Read Ebaibuli 1961 Yuda 1 Bible Online

Yuda 1 - Ebaibuli 1961 bible

Yuda 1

¹ Yuda, ebulesit loka Yesu Kristo, onace loka Yakob, Mama ejaas luenyaritai, luminan toma Edeke Papa, luericakinitai Yesu Kristo:

² Kiyatanakin aitim mamakus, ka ainapakin, ka amin da.

³ Luminan, eswamai kadunyanut kere aiwadikakin yes nuka aitajariowok nakimori, ketiŋaikinitai aiwadikakin yes kecor yes aut noi kanuka aiyuun naainakinitai lukalaunak irwan atipet bon.

⁴ Naarai alomut icetuŋa kaiyeiyea, lukiwadikatai sek alomar otube lo, ituŋa lumam eyoŋito Edeke, luilocete asianut naka Edekewok araun abenyanut, eŋerete da Ekapoloniwok ediopet bon Ejakait Yesu Kristo.

⁵ Konye akoto aisiitun yes karaida ijenut kere atipet bon, ebe kedau Ejakait aitajar ituŋa kakwap nako Misiri, akaulo kaŋun abu komudialumam eyuunito.

⁶ Imalaikan da lumam apotu koricata ayaitekec, konye kinyeis akeceibois kikulepek, abu ŋesi kidar korikoi lumam edaunos kamuton kiton atubokinio naka apaaran nakapolon.

⁷ Kwape ka Sodom ka Gomora, ka ireria da luerimorito kes, luapotu koluŋakinos adoteanut kopone loka ŋul, kotupata acekuan, ibwaikinitai araut aanyunet, iticanio kakim naka ikar kere.

⁸ Konye kopone kaŋol ituŋa lu da kairujasiakec emunaarete akuan, Kerete ayaio, emoromoroete da lukaibuses.

⁹ Konye nakeŋolopatar Mikael emalaika lokapolon kaSatan, epegas kanuka akuan naka Musa, mam abu koneikin aosan ŋes katubokinio nakamoromor, konye kobala ebe, “Kitoron Ejakait jo,”

¹⁰ Konye ituŋa lu emoromoroete ŋun kere numam ejenete, konye ŋun nuejenete kaurunet, kwape itiaŋ luemamei acoa, kaŋun emudiario kes.

¹¹ Itukwi kes! Naarai elosete korot loka Kain, kokubokinos kapaar naka Balaam, kanuka eropit komudiarai kopeget loka Kora.

¹² Eraas lu amor numam etakanete kopucinokus luka aminanar, emorete kayes komam ekuriaka, icokiete bonik; idouon luemameete akipi luekutarete ikwamin; ikito luka akamu luemameete araito, luatwaka irwan aarei, luarutuno;

¹³ akailan nuededeŋ nuka aŋolol, nuekuete ekuetete, lokileieikec; aacer nuepaarete nuidarakinitai amuton nairiono cucucuc kiton ikar kere.

¹⁴ Konye nuka ŋul abu Enok da, lokikanyetekaarei anyoun ka Adam, kodwarakinite ebe, “Koany, ebunit Ejakait nepepe ka lukalaunakake ilukumin itomon,

¹⁵ aiswamakin kere etube, ka aitoron da kere lumam eyoŋito Edeke kanuka aswamisiokec kere nuka amamus ayoŋit Edeke, ido kanuka akiro kere nueninik nuenerata ikadiakanarak lumam eyoŋito Edeke asurokinia ŋes.”

¹⁶ Eraas lu ikerurumak, ikaŋuurianak, luelosete kwape ejaar aiŋobelekec, ineras da aitukekec akiro nukasoga, emaete ituŋa adumunia ameda.

¹⁷ Konye yes luminan, kiitut akiro nukolo kinerata ikiyakia luka Ejakaitiwok Yesu Kristo;

¹⁸ apotu kolimokis yes ebe, “Kapak nakawasia ejaunete ikesekelok, luelosete kwape ejaar aiŋobelekec nakamamus ayoŋit Edeke.”

¹⁹ Eraas lu lueyaunete atiakatiak, luka aijar kana, luemamei Emoyo.

²⁰ Konye yes, luminan, kodukonoros kaiyuunikus nakalaunan noi, kilipenenete kOmoyo Lokalaunan,

²¹kidaras bonik toma amin naka Edeke; kidareut aitim naka Ejakaitiwok Yesu Kristo kiton aijar naka ikar kere.

²²Kitimoto ice, luebuonokinos;

²³ kitajarata ice, kouruput kotoma akim; kitimoto ice kakurian, kolaata anapito da naejai elos loka akuan.

²⁴ Mama ejai ŋol loepedori aidar yes kinyeis aiguikin, kaisibwo yes kakonyen nuka aibusesuke komamei aitoronet, kaiyalama naepol noi,

²⁵ mama ejai Edeke ediopet bon, Eketajaraniwok kanuka Yesu Kristo Ejakaitiwok, kojai aibuses, ka apedor, ka ailerit, ka apolou da, ageikin ikar kere, tinenikwana da, ido kiton ikar kere. Amen.