Read Ebaibuli 1961 Apukokino 12 Bible Online

Apukokino 12 - Ebaibuli 1961 bible

Apukokino 12

¹Kotakan aanyunet naepol kotoma akuj, aberu naenapit akoloŋ, kojai elap kwap kakejeke, kojai da aboko naka aacer atomon ka nuarei akouke;

² kepotiei, kodelo karieboke naka aidoun, kikilianar aidoun.

³ Kotakan aanyunet ace toma akuj, ido koany, apiu naepol naereŋ, kojaas kakwes akanykaarei ka amumwara atomon, kojaas da amekemeken akanykaarei akwesike.

⁴ Kiria ekorike atutubet nakiwuniet naka aacer nuka akuj, kocakak kes toma akwap, Kobwo apiu kakonyen nuka aberu naekoto aidoun, tetere naedounio ikokuke konyamari.

⁵ Kidou ŋesi ikoku yenisapat, yenekoto acok atekerin kere kebela loka asuat, konye kouruporoi ikokuke mama ejai Edeke, ido mama ejai eicoloŋoke.

⁶ Koker aberu toma amodiŋ, naejai aibois naitemokinit Edeke ŋes, tetere itanete ŋes kanen apaarasia alukumit ka akwat aarei ka akaisakanykape.

⁷ Kojau ejie toma akuj, kitiji Mikael ka ikemalaikan apiu. Koji apiu ka ikemalaikan,

⁸komam ipikorete, kwabo mam bobo etakanuna aiboisikec kotoma akuj.

⁹ Kocakarai apiu ŋin naapol, emun ŋol lokolo sek, loenyaritai Ekejodijodon, ka Satan da, ekeŋalaaran loka akwapin kere, kocakakinai toma akwap, kocakakinai da ikemalaikan nepepe kaŋes.

¹⁰ Kapup eporoto loepol kotoma akuj, loabala ebe, “Adol kwana aitajar, ka apedor, ka ajakanut naka Edekewok, ka apolou naka Kristoke, naarai acakar loirupei iinacanawok, loirupei kes kakonyen nuka Edekewok, paaran ka akuare da.

¹¹ Ipikorete ŋul da kanuka aokot nuka Imerekek, ido kanuka akirot naka aitejenunetekec; komam eminasi aijarakec kiton atwanare.

¹² Kanuka ŋun, kolel, ijo akuj, ka yes da luiboiete kotomake! Itukwi akwap ka aŋolol, naarai ejesun ekejodijodon mamakus, ejai kanyunyura naepol, naarai ejeni ebe edit akepak!”

¹³Naaanyunia apiu ebe acakar ŋes toma akwap, komeja aberu naedouni ikoku yenisapat.

¹⁴ Koinakinai aberu abebenoka aarei nuka emorukaalet loepol, tetere eporori adolore toma amodiŋ, toma aiboisike, naitanere apak, ka apakio, ka atutubet naka apak, kotoma akonyen nuka emun,

¹⁵Kolek emun akipi kotoma aitukuke kwape ecor, kakonyen nuka aberu, tetere eyaŋaarete akip aberu.

¹⁶Kiŋarak akwap aberu, kooŋ akwap akeituk, komataa ecor loalekuni apiu kotoma aitukuke.

¹⁷ Konyunyurik apiu aberu, kolot aitiji lukaurike luesalito, luericito aicorakineta nuka Edeke, luejai aitejenunet naka Yesu, Kobwo kotoma asiŋe naka aŋolol.