Read Ebaibuli 1961 Ikatubok 8 Bible Online

Ikatubok 8 - Ebaibuli 1961 bible

Ikatubok 8

¹ Kotemasi ituŋa luka Epuraim ŋes atiar, “Kanukinyo kikonakinia ijo sio kwana, mam ibu konyarau sio nailosio aitiji Midian?” Kitoŋolopata ŋes noi.

²Kotema kes atiar, “Eswama anyoika adepar yes? Mere ejokuka luideunos luka imusabibun luka Epuraim adepar luedeŋete luka Abieser?

³ Ejaiki Edeke ikapolok luka Midian, Oreb ka Seeb, akanikus: anyoika nuabu eoŋ kapedo aswam adepar yes?” Kosodi konyet anyunyurakec aiŋoŋar, kedau ŋesi einer ŋun.

⁴Kobu Gideon Yorodan, kodoka ŋesi ka ituŋa akwat auni luajaas kaŋes, kopasito, konye kodapito.

⁵ Kotema ŋesi ituŋa luka Sukot atiar, “Keŋaiŋait, koinakisi ituŋa lukatupito eoŋ imugatin; naarai epasito, ido adapit eoŋ Seba ka Salumuna, ikabakan luka Midian.”

⁶ Kotemasi ikapolok luka Sukot atiar, “Ejaas kereka akanin nuka Seba ka Salumuna kwana akanikon, tape sio kiinakini ajorekon imugatin?”

⁷Kotema Gideon atiar, “Kanuka ŋun kedau EJAKAIT aijaikin Seba ka Salumuna akanika, apoopoi eoŋ akusiwat kikukwa luka amodiŋ ka ikodokodo.”

⁸ Konyou kanen kolot Penuel, kiner kakes kopone kaŋol; koboŋokis ŋes ituŋa luka Penuel kwape aboŋokinioto ituŋa luka, Sukot.

⁹ Kotema ŋesi ituŋa luka Penuel atiar, “Naaboŋunio kainapakin, atiyaikin etogo lo loeoja noi.”

¹⁰ Ajaas Seba ka Salumuna Karikor, ka ajoresiokec kakes, ituŋa ilukumin itomon ka lukany, ŋul kere luedeuna luka ajore kere naka idwe lukokide: naarai apotu ituŋa ilukumin akwatat ka akaisaarei luautunito ikileŋa kotwakata.

¹¹ Kolot Gideon korot loka ŋul kalueboiete koweman kari nakokide naka Noba ka Yogibeka, kodany ajore; naarai etumoro ajore.

¹² Kokerata Seba ka Salumuna; kodapa kes; kikam ikabakan iarei luka Midian, Seba ka Salumuna, kitubur ajore kere.

¹³Koboŋ Gideon okoku loka Yoas kojie anyoun kaneedokarere Keres.

¹⁴Kikam ŋesi ekatumunan lokituŋa luka Sukot, kiŋit ŋes: kitejen ŋes ikapolok luka Sukot ka imakioke, ituŋa akaisakanykaarei ka lukanykaarei.

¹⁵Kobu neajaas ituŋa luka Sukot, kotema atiar, “Koanyutu Seba ka Salumuna, lukisekelooto yesi eoŋ ebe, Ejaas kereka akanin nuka Seba ka Salumuna akanikon, tape sio kiinakini ikonituŋa luepasito emugati?”

¹⁶Koyaŋa imakio lukore, ka ikukwa luka amodiŋ ka ikodokodo, kopoopoia ituŋa luka Sukot.

¹⁷ Kotiyaik etogo loeoja noi loka Penuel, koar ituŋa lukore.

¹⁸ Kosodi ŋesi atemar Seba ka Salumuna atiar, “Aputos biai ituŋa luiarete yesi koTabor?” Koboŋokis ebe, “Kwape iputor ijo, kesi da kwaŋin; ŋinituŋanan kakesi aputos kidwe luka ekabaka.”

¹⁹Kotema atiar, “Araas kesi ikainacan, odwe luka totoka; kwape ejaria EJAKAIT, arai kitajarito yesi kes, ti mam eoŋ kaar yes.”

²⁰Kotema ŋesi Yeter ekiyaike atiar, “Konyou, koar kes.” Konye mam abu ekatumunan kout ekekileŋ: naarai akuriana, naarai ariŋa erai ekatumunan.

²¹ Kosodete Seba ka Salumuna atemar ebe, “Konyou ijo, koar sio: naarai kwape ejaar etuŋanan, akegogoŋ da ejai kwaŋin.” Konyou Gideon, koar Seba ka Salumuna, koyaŋa apelia nuajaas omurisiŋa luka ikaalaikec.

²²Kosodete ituŋa luka Isirael atemar Gideon atiar, “Koyaai ijo sio, ijo ka okokukon, ka okoku loka okokukon da: naarai kitajar ijo sio kakan naka Midian.”

²³ Kotema Gideon kes atiar, “Mam akoto ayait yes, karaida okokuka ayait yes: EJAKAIT ŋes kiyai yes.”

²⁴ Kotema Gideon kes atiar, “Ejai naakoto ailip yes, koinakinai ŋinituŋanan itetioke luŋatuna.” (Naarai ajaas kes itetio, naarai araas Isimaelin.)

²⁵Koboŋokis ebe, “Kiinakini kes ketau kaloejok.” Kopesikis egoe, kocakanakis nen ŋinituŋanan itetioke luŋatuna.

²⁶Alaŋiru naka itetio luka esabu luabu kilip arai isekelin [7] elukumit ka akwat akanykaarei luka esabu; kogelara apelia, ka luidelos, ka inapen lumugeik luanapito ikabakan luka Midian, kogelara da irikoi luajaas omurisiŋa luka ikaalaikec.

²⁷ Kiswamau Gideon kes epod, [8] kibwaik oreke, Opura: kolot Isirael kere ŋina eporo mamakeŋ: koraun do atacit mama ejai Gideon ka ekaleke.

²⁸Kwaŋin kitononokata idwe luka Isirael Midian kakonyenekec, mama bobo apotu kikeut akecekwes. Kiyeŋ akwap kapaarasia nuka Gideon.

²⁹Kolot Yerubaal okoku loka Yoas kiboikin togoke.

³⁰ Ajaas Gideon odwe luaurie ŋesi akaisakanykaarei: naarai epu ŋes aŋor.

³¹Abu akebusiat naajai Sekem kourik ŋes esapat, komaik ekekiror Abimelek.

³² Kotwana Gideon okoku loka Yoas kedau aibut ejok, kidaikinai ates naka Yoas papake, toma Opura loka Ibieserain.

³³ Kosodi atipet ketwana Gideon, kibelokinos idwe luka Isirael bobo, koloto eporo mama ejaas Ibaalim, kitaraut Baal-berit edekekec.

³⁴ Mam idwe luka Isirael apotu kiitut EJAKAIT Ekecedeke, loayuun kes kakanin nuka lukasurupokec kere kaŋoliwai:

³⁵ Karaida aikonakin kasianut ekal loka Yerubaal, ŋes Gideon, kwape ejaatar nukajokak kere nuabu ŋesi kikonak Isirael.