Read Ebaibuli 1961 Apukokino 14 Bible Online

Apukokino 14 - Ebaibuli 1961 bible

Apukokino 14

¹ Kasodi kaany, ido koany, kobwoi Imerekek komoru Sion, ka ituŋa ilukumin akwatat ka akaisaoŋon ka luoŋon nepepe kaŋes, luiwadikatai ekirorike, ka ekiror loka Papake oreetakec.

² Keira da eporoto loebuni kotoma akuj bala eporoto loka akipi nukepuak, bala da eporoto loka agiro naepol; eporoto da loabu keira kosubite bala eporoto loka ikaramak lueramete adeudeunokec.

³ Koyeete ekosio lokitetet koiŋaren keicoloŋ, kakonyen da nuka ikajarak luoŋon, ka imakio. Kwabo emamei ituŋanan yenepedori aisisiaun ekosio ŋol, dimarai ŋul ilukumin akwatat ka akaisaoŋon ka luoŋon, lualakunio kotoma akwap.

⁴ Ŋul kes lumam emunaara kama ejaas aŋor naarai eraas ibekon; ŋul kes luetupito Imerekek kama elosi kere; ŋul kes lualakunio kotoma otuŋa araut araito nugeet nuka Edeke, ka nuka Imerekek,

⁵ ido mam edumuna aimod kaitukekec, naarai emamei kes aitoronet.

⁶ Kasodi kaany emalaika ece eporitoi kokidiŋ kakuj, ejaas Akiro Nukajokak nuka ikar kere alimonokin luiboiete kotoma akwap, luka ŋinijena, ka ateker, ka aŋajep, ka ituŋa da;

⁷ kobala keporoto loepol ebe, “Koyoŋito Edeke, kiturito ŋes, naarai adol esawa loka aitubuke, komaata ŋol lokesubi akuj; ka akwap ka aŋolol, ka atanin da nuka akipi.”

⁸ Kotupak emalaika ece, lokiareit, kobala ebe, “Ebiror, ebiror Babulon lokapolon, loetamasi atekerin kere ebino loka adedeŋ naka adoteuke.”

⁹ Kotupak da emalaika ece, lokiwuniet, kobala keporoto loepol ebe, “Arai kema ituŋanan etiaŋ ka aputoke, kedumu da emacar koreeteke arai bo kakanike,

¹⁰ emasi ŋin da ebino loka adedeŋ naka Edeke, loebukokinitai lomam inyalitai toma aikopo naka anyunyurake, isiriebio ŋes da kotoma akim ka acukuman kakonyen nuka imalaikan lukalaunak, kakonyen da nuka Imerekek.

¹¹ Epuriori da apuru naka aisiriebiokec kuju, ikar ka ikar, kwabo mam iyeŋunete paaran ka kuare da, luemaete etiaŋ ka aputoke, ka ŋin da yenedumuni emacar loka ekirorike.”

¹² Ne ŋes ejai atitiŋikin naka lukalaunak, ŋul luericito aicorakineta nuka Edeke ka aiyuun da naka Yesu.

¹³ Abu keira eporoto loebuni kotoma akuj kobala ebe, “Kiwadik ebe: Isirereŋitoi lukatwak, luetwakete kotoma Ejakait amear lolo.” Eebo, ebala Emoyo ebe, “Tetere ibworarete kotoma aitaaritoikec; naarai euparos akeceswamisio kakes!”

¹⁴ Kasodi kaany, ido koany, edou lokakwaŋan, kiboie da kodou loeputosi bala okoku loka etuŋanan, kejai aboko naka esabu akouke, ka ecilikiki da loekwana akanike.

¹⁵ Kolomu emalaika ece koyekalu, kiworoi keporoto loepol mama ejai ŋol loiboie kodou, ebe, “Kijuka ecilikiki, kosak, naarai adol apak naka aisak, naarai akoko noi isakan luka akwap.”

¹⁶Kosodi loiboie kodou acakar ecilikikike toma akwap, kosakai do akwap.

¹⁷Kolomu do emalaika ece koyekalu lokotoma akuj, kojai ŋes da ecilikiki loekwana.

¹⁸ Kosodi kolom emalaika ece kotem, kojai apolou kama ejai akim, kiworoi keporoto loepol mama ejai ŋol loejai ecilikiki loekwana, ebe, “Kijuka ecilikikikon loekwana, kode aibuŋeta nuka emusabibu loka akwap, naarai akoko noi imusabibunuke.”

¹⁹ Kocaka do emalaika ecilikikike toma akwap, kode emusabibu loka akwap, kocakak acuet naepol naka adedeŋ naka Edeke.

²⁰ Kicakacakai acuet kokiŋa naka ere, koleleata aokot alomun kacuet, kiton arukanasia nuka ibalasin, kwape alosit naka amairon akwat aarei.