Read Ebaibuli 1961 Ikatubok 17 Bible Online

Ikatubok 17 - Ebaibuli 1961 bible

Ikatubok 17

¹Ajai etuŋanan loka akwap nakiukon naka Epuraim, ekekiror Mika.

² Abu ŋesi kotema totoke atiar, “Atutubeta akwat atomon ka nadiopet nuka epuesa nuaponi koyaŋaarai kaneijai ijo, nuibu ijo kilam, ibu da kiner kapupi, koany, ejai epuesa neajai eoŋ; eoŋ abu kayaŋa ŋes.” Kotema totoke atiar, “Kisirereŋ EJAKAIT okokuka.”

³ Kinyakak ŋesi totoke atutubeta akwat atomon ka nadiopet nuka epuesa, kotema totoke ŋes atiar, “Abeit atiakakin EJAKAIT epuesa kakanika kanuka okokuka, aiswamaunia aput naegerer ka aput nacaluna: kanuka ŋun enyakakini ijo.”

⁴ Kosodi kinyakaki ŋesi totoke apesan, abu totoke kolem atutubeta akwat aarei nuka epuesa, kijaik ekatatan, loeswamaunia ŋun aput naegerer ka aput nacaluna: kojaun togo loka Mika.

⁵ Kejai etuŋanan ŋol Mika etogo loka idekesio, kiswamau epod, [11] ka iterapim,[12] kotiak ediopet kodweke, koraun do ŋol esasedotike.

⁶ Amamei ekabaka koIsirael kapaarasia kaŋun: eswamaenenei ŋinituŋanan nuadolito kakonyeneke bon.

⁷ Ajai ekatumunan loka Bet-lekem-yuda, loka ateker naka Yuda, loarai Elebit, eboienenei kanen.

⁸Konyou etuŋanan kore, koBet-lekem-yuda, aiboiororoi kaneedumunia aibois: kodol akwap nakiukon naka Epuraim, togo loka Mika, kalositeke.

⁹Kotema Mika ŋes atiar, “Ai bo kibunio?” Kotema ŋes atiar, “Arai eoŋ Elebit loka Bet-lekem-yuda, alosi aiboiororoi neadumunia aibois.”

¹⁰ Kotema Mika ŋes atiar, “Keboioto keoŋ, koraun papaka, esasedotika da, kainanakini jo atutubeta atomon nuka epuesa ŋolikaru, ka inapen lukitetiak, ka inyamatakon.” Kolomari do Elebit.

¹¹Kitojok Elebit aiboi ketuŋanan; kosubite ekatumunan ŋol bala ediopet kodweke.

¹²Kotiak Mika Elebit, koraun ekatumunan ŋol esasedotike, kojaun togo loka Mika.

¹³Kosodi Mika atemar ebe, “Kwana ajeni eoŋ ebe kekonakini EJAKAIT eoŋ ejok, naarai Elebit ŋes esasedotika.”