ka ituŋa kere luajaas toma. Kwaŋin lukatwak luaari ŋesi kapak naka atwanareke epu adepar luaari ŋesi ejari.

³¹ Kosodete ikeinacan ka ekal kere loka papake aponare, kolemutu ŋes, koyaŋaut, kidaikis ŋes kidiŋ kaSora ka Esitaol aibois nakidaanakina naka Manoa papake, Abu ŋesi kotubok Isirael ikar akaisaarei.