Read Ebaibuli 1961 Ikatubok 9 Bible Online

Ikatubok 9 - Ebaibuli 1961 bible

Ikatubok 9

¹ Kolot Abimelek okoku loka Yerubaal Sekem mama ejaas iinacan luka totoke, kiner kakes, ka ekek kere loka ekal loka papa loka totoke, atiar,

² “Keŋaiŋaito, kinerata kaki kere nuka ituŋa luka Sekem ebe, ‘Arai kijokikinito yes odwe kere luka Yerubaal luimwaasi ituŋa akaisakanykaarei, ayaite yes, arai bo ediopet ayaite yes?’ Kiitutu da ebe arai eoŋ akoitikus ka akiriŋikus.”

³ Kinerata iinacan luka totoke nukeŋ aki kere nuka ituŋa luka Sekem akiro ŋun kere: kokotos ikecetauon atupar Abimelek; naarai abalas ebe, “Erai onacewok.”

⁴ Koinakis ŋul ŋes atutubeta akaisakanykaarei nuka epuesa nualemunete kotogo loka Baal-berit, nuabu Abimelek koropia ituŋa luutai luebenen, luatupito ŋes.

⁵ Kolot Opura ore loka papake, koarak ikeinacan odwe luka Yerubaal, luemwaasi ituŋa akaisakanykaarei, amoru adiopet: konye kideun Yotam eŋoorit loka Yerubaal; naarai abu koŋop.

⁶Kotukokinos ituŋa kere luka Sekem, ka ekal kere loka Milo, koloto kitaraut Abimelek ekabaka, kaneedunyas kelua loka epir loajai Sekem.

⁷ Kelimokin Yotam ŋun, abu kodoka aibwo aidi naka moru Gerisim, kodelo, kiworo, kotema kes atiar, “Kopupunoi, yes ituŋa luka Sekem, tetere Edeke kipupuni yes.

⁸ Kolosek apotu ikito koloto ainyonyoikin ekabaka akinyet ayaite kes; kotemasi eseitun atiar, ‘Koyaai ijo sio.’

⁹ Konye kotema eseitun kes atiar, ‘Enyeini kereka eoŋ akinyeteka naitopolonorere Edeke ka ituŋanan, kasodi alosit aijaŋijaŋa kokito?’

¹⁰Kotemasi ikito etini atiar, ‘Bia ijo koyaai sio.’

¹¹Konye kotema etini kes atiar, ‘Enyeini kereka eoŋ akajijim, ka araitoka nukajokak, kasodi alosit aijaŋijaŋa kokito?’

¹²Kotemasi ikito emusabibu atiar, ‘Bia ijo, koyaai sio.’

¹³Kotema emusabibu kes atiar, ‘Enyeini kereka ebinoka, loitalakarit Edeke ka ituŋanan, kasodi alosit aijaŋijaŋa kokito?’

¹⁴Kosodete ikito kere atemar etirir atiar, ‘Bia ijo, koyaai sio.’

¹⁵ Kotema etirir ikito atiar, ‘Arai kinyonyoikinete yesi eoŋ akinyet kotoma abeit araun ekabakakus, kopotu do komunokinos etolimika: arai bo mam, kolom do akim kotirir, konyama iresia luka Lebanon.’

¹⁶ “Aso do, arai iswamato yesi kabeit ka nuetenito, aitaraun Abimelek ekabaka, arai da iswamakinito yesi Yerubaal ka ekaleke nuejok, ido kiswamakinito ŋes kwape ibusakinitor nueswamat:

¹⁷(Naarai abu papaka kojiik yes komam epod aijarake, koyu da yes kakan naka Midian:

¹⁸Inyoutu do yesi lolo asurokin ekal loka papaka, iarakis odweke, ituŋa akaisakanykaarei, amoru adiopet, itarautu da Abimelek okoku loka abusiatake ekabaka loeyait ituŋa luka Sekem, naarai erai onacekus;)

¹⁹ Arai iswamakinito yesi Yerubaal ka ekaleke lolo nukabeit ka nuetenito, kolelata do yesi kotoma Abimelek, ŋesi da kolele kotomakus:

²⁰Konye arai mam, kolom do akim kotoma Abimelek, konyama ituŋa luka Sekem, ka ekal loka Milo; kolom da akim kotoma otuŋa luka Sekem, kotoma okal loka Milo, konyama Abimelek.”

²¹ Kosi Yotam, koker, kolot Beer, kiboi kaŋina, kanuka akurian Abimelek onaceke.

²²Kopolok Abimelek Isirael ikar iuni.

²³ Kijuk Edeke emoyo loerono kidiŋ Abimelek ka ituŋa luka Sekem; kiswamakis ituŋa luka Sekem Abimelek nuka aiŋal:

²⁴ Tetere edolete nukadedeŋ nuaponi kiswamakinai odwe akaisakanykaarei luka Yerubaal, tetere da itebeo aokotokec Abimelek onacekec, loaari kes, itebeo da ituŋa luka Sekem, luetogogoŋete akaninike aiar iinacanake.

²⁵Kibwaikis ituŋa luka Sekem ikaperunok ŋes aidia nuka iroŋan, koŋatata kere luetorete orot ŋol: kolimokinai Abimelek.

²⁶Kobu Gaal okoku loka Ebed ka iinacanake, koloto Sekem: komunokinos ŋes ituŋa luka Sekem.

²⁷ Kolomasi omanikor, kodeŋoto imusabibunukec, kicakacakata imusabibun, kipooto epucit, kolomasi togo loka edekekec, konyamata komatata, kikenoto Abimelek.

²⁸ Kotema Gaal okoku loka Ebed atiar, “Iŋai bo Abimelek, iŋai da Sekem, tape sio kijaanakini ŋes? Mere ŋes okoku loka Yerubaal? ka Sebul ekiyakiake? ijaanakinete yesi ituŋa luka Kamor papa loka Sekem: konye sio kanukinyo tikijaanakinia ŋes?

²⁹ Karai kejaas ituŋa lu akanika! Tikalema Abimelek.” Kotema ŋesi Abimelek atiar, “Kiyatak akonijore, kolom.”

³⁰Kepupu Sebul ekayaiton ere akiro nuka Gaal okoku loka Ebed, abu akenyunyura kinep.

³¹Abu kijukak Abimelek ikiyakia kaiyeiyea ebe, “Koany, apotu Gaal okoku loka Ebed ka ikeinacan Sekem; ido koany, etiŋaikis ere asurokin jo.

³²Aso do, konyou kuare, ijo ka ituŋa luejaas kajo, koperut kamanat:

³³ Kosodi tupuruc, atipet naeniunia akoloŋ, kodilok ijo anyoun asurokin ere: ido koany, kelomut ŋesi kituŋa luejaas kaŋes asurokin jo, iswamakini do ijo kes kwape itojokia.”

³⁴Konyou Abimelek kuare, ka ituŋa kere luajaas kaŋes, koperut Sekem korioŋeta iwoŋon.

³⁵Koloma Gaal okoku loka Ebed, kobwo korute kaneelomarere ore: konyou Abimelek ka ituŋa kere luajaas kaŋes kaneaperunitotor.

³⁶ Nakeanyunia Gaal ituŋa, kotema ŋesi Sebul atiar, “Koany, ijesuna ituŋa kaidia nuka iroŋan.” Kotema Sebul ŋes atiar, “gseseni ijo etolim loka iroŋan kosubite bala ituŋa.”

³⁷Kinera Gaal bobo ebe, “Koany, ijesuna ituŋa kokidiŋ kakwap, itorunit erioŋet ediopet orot loka elua loka Meonenim.”

³⁸ Kosodi Sebul atemar ŋes atiar, “Ai bo kwana ejai aitukukon, naibalar ebe, ‘Iŋai bo Abimelek, tape sio kijaanakini ŋes?’ Mere ŋul ituŋa luimwaŋit ijo? Keŋaiŋait, koloma cabo do kitiji kes.”

³⁹Koloma Gaal kakonyen nuka ituŋa luka Sekem, kitiji Abimelek.

⁴⁰Kodap Abimelek ŋes, koker kakonyeneke, kibiroros luipu luemusuŋitai, kiton neelomarere orute.

⁴¹Kiboikin Abimelek Aruma: kireŋea Sebul Gaal ka iinacanake, kinyeis aiboi koSekem.

⁴²Kosodi kanen, kapaaran naatupakini kolomas ituŋa amanat; kolimokis kesi Abimelek.

⁴³Koyaŋa ituŋa, kotiak kes kotoma orioŋeta iuni, koperut kamanat; kosesen, ido koany, kolomut ituŋa kore; konyou asurokin kes, kodany kes.

⁴⁴Kokubokinos Abimelek ka irioŋeta luajaas kaŋes, kobwaata korute kaneelomarere ore: kokerata irioŋeta iarei neajaas ŋul kere luajaas amanat, kodanyata kes.

⁴⁵ Kitiji Abimelek ere apaaran ŋin kere; kirum ere, koar ituŋa luajaas toma; kotiyatiya ere, koyeik abalaŋ.

⁴⁶ Kepuputu ituŋa kere lukore loeoja loka Sekem ŋun, apotu kolomasi abur nakotogo loka El-berit.

⁴⁷Kolimokinai Abimelek ebe etukokina ituŋa kere lukotogo loeoja loka Sekem.

⁴⁸ Kodoka Abimelek moru Salumon, ŋes ka ituŋa kere luajaas kaŋes; kitiŋ aep kakanike, kojep atenu kokito, kitiŋ ŋes, kibwaik okeperike: kotema ituŋa luajaas kaŋes atiar, “Nuianyutu eoŋ eswamai, kisunyito yesi da, kiswamata kwape kwaŋin.”

⁴⁹Kosodete ituŋa kere ajepun ŋinituŋanan aketenut, kotupasi Abimelek, kogaŋata kes abur, kinokokis akim aicweia abur; kotwakata do ituŋa kere lukotogo loeoja loka Sekem, kwape elukumit, ikiliok ka aŋor.

⁵⁰ Kosodi Abimelek alosit Tebes, kidukur asurokin Tebes, kirum ŋes.

⁵¹Konye ajai etogo loeoja loagogoŋ toma ore, apotu ikiliok ka aŋor kere kokereasi ŋina, ka ŋul kere lukore, kogoloros kotoma, kodokasi oswi loka etogo loeoja.

⁵²Kobu Abimelek togo loeoja, kitiji ŋes, kikunyak okek loka etogo loeoja aicwe ŋes.

⁵³ Abu aberu adiopet kocakak atapen akou naka Abimelek, kobwaŋ abelekek naka akouke.

⁵⁴ Kosodi ŋesi anyaraun katipet ekatumunan loadakit lujiisike, kotema ŋes atiar, “Kout ekileŋikon koar eoŋ, kinyeis ituŋa atemar ebe, ‘Aberu aari ŋes.’ ” Kicum ekatumunanike ŋes aipelor, kotwana.

⁵⁵Keanyut ituŋa luka Isirael ebe atwana Abimelek, koloto ŋinituŋanan aiboisike.

⁵⁶ Kwaŋin abu Edeke kinyaŋ aronis naka Abimelek, naabu kiswamak papake, kanuka aiar iinacanake akaisakanykaarei.

⁵⁷Aronis kere naka ituŋa luka Sekem abu Edeke kinyaŋ kakwesikec: abu kobunok kes ekenit loka Yotam okoku loka Yerubaal.