Read Ebaibuli 1961 Ikatubok 3 Bible Online

Ikatubok 3 - Ebaibuli 1961 bible

Ikatubok 3

¹ Nu kes atekerin nuabu EJAKAIT kinyek aigimoria kes Isirael, lumam ajenunito ijiisio kere luka Kanaan;

²Tetere aturio nuka idwe luka Isirael ejenunete, aisisianakin kes ejie, ŋun numam lem ajenunito kes sek;

³ Kes lu, ijaka ikany luka Ipilisitian, Ikanaanin kere, ka Isidonin, ka Ikibin lueboiete komoru Lebanon, ageun komoru Baal-kerumon kiton neelomarere Kamat.

⁴Araas kesi aigimoria Isirael, ajenun arai erimarete aicorakineta nuka EJAKAIT, nuecorakinit lukapapaakec kama ka Musa.

⁵ Kiboioto idwe luka Isirael kama ejaas Ikanaanin; Ekitit, ka Emorait, ka Eperisit, ka Ekibit, ka Eyebusit:

⁶ Komanyata adwekec, kokorakis odwekec adwekec, kijaanakis da idekesiokec.

⁷ Kiswamata idwe luka Isirael nueroko kakonyen nuka EJAKAIT, kimurwokisi kes EJAKAIT Edekekec, kijaanakis Ibaalim ka Asiterot.

⁸ Kanuka ŋun kinep anyunyura naka EJAKAIT aluikin Isirael, kogwela kes akan naka Kusanrisataim ekabaka loka Mesopotamia:

⁹ Kemonyata idwe luka Isirael mama ejai EJAKAIT, abu EJAKAIT kitonyoik idwe luka Isirael eketajaran, loetajari kes, ŋes Otiniel okoku loka Kenas, onac lodidi loka Kaleb.

¹⁰ Kobunok emoyo loka EJAKAIT ŋes, kotubok Isirael; koloma ejie, kijaik EJAKAIT Kusanrisataim ekabaka loka Mesopotamia akanike: kipiko ŋesi Kusan-risataim.

¹¹Kiyeŋu akwap ikar akaisaoŋon. Kotwana Otiniel okoku loka Kenas.

¹² Kiswamata bobo idwe luka Isirael nueroko kakonyen nuka EJAKAIT: kitogogoŋ EJAKAIT Egulon ekabaka loka Moab asurokin Isirael, naarai apotu kiswamata nueroko kakonyen nuka EJAKAIT.

¹³ Kotukok mamake idwe luka Amon ka Amalek; kolot kodany Isirael, kirumata ere loka idukudukun.

¹⁴ Kijaanakis idwe luka Isirael Egulon ekabaka loka Moab ikar itomon ka lukanykauni.

¹⁵ Konye kemonyata idwe luka Isirael mama ejai EJAKAIT, abu EJAKAIT kitonyoik kes eketajaran, Ekud okoku loka Gera, Ebenyamit, etuŋanan lokediany: kijukariata ŋes idwe luka Isirael kainakinet mama ejai Egulon ekabaka loka Moab.

¹⁶Abu Ekud kotatau ekileŋ loekwaka iwaitin iarei, loka aojau naka ekubit; [2] koenik toma anapitoke, otulike lokoteten.

¹⁷Kijaik ŋesi Egulon ekabaka loka Moab ainakinet: ido atumit Egulon noi.

¹⁸Kedau ainakin ainakinet, abu kotwara ituŋa luadakito ainakinet.

¹⁹ Konye abu ŋesi koboŋu kama ejaas amor nuikec nuedunyas ka Giligal, kotema atiar, “Kainunit akirot nakaiyeiyea, wu ekabaka.” Kotema atiar, “Kililiŋata.” Kolomasi ŋul kere luabwoete kaneajai ŋesi.

²⁰Kobu Ekud neajai ŋesi; eboie ŋesi bon kagolake nakokuju. Kotema Ekud atiar, “Kainunit jo akirot naka Edeke.” Konyou ŋesi koicoloŋoke.

²¹Korio Ekud akekan nakokediany kout ekileŋ kotulike lokoteten, kicum akekoik:

²²Koloma akulep da atupakin ekileŋ; korapia asiepai ekileŋ, naarai mam abu kout ekileŋ kakoikike; kipelun kopur.

²³Kosodi Ekud alomar adapao, kogolok ikekia luka agola, kigoik kes.

²⁴Kedau ŋesi alomar, kopotu ikebulesin; koanyut, ido koany, egoikino ikekia luka agola; kotemasi atiar, “Abeit imukorit akekeje kagolake naelilim.”

²⁵Kidarata aitodol naerumiata ileic; ido koany, mam abu koŋaa ikekia luka agola; kosodete do kesi alemun elacet, koŋaasi kes; ido koany, atwanit ejakaitikec kibirokina kwap.

²⁶Koku Ekud eroko kesi idarete, kotubor kamor nuikec, kokuia Seira.

²⁷ Kosodi kanen kedolu ŋesi, abu kokutak arupepe kakwap nakiukon naka Epuraim, kijesaros idwe luka Isirael kaŋes kakwap nakiukon, kiŋarenikinite ŋesi kes.

²⁸ Kotema kes atiar, “Kotupunai; naarai ejaiki EJAKAIT lukasurupokus Imoabin akanikus.” Kotupasi ŋes, kirumata idoketa luka Yorodan luebeete Moab, mam apotu kocamakis idiotuŋanan atubor.

²⁹Kodanyata kesi luka Imoabin kapak kaŋin ituŋa kwape ilukumin itomon, ŋolituŋanan lokaburon, ka ŋoltuŋanan loetitiŋ; mam ediotuŋanan abu koku.

³⁰Kitononok akan naka Isirael Moab kapaaran kaŋin, Kiyeŋ akwap ikar akaisakanykauni.

³¹ Akauloke kojau Samugar okoku loka Anat, loadanyi ituŋa akwat akanykape luka Ipilisitian kemacar lokimoŋin: abu ŋesi da kitajar Isirael.