Read Ebaibuli 1961 Ikatubok 5 Bible Online

Ikatubok 5 - Ebaibuli 1961 bible

Ikatubok 5

¹Kosodete Debora ka Barak okoku loka Abinoam ayoore kapaaran kaŋin ebe,

²“Naarai apotu ikeŋarenok kiŋarenikis Isirael, Naarai apotu ituŋa koluŋakinos ketau kaloejok, Kituroto yesi EJAKAIT!

³“Kopuputu, yes ikabakan; kitoikisi aki, yes ikapolok; Ayeikini eoŋ EJAKAIT: Ayei aiturit EJAKAIT, Edeke loka Isirael.

⁴ “EJAKAIT, nailosio koSeir, Nailomunia komanikor loka Edom, Abu akwap komaran, kodou akuj da, Eebo, apotu idouon kitodoutu akipi.

⁵ Apotu iroŋan koleleata kakonyen nuka EJAKAIT, Ijo da Sinai kakonyen nuka EJAKAIT, Edeke loka Isirael.

⁶ “Kapaarasia nuka Samugar okoku loka Anat, Kapaarasia nuka Yael, amameete ituŋa korotin lukapolok, Etorito ikalotok orotin luekudukudo.

⁷ Apotu ikayaitok koŋaŋata koIsirael, apotu koŋaŋata, Aitodol naanyounio eoŋ Debora, Naanyounio eoŋ toto kotoma Isirael.

⁸ Apotu koseut idekesio lukitetet; Kosodi ejie ajaun orutei: Atakanu kereka ebuku arai akwara Kaneajaas ilukumin akaisaoŋon luka Isirael?

⁹Eomit ekatau nuka ikayaitok luka Isirael, Luapotu kijaikinos ketau loejok kotuŋa: Kituroto yesi EJAKAIT.

¹⁰ “Kinerata ŋun, yes luibwanenito asigirian ŋul-akwaŋak, Yes luiboiete komukekan luejok noi, Ka yes da luilosete korot.

¹¹Itatamete aswamisio nuedolito nuka EJAKAIT, Aswamisio nuedolito nuka ayaiteke kotoma Isirael, Kolwana ecelet loka ikagumak, kaiboisio nuewokere akipi. Kosodete ituŋa luka EJAKAIT alosit orutei.

¹²“Kokweny, kokweny, Debora; Kokweny, kokweny, koye ekosio! Konyou, Barak, kijoreo lukijoreunokon, gjo okoku loka Abinoam.

¹³Kosodete luedeuna luka ikapolok ka ituŋa aijesun; Abu EJAKAIT kijesun kanukaŋ asurokin ikagogoŋok.

¹⁴ Kopotu kotoma Epuraim ŋul luejai aliasitikec toma Amalek; Kitupito jo, Benyamin; kotuŋakon; Kopotu ikayaitok kotoma Makir, Ka ŋul da luetiŋito ebela loka ejakait kotoma Sebulun.

¹⁵Kojaas ikapolok luka Isakar kaDebora; Kwape ajaar Isakar, ajai Barak kwaŋin; Komotaros aditot kakejeke, Kalelesia nuka Reuben Abu kojaun ainerun naepol naka itauon.

¹⁶ Kanukinyo ibu kiboikinor anukia nuka amerekekin, Aipup alamarun nuekutakinio isipanin? Kalelesia nuka Reuben Abu kojaun ainerun naepol naka itauon.

¹⁷ Abu Gilead kiboikin okekwa loka Yorodan: Dan da, kanukinyo asalakinia ŋesi ameerin? Kiboikin Aser kopala kariri naka aŋolol, Kiboikin ociletake.

¹⁸ Arai Sebulun etuŋat loabu kijaik aijarakec kiton atwanare, Naputali da, kaiboisio nuiceleleete nuka ais.

¹⁹ “Kopotu ikabakan kojioto; Kosodete ikabakan luka Kanaan ejie, koTaanak kariri naka akipi nuka Megido: Mam apotu kodumut ameda naka apesan.

²⁰ Apotu lukokuju kojioto, Apotu aacer kitijioto Sisera kotoma alositokec.

²¹ Abu ecor Kison kolelea kes cut, Ecor ŋol lokolosek, ecor Kison. Wu ekatau, kolot kagogoŋ!

²²“Kosodete imageger luka ibalasin adamac Kanuka atakar, atakar naka ikagogoŋokokec.

²³ Abala emalaika loka EJAKAIT ebe, Kikenoto yesi Meros, Kikenoto yesi noi luiboiete kotomake; Naarai mam apotu koponito aiŋarakin EJAKAIT, Aiŋarakin EJAKAIT aitiji ikagogoŋok.

²⁴ “Isirereŋio Yael adepar aŋor, Aberu naka Keber Ekenit, Isirereŋio ŋes adepar aŋor kotoma oweman.

²⁵Abu kilip ŋes akipi, koinak akile; Abu koinu ŋes akinyet katuba naejok.

²⁶Abu kitiŋ eloit kakekan, Kitiŋ da anyul naka ekeswaman kakanike nakoteten; Kibubuk Sisera kanyulike, kibubuk akouke, Eebo, abu kicum aipelor ereeteke.

²⁷Abu kokukum kakejeke, kibiror, koper: Abu kokukum kakejeke, kibiror: Neakukumio, nepenen ebirokin kotwana.

²⁸“Abu ŋin kireik kadirisa, komony, Komony toto naka Sisera kadirisa ebe, ‘Kanukinyo eyapia akegali abunore? Kanukinyo erumorotor akokoron nuka agalike?’

²⁹Apotu akeŋor nukacoa koboŋokis ŋes, Eebo, abu ŋesi alopet Koboŋok ebe.

³⁰ ‘Mam kes edumunito luŋatan, mam kes ekorokoroto luŋatan? Ŋinituŋanan apese, arai bo apesur aarei; Sisera luŋatan luka igoen luiculatai, Luŋatan luka igoen luiculatai luesonyitai, Luka igoen luiculatai luesonyitai iwaitin kere, komurisiŋa luka luŋatan?’

³¹ “Wu EJAKAIT kooliosi do lukasurupokon kere kwaŋin! Konye kosubito ŋul lueminasi ŋes bala akoloŋ naelomaria kotoma agogoŋuke.” Kiyeŋ akwap ikar akaisaoŋon.