Read Ebaibuli 1961 Apukokino 16 Bible Online

Apukokino 16 - Ebaibuli 1961 bible

Apukokino 16

¹ Kasodi keira eporoto loepol loebuni kotoma oyekalu elimokini imalaikan ikanykaarei ebe, “Koloto, kobukokis atanyia akanykaarei nuka adedeŋ naka Edeke toma akwap.”

² Kosodi losodit alosit, kobukok atanyike toma akwap, koraun edola loerono loetiono kotuŋa luejai emacar loka etiaŋ, luemaete da aputoke.

³ Kobukok emalaika lokiareit atanyike toma aŋolol, koraun aokot bala nuka yenikatwan, kotwaka da iboro kere luejarete, lukejaas toma aŋolol.

⁴ Kobukok emalaika lokiwuniet atanyike toma ocorin ka atanin nuka akipi, koraunos aokot.

⁵ Keira emalaika loka akipi ebala ebe, “Idolit ijo, loijai, ido lokijai, Lokalaunan, Naarai itubok kwaŋin.

⁶ Naarai apotu kobukosi aokot nuka lukalaunak ka nuka inabin, Ijo iinak kes aokot aimat, Ibusakinito kes!”

⁷ Keira da etem ebala ebe: “Eebo, Ejakait Edeke Lokapedor kere, Eraas itubesiakon lukabeit ka luedolito da.”

⁸Kobukok emalaika lokiwoŋonet atanyike toma akoloŋ, aponi koinakinai ŋes anomor ituŋa kakim.

⁹ Konomoroi ituŋa kamwanis naepol, koinyanakis ekiror loka Edeke, loejai apolou kama ejaas aiticaneta ŋun, kwabo mam apotu kitoronikinos, karaida aitopoloor ŋes.

¹⁰ Kobukok emalaika lokikanyet atanyike oicoloŋ loka etiaŋ, kitumutonoroi ajakanutuke; kokonyokonyata aŋajepakec kanuka ariebokec.

¹¹ Koinyanakis Edeke loka akuj kanuka ariebokec, ka idolakec, kwabo mam apotu kitoronikinos kotoma aswamisiokec.

¹² Kobukok emalaika lokikanyetekape atanyike toma ocor lokapolon Eupurate, koonikis akipike, tetere itemokino erot loka ikabakan luepote kokide.

¹³ Abu kaany da imoyon iuni lueroko lueputosi kaidodokai, elomunete kaituk naka apiu, kaituk da naka etiaŋ, kaituk da naka enabi lokeŋalan.

¹⁴ Naarai eraas imoyon luka ajokin luiswamaete aanyuneta, luelosete mama ejaas ikabakan luka akwapin kere, atukonokin kes ojie loka apaaran nakapolon naka Edeke Lokapedor kere,

¹⁵ (“Koany, abuni kwape ekokolan! Isirereŋitoi yenekwenyi, koricite ikenapen, kinyek alosit imujalal, kinyeis ituŋa da aanyun ileicike!”)

¹⁶ Kotukonokis kes aibois naenyaritai kAburanian Arumagedon.

¹⁷ Kobukok emalaika lokikanyetekaarei atanyike apak, kolom eporoto loepol koyekalu, ebuni koicoloŋ, ebala ebe, “Eswamaun!”

¹⁸ Kojau aimiliaunun, ka iporotoi, ka agiro, kojau da amaran naepol naka akwap, namam ejai apeŋo netikolo ajaatar ituŋa akwap, kopol amaran ŋin naetia nen.

¹⁹ Kotiaka ere lokapolon atutubeta auni, kibiroros da ireria luka atekerin, Kiitu Edeke Babulon lokapolon, ainakin ŋes aimat aikopo naka ebino loka adedeŋ naka anyunyurake.

²⁰ Koker ŋinipujan, kwabo mam edumuna iroŋan;

²¹ kodounun akako naepol, naelaŋir kwape atalant, abunore kotoma akuj mama ejaas ituŋa, koinyanakis ituŋa Edeke kanuka aiticanet ŋin naka akako, naarai kepol noi jokan akeitieanet.