Read Ebaibuli 1961 Ikatubok 6 Bible Online

Ikatubok 6 - Ebaibuli 1961 bible

Ikatubok 6

¹ Kiswamata idwe luka Isirael nueroko kakonyen nuka EJAKAIT: kijaik EJAKAIT kes akan naka Midian ikar ikanykaarei.

² Kipiko akan naka Midian Isirael: ido kanuka Midian kiswamaut idwe luka Isirael aŋopisia nuejaas oroŋan, ka abuai, ka abwasia nuegogoŋ.

³ Kosodi do kedau Isirael aiye ikinyom, kopotu Imidianin, ka Imalekain, ka idwe lukokide; kopotu asurokin kes.

⁴ Kidukuroto asurokin kes, komudiasi amio naka akwap, kiton Gasa, mam apotu kideut inyamat koIsirael, karaida amerekek, karaida emoŋ, karaida asigiria.

⁵Naarai aponito kibarenikec, ka iwemanakec, kopotu bala emaase kanuka aipues; komam kes ka ikaalaikec imarunos: kolomut akwap amudiar ŋes.

⁶ Kitisil Midian Isirael; komonyata idwe luka Isirael mama ejai EJAKAIT.

⁷Kosodi kanen, kemonyata idwe luka Isirael mama ejai EJAKAIT kanuka Imidianin.

⁸Kijukak EJAKAIT idwe luka Isirael enabi: kotema ŋol kes atiar, “Inera kwanata EJAKAIT, Edeke loka Isirael ebe, Abu kayau yes koMisiri, ketolom da kotogo loka ebulesene;

⁹Kayu yes kakan naka Imisirian, kakan da naka ŋul kere lukiroikinito yes, kereŋea kes kakonyenekus, kainak yes akecekwap;

¹⁰ Katema yes atiar, ‘Eoŋ EJAKAIT Ekusideke; sirikiyoŋata idekesio luka Imorain, luiboiete yesi kakwapukec’: konye mam yes irimarito ekaporoto.”

¹¹ Kobu emalaika loka EJAKAIT kiboikin kwap olua loajai Opura, loarai loka Yoas Ebieserait: ecomi okokuke Gideon alos kacues naka ebino, tetere ibwai itia Imidianin.

¹² Kitakanikin emalaika loka EJAKAIT ŋes, kotema ŋes atiar, “Ejai EJAKAIT kajo, ijo etuŋanan lokirigi loititiŋ.”

¹³ Kotema Gideon ŋes atiar, “Wu ekajakait, arai ejai EJAKAIT kasio, kanukinyo do kidoikinioto sio nu kere? Ai bo ejaas akeswamisio kere nukaumokin nuapotu lukapapaakosi kolimonokis sio ebe, ‘Mere kereka EJAKAIT kiyaŋauni sio koMisiri?’ Konye kwana kicaka EJAKAIT sio, kijaik sio akan naka Midian.”

¹⁴ Kite EJAKAIT ŋes, kotema atiar, “Kolot kagogoŋukon na, kitajar Isirael kakan naka Midian: mere eoŋ kejuka jo?”

¹⁵ Kotema ŋes atiar, “Wu EJAKAIT, ekonakini ai etajari Isirael? Koany, erai ekakek loicana noi kotoma Manase, eoŋ da adite noi koka loka papaka.”

¹⁶ Kotema EJAKAIT ŋes atiar, “Abeit ajaun kajo, iari Imidianin bala ediopetuŋanan.”

¹⁷ Kotema ŋes atiar, “Arai adumunit asianut kakonyenekon, kitodikinai aanyunet naitogogoŋi ebe ijo ŋopeŋol kinera keoŋ.

¹⁸ Keŋaiŋait, sirikinyou kane, aitodol naaboŋunio, ayaŋaun ainakineteka, aibwaikin akonyenekon.” Kotema atiar, “Edareuni aitodol naiboŋunio ijo.”

¹⁹Koloma Gideon, kitemok ikalol, ka imugatin lumam itubuunitoi luka epa [3] loka akiria; kibwaik akiriŋ odita, kibwaik da acece amot, koinu kes kokwap kelua, koinak ŋes.

²⁰ Kotema emalaika loka EJAKAIT ŋes atiar, “Kolem akiriŋ ka imugatin lumam itubuunitoi, kidokok kes amoru na, kobukok acece.” Kiswama ŋesi kwaŋin.

²¹ Kosodi emalaika loka EJAKAIT aikeun ebelake loetiŋit, kotiroria akiriŋ ka imugatin lumam itubuunitoi; kolom akim kamoru, konyam akim akiriŋ ka imugatin lumam itubuunitoi; konyou emalaika loka EJAKAIT kakonyeneke.

²² Koany Gideon ebe ŋes emalaika loka EJAKAIT; kotema Gideon atiar, “Wu okwe, EJAKAIT Edeke! Naarai aany emalaika loka EJAKAIT keteosi.”

²³ Kotema EJAKAIT ŋes atiar, “Kinapakin; sirikuriana; mam jo itwani.”

²⁴ Kosodi Gideon adukokin EJAKAIT etem nen, komaik ŋes Yawe-salom: [4] kiton lolo eroko ejai Opura loka Ibieserain.

²⁵ Kosodi kanen akuare ŋin, kotema EJAKAIT ŋes atiar, “Koyaŋa emoŋ loka papakon, ka emoŋ lokiareit loka ikar ikanykaarei, kotiyaik etem loka Baal loejai papakon, Kojep Asera loidunyas kaŋes.

²⁶Ido kodukok EJAKAIT Ekonideke etem kuju kabwas kana, kopone kaloejok, koyaŋa emoŋ lokiareit, koinak ainakinet naicweio kakito nuka Asera loijepi.”

²⁷ Kosodi Gideon ayaŋaar ituŋa itomon kotoma ikejaanakinakake, kiswama kwape abalar EJAKAIT ŋes: kosodi naarai akuriana ŋesi ekal loka papake ka ituŋa lukore, mam abu kopedo aswam ŋun paaran, kiswama kuare.

²⁸Kenyoutu ituŋa lukore tupuruc sek, koany, atiyaikina etem loka Baal, Asera da loedunyas kaŋes ajepitai, ka emoŋ lokiareit aponi koinakinai otem loadukitoi.

²⁹Kotemanaros ebe, “Iŋai bo iswamat akirot na?” Kosodete keŋicata, kiŋitanasi da, kotemasi atiar, “Gideon okoku loka Yoas ŋes iswamat ŋin.”

³⁰ Kosodete ituŋa lukore atemar Yoas atiar, “Kitolom okokukon, kotwana: naarai atiyaiki etem loka Baal, naarai ajep da Asera loedunyas kaŋes.”

³¹Kotema Yoas kere luabwoikinito ŋes atiar, “Irabakinete yesi Baal? Arai bo itajarete yesi ŋes? Ŋol loirabakini ŋes, eario eroko atupuruc: arai erai edeke, kirabakin bon, naarai atiyaiki ituŋanan eketem.”

³²Komaik do ŋes kapaaran kaŋin Yerubaal,[5] ebe, Kirabata Baal kaŋes, naarai atiyaiki etemuke.

³³ Kosodete Imidianin kere ka Imalekain ka idwe lukokide atukonokin; kotuboros, kidukuroto aditot naka Yesereel.

³⁴ Konye kodoik emoyo loka EJAKAIT Gideon; kokut arupepe; kotukokin Abieser aitup ŋes.

³⁵Kijuka ikiyakia anatar Manase kere; kotukokinos kesi da aitup ŋes: kijuka ikiyakia mama ejai Aser, ka Sebulun, ka Naputali da; kopotu ŋul airiamun kakes.

³⁶Kotema Gideon Edeke atiar, “Arai itajari ijo Isirael kakanika, kwape ibu kotemaria.

³⁷ Koany, ebwaikini emukule loka ajul opejal; arai kejaunos akopyo omukule bon, kookito alup kere, ajenuni do eoŋ ebe itajari ijo Isirael kakanika, kwape ibu kotemaria.”

³⁸Kojaun kwaŋin: naarai abu ŋesi kodilok anyoun tupuruc, konunuk emukule, kocu akopyo komukule, kilelebunos akip atany.

³⁹ Kotema Gideon Edeke atiar, “Kinyek anyunyurakon ainepun aluikin eoŋ, mere kener irwan na atipet bon: keŋaiŋait, kegimo irwan na bon kemukule; koonite do emukule bon, konye kojaunos akopyo alup kere.”

⁴⁰Kiswama Edeke kwaŋin akuare ŋin: naarai aonit emukule bon, konye kojaas akopyo alup kere.