Read Ebaibuli 1961 Apukokino 19 Bible Online

Apukokino 19 - Ebaibuli 1961 bible

Apukokino 19

¹ Akaulo kaŋun abu keira bala eporoto loepol loka ekodet loepol kotoma akuj, kinerasi ebe, “Aleluia! Aitajar ka aibuses, ka apedor eraas nuka Edekewok.

² Naarai eraas itubesiake lukabeit, ka luedolito da; Naarai atuboki akiro naadote nakapolon, Naamunaari akwap kadoteuke, Enyaŋaa kamakeŋ aokot nuka ikebulesin.”

³ Kirucakis einer nakiareit ebe, “Aleluia! Epuriori apuruke ikar ka ikar.”

⁴ Kibiroros imakio akaisaarei ka luoŋon ka lukajarak iwoŋon, komaata Edeke loiboie koicoloŋ, kobalasi ebe, “Amen. Aleluia!”

⁵ Kobu eporoto koicoloŋ kinera atiar, “Kituroto Edekewok, yes kere ikebulesin, Yes luiyoŋito ŋes, ludidik ka lukapolok da.”

⁶ Keira bala eporoto loka ekodet loepol, ido bala eporoto loka akipi nuipu, ido bala eporoto loka agiro naegogoŋ, kobala ebe, “Aleluia! Naarai irumit Ejakait Edekewok Lokapedor kere.

⁷ Keyalamikinos, kalakaros noi, kainakis ŋes aibuses, Naarai adolu adukokin naka Imerekek, Itemokino da ateranike;

⁸ Aponi koinakinai ŋes ainap ebaputa loejok, loimilia, loelai”— naarai ebaputa loejok kes aswamisio nuedolito nuka lukalaunak.

⁹ Katema emalaika eoŋ atiar, “Kiwadik ebe: Isirereŋitoi luenyaritai toma opucit loka eterane loka Imerekek.” Katema ŋesi eoŋ atiar, “Eraas nu akiro nukabeit nuka Edeke,”

¹⁰ Kasodi aibirokin kiŋaren kakejeke, aima ŋes, Katema ŋesi eoŋ atiar, “Koany, sirikiswama kwaŋin! Arai eoŋ ebulesit aupakon, ka lokoinacanakon, luejaas kaitejenunet naka Yesu. Koma Edeke.” Naarai aitejenunet naka Yesu ŋes emoyo loka adwaranut.

¹¹ Kasodi kaany akuj eŋaara, ido koany, ebalasit loekwaŋ! Lokibwanenit ŋes enyaritai Lomunot ido Lokabeit, etubokini ka aitiji kadolit.

¹² Ido akekonyen eraas aipeloret naka akim, kejaas amekemeken nuipu akouke; kojai kekiror loiwadikatai lomam ejeni idiotuŋanan dimarai ŋes bon.

¹³ Konapite anapito naebwasitai aokot; enyaritai ekekiror Akirot naka Edeke.

¹⁴ Kotupakis ŋes ajoresio nukotoma akuj, kibwanenito ibalasin lukakwaŋak, konapito ebaputa loejok, loekwaŋ, loelai.

¹⁵ Elomuni ekileŋ loekwana kaitukuke, loinomia atekerin, icokiei kes kebela loka asuat; icakacakai ŋesi acuet naka ebino loka adedeŋ naka anyunyura naka Edeke Lokapedor kere.

¹⁶ Ejai ekiror loiwadikatai anapitoke kamurwoke da ebe, EKABAKA LOKA IKABAKAN, IDO EJAKAIT LOKA IJAKA.

¹⁷ Kasodi kaany emalaika ebwoi kotoma akoloŋ, kiworo keporoto loepol kobala akweny kere nueporitos toma apak ebe, “Kopotu, kotukonokinos opucit loepol loka Edeke,

¹⁸tetere inyamete akiriŋ naka ikabakan, ka akiriŋ naka ikapolokitok, ka akiriŋ naka lukagogoŋ, ka akiriŋ naka ibalasin, ka naka ŋul kaluibwanenete kes, ka akiriŋ naka luijakakaete, ka naka ibulesin, naka ludidik ka naka lukapolok da.”

¹⁹ Kaany etiaŋ ka ikabakan luka akwap, ka ajoresiokec, etukokinos ejie kaŋol kaloebwanenit ebalasit ka ajoreke da.

²⁰ Kikamunai etiaŋ nepepe ka enabi lokeŋalan loeswamai aanyuneta kakonyeneke, nueŋalaaria ŋul luadumut emacar loka etiaŋ, ka ŋul da luamaete aputoke. Kocakakinai iarei kere ejarete toma aŋolol naka akim naenoki kacukuman.

²¹ Koarai luasalete kekileŋ loka ŋol kaloebwanenit ebalasit, loalomunit kaitukuke; kimonikinos akweny kere akiriŋikec.