Read Ebaibuli 1961 Ikatubok 21 Bible Online

Ikatubok 21 - Ebaibuli 1961 bible

Ikatubok 21

¹ Apotu ituŋa luka Isirael kiyapoikinito koMisipa ebe, “Mam idio kaoni ekorakini Benyamin akokuke aimany.”

² Kopotu ituŋa Bet-el, kiboioto kanen kiton eboŋ kakonyen nuka Edeke, kodelosi, komonyata noi.

³Kotemasi atiar, “Wu EJAKAIT, Edeke loka Isirael, kanukinyo eswamaunor na kotoma Isirael, ebe lolo ateker adiopet atwaniar koIsirael?”

⁴ Kosodi kanen tupuruc, kodilokis ituŋa anyoun, kodukokis etem nen, koinakis ainakineta nuicweio ka ainakineta nuka ainapakin.

⁵ Kotemasi idwe luka Isirael atiar, “Iŋai bo kotoma atekerin kere nuka gsirael lomam abunit atukokin mama ejai EJAKAIT? Naarai apotu kiyapoikinito aiyaposit naepol kanuka ŋol lomam abunit atukokin mama ejai EJAKAIT Misipa ebe, ‘Abeit eario ŋol.’ ”

⁶Kiitut idwe luka Isirael kanuka Benyamin onacekec, kotemasi atiar, “Ejai ateker adiopet naagelar kotoma Isirael lolo.

⁷Kikonakini oni ai kidumakini ŋul luesalito aŋor, naarai kiyapo kalimito EJAKAIT ebe mam kikorakini kes adwewok aimany?”

⁸ Kotemasi atiar, “Iŋai bo adiopet kotoma atekerin nuka Isirael namam abunit mama ejai EJAKAIT Misipa?” Ido koany, amamei edio loka Yabesgilead loabunit atukokin.

⁹Naarai naemarere ituŋa, koany, amamei ediopet loka luiboienenete koYabes-gilead kanen.

¹⁰ Kijuka ekodet ituŋa ilukumin itomon ka luarei lukirigin noi, kicorak kes ebe, “Koloto kodanyata luiboiete koYabes-gilead kakwanis naka ekileŋ, kaŋor ka ludidik da.

¹¹ Iswamaete kwanata; imudiarete cut ŋolikiliokit, ka ŋiniberu naeperito kekiliokit.”

¹² Kodumut kaneejaas luiboienenete koYabes-gilead abekon akwat aoŋon, numam ajenete ekiliokit kanuka apero kaŋes: koyaŋautu kes oidukurun Silo, loejai akwap naka Kanaan.

¹³ Kijuka ekodet kere kinera kaidwe luka Benyamin luajaas moru Rimon, kolimosi ainapakin kamakec.

¹⁴Koboŋo Benyamin kapak kaŋin; kokorakis kes apesur nuetajarete kesi kaŋor nuka Yabes-gilead: konye apotu kokadata kes.

¹⁵Kiitut ituŋa kanuka Benyamin, naarai abu EJAKAIT kibwaik arorwa atekerin nuka Isirael.

¹⁶Kosodete imakio luka ekodet atemar ebe, “Kikonakini oni ai kidumakini ŋul luesalito aŋor, naarai amudiar aŋor kotoma Benyamin?”

¹⁷Kotemasi atiar, “Ibusakinit kojaun airumet naka ŋul kaluakuata luka Benyamin, kinyek ateker amwatario koIsirael.

¹⁸ Konye mam oni kipedori akorakin kes adwewok aimany: naarai eyapoikinito idwe luka Isirael ebe, ‘Kikenoi ŋol loekorakini Benyamin apese aimany.’ ”

¹⁹Kotemasi atiar, “Koany, ejai epucit loka EJAKAIT ŋolikaru Silo, loejai agolitomei naka Bet-el, ari nakokide naka erot loepol loenyouni koBet-el kiton Sekem, eŋalakimak da naka Lebona.”

²⁰Kicorakis kesi idwe luka Benyamin ebe, “Koloto, koperut komanikoria luka emusabibu:

²¹ Koanyut, ido koany, arai kelomut adwe nuka Silo ekosio okosio, ilomunete do yesi da komanikoria luka emusabibu, ikamunete yesi ŋinituŋanan akeberu kotoma adwe nuka Silo, kosodete alosit akwap naka Benyamin.

²²Kosodi naeponiata lukapapakec arai iinacanakec aosan mamakosi, kitemari isio kes ebe, ‘Kokorakinai sio kes kasianut: naarai mam kipou kademakisi kes ŋinituŋanan akeberu kojie; kwabo mam yes ipotu kokorakis kes; ti do yes kigwaut akirot.’ ”

²³ Kiswamata idwe luka Benyamin kwaŋin, koyaŋaasi aŋor, kwape ajaar etiaikec, loka ŋun kanuekosiete, nuapotu kesi koyaŋaasi: kolototo koboŋosi airumetekec, kodukoto irereia, kiboioto kotoma.

²⁴Konyout idwe luka Isirael kanen kapak kaŋin, ŋinituŋanan atekerike okekike da, kolototo kanen ŋinituŋanan airumeteke.

²⁵ Kapaarasia kaŋun amamei ekabaka koIsirael: eswamai ŋinituŋanan nuadolito kakonyeneke bon.