Read Ebaibuli 1961 Ikatubok 19 Bible Online

Ikatubok 19 - Ebaibuli 1961 bible

Ikatubok 19

¹ Kosodi kanen, kapaarasia kaŋun naamamear ekabaka koIsirael, ajai Elebit loiboie kosaŋe loka akwap nakiukon naka Epuraim, loabu koyaŋa abusiat koBet-lekem-yuda.

²Kolot akebusiat eporo bala naadote, konyou kamake, kolot togo loka papake Bet-lekem-yuda, kiboi kanen ilapio iwoŋon.

³Konyou okilenike, kibwapa ŋes, aimaima ŋes, ainyakun ŋes, kojai ebulesitike kaŋes, ka asigiria aarei: koyaŋa ŋin ŋes togo loka papake: keanyu papa loka apese ŋes, abu kolakar airiamun kaŋes.

⁴Kosodi ekamuranike, papa loka apese aitapaikin ŋes; kiboioto kaŋes apaarasia auni: konyamata, komatata, koperoto nen.

⁵ Kosodi kanen kapaaran nakiwoŋonet, kodilokis anyoun tupuruc, konyou alosit: kotema papa loka apese ekamuranike atiar, “Kitalaka ekonitau kidionyamat, kosodi konyet alosit.”

⁶Kiboikinos, konyamata, komatata, kes kere iarei: kotema papa loka apese etuŋanan atiar, “Keŋaiŋait, kocam kitiwala akuare kere, kiyalamikin ekonitau.”

⁷Konyou etuŋanan alosit; konye kimaima ekamuranike, kopere bobo nen.

⁸Kodilok anyoun alosit tupuruc kapaaran nakikanyet; kotema papa loka apese atiar, “Kitalaka ekonitau keŋaiŋait, kidareu aitodol ajotet”; konyamata kesi kere iarei.

⁹Kosodi kenyou etuŋanan alosit, ŋes ka akebusiat ka ekebulesit, kotema ekamuranike, papa loka apese ŋes atiar, “Koany, etiboŋ kwana akwap, keŋaiŋait kitiwala akuare kere: koany, eapie apaaran adaun, kopero ne, kolakar ekonitau; kodilok moi alosit, tetere ilosi ore.”

¹⁰ Konye koŋer etuŋanan aitiwalar akuare ŋin konye abu konyou kolot, kodol Yebus (ŋopeŋol ŋes Yerusalem): ajaas ŋes asigiria aarei nuapesikinitai aibwanenisio; ajai da abusiatake kaŋes.

¹¹ Naaapikiniata kesi Yebus, kitiboŋite akwap cut; kotema ebulesit ekejakait atiar, “Keŋaiŋait, bia kapaasi ore lo loka Iyebusin, kaperoto nen.”

¹² Kotema ekejakait ŋes atiar, “Mam oni kipaari ore loka emoit, lomam erai loka idwe luka Isirael; konye kitubor kiton Gibea.”

¹³Kotema ŋesi ekebulesit atiar, “Bia, kekunyakisi adiopet kaiboisio kanu; kiperi da Gibea, arai Rama.”

¹⁴Kwaŋin kotuboros koloto; kowarik kes akwap eiduny keGibea, loerai loka Benyamin.

¹⁵ Kopaasi ŋina, alosit apero Gibea: abu koloma, kiboikin orot loka ere: naarai amamei ituŋanan yenabu koyaŋa kes togoke apero.

¹⁶ Ido koany, abu emojoŋ kobu kaswamuke komanikor eboŋ; erai etuŋanan ŋol loka akwap nakiukon naka Epuraim, eboie da koGibea: konye ituŋa luka aibois araas Ibenyamin.

¹⁷Kiteluo akekonye koany ekaloton korot loka ere; kotema emojoŋ atiar, “Ai bo ilosi ijo? Lali da kibunio?”

¹⁸ Kotema ŋes atiar, “Kilosi anyoun kobet-lekem-yuda kiton osaŋe loka akwap nakiukon naka Epuraim; bukosi ŋina, abu kalosite Bet-lekem-yuda: ido alosi kwana togo loka EJAKAIT; konye emamei etuŋanan loketolomari eoŋ togoke.

¹⁹Kwabo ejaas anya ka inyamat luka asigiriakosi; ejaas da imugatin ka ebino kanukaŋ, ka akejaanakinanikon, ka ekatumunan loejaas ka ikejaanakinakakon: emamei eipud idiobore.”

²⁰ Kotema emojoŋ atiar, “Kinapakin ijo; konye kabe eoŋ eipudakon kere; konye sirikiper orot.”

²¹ Kwaŋin koyaŋa ŋes togoke, koinak asigiria anya: kilotata kesi akejenekec, konyamata, komatata da.

²² Kelakaros ikecetauon, koany, kolukut ituŋa lukore etogo, kes odwe luka Belial, konaŋanaŋata ekirigi; kotemasi kesi emojoŋ elopet etogo atiar, “Kitolom etuŋanan loaloma togokon, kajenata ŋes.”

²³ Koloma etuŋanan, elopet etogo, mamakec, kotema kes atiar, “Mam, ikainacan, keŋaiŋaito, sirikiswamata aronis naetia nen; naarai alomu etuŋanan ŋol togoka, sirikiswamata ŋun nuka abaŋaanut.

²⁴ Koany, akokuka na apese, ka abusiatake; etolomuni eoŋ kes kwana, kitisiloto yesi kes, kiswamakis kes nuitojokito yesi; konye sirikiswamakis etuŋanan ŋol ŋun nuka abaŋaanut.”

²⁵ Konye koŋeroto ituŋa apupun ŋes: kwaŋin kitiŋ etuŋanan akebusiat, koina kes; kojenutu ŋes, komunautu ŋes akuare kia kiton tupuruc: kecila kide, koosikis ŋes.

²⁶Kosodi aberu abunore kecila kide, kibirokin okek loka etogo loka etuŋanan loajai ejakaitike, aitodol naacaunia akwap.

²⁷Konyou ejakaitike tupuruc, koŋaa ikekia luka etogo, koloma alosit: ido koany, ebirokina aberu akebusiat okek loka etogo, kojaas akaninike okek.

²⁸ Kotema ŋesi ŋin atiar, “Konyou, kaloto”; konye mam yenabu Koboŋok: kosodi ŋesi adakakin ŋin asigiria; konyou etuŋanan, kolot aiboisike.

²⁹ Kedol togoke, abu kolem ekileŋ, kitiŋ akebusiat, kotubutub inerioke atutubeta atomon ka nuarei, kijuka ŋin oikorun kere luka Isirael.

³⁰ Kojaun kwanata ebe, apotu kere luapotu koanyutu ŋun kotemasi ebe, “Mam apeŋo eswamatai ibore yenetia nen, karaida aanyun, ageun kapaaran naanyounioto idwe luka Isirael kakwap nako Misiri kiton lolo: koomoomata nuke, kinerut, kolimosi.”