Read Ebaibuli 1961 3 Yokana 1 Bible Online

3 Yokana 1 - Ebaibuli 1961 bible

3 Yokana 1

¹ Eoŋ ekimat ewadikakini Gaio lominat, loamina kotoma abeit.

² Lominat, kelipak jo ajaut ejok kakiro kere, koŋale da, kwape ejaar akoniijar ejok.

³Naarai abu keyalama noi naadolunioto iinacan kitejenut da abeitekon; kwape ilosenenoo kotoma abeit.

⁴Emamei eoŋ aiyalama naepol adepar na, apupun ebe elosenenete ikadwe kotoma abeit.

⁵Lominat, iswamai aswam namunot naiswamakini iinacan ka ipejok da,

⁶ lukitejenut akonimin kakonyen nuka ikanisan. Iswamakini kes ejok ainyamakin kes kwape ibusakinitor Edeke.

⁷ Naarai alomasi kesi kanuka Ekiror, komam ijaunito ibore kama ka ikapirin.

⁸ Aso kiburao oni aisukunyun luikote nen, tetere kiraun ikeswamak lukaupakec kotoma abeit.

⁹Abu kewadikak ekanisa ece; konye Dioterepes loekot aiŋarenikin mam abu kisukunyik sio.

¹⁰Kanuka ŋun, arai kabu, esiituni akeswamisio nuiswamai; kidacanakini sio akiro nueroko, Komam ŋun edaunete ŋes, eŋeri ŋesi aisukunyun iinacan, itikokini da ŋul luekotosi aisukunyikin kes, ireŋeari kokanisa.

¹¹ Lominat, siriroki nueroko, dimarai nuejok, Yeniswamai nuejok erai yenika Edeke; yeniswamai nueroko mam eanyunit Edeke.

¹² Itejenunete ituŋa kere nuka Demeterio, itejenuni da abeit alopet; isio da kitejenuni, ido ijeni ebe erai aitejenunikosi nakabeit.

¹³ Ajaas eoŋ nuipu aiwadikakin jo, konye mam akoto aiwadikakin jo kebwino ka akwara;

¹⁴konye amuno aanyun jo katipet, kenerata kaituke.

¹⁵Kojai ijo ainapakin. Kiyogaete jo ipapero. Kiyoga ipapero kwape ejaatar ikiroriakec.