Read Ebaibuli 1961 Apukokino 21 Bible Online

Apukokino 21 - Ebaibuli 1961 bible

Apukokino 21

¹ Kasodi kaany akuj nakitetet, ka akwap nakitetet; naarai atubor akuj nasodit, ka akwap da nasodit, mam bobo aŋolol ejai.

² Kaany da ere lokalaunan, Yerusalem lokitetet, ijesun kotoma akuj, kama ka Edeke, itemokino kwape ateran naisirokinitai okilenike.

³ Keira da eporoto loepol loebuni kotoma oicoloŋ kobala ebe, “Koany, ejai ewema loka Edeke nepepe kituŋa, iboienenei kakes, eraunos kesi iketuŋa, Edeke da elopet ejaenena kakes.

⁴ Emwatari akiyo kere kakonyeneke, mam bobo ejaun atwanare, karaida akuudian, karaida aimony, karaida ariebo, mam bobo ejaunos; naarai atuboros nusodit.”

⁵ Ŋol da loiboie koicoloŋ kobala ebe, “Koany, eteteuni eoŋ kere.” Kobala da ebe, “Kiwadik, naarai eraas akiro nu numunon ido nukabeit.”

⁶ Katema ŋesi eoŋ atiar, “Eswamaunos! Arai eoŋ Alupa ka Omega, ageunet ka esaŋe da, Ainakini yenejakit akure aimat atai atan naka akipi nuka aijar.

⁷ Yenipikori irumi ŋun, araun eoŋ Ekedeke, ŋes da eraun okokuka.

⁸ Konye ikuriesik, ka lumam iyuunito, ka luesiliaka, ka ikaarak, ka idotea, ka ikacudak, ka luemaete aputosia, ka ikeŋalak kere, ejaun akorakineteke toma aŋolol naenoki kakim ka acukuman; ŋes atwanare nakiareit.”

⁹ Kosodi kobu ediopet komalaikan ikanykaarei lukejaas atanyia akanykaarei nueleleba aiticaneta akanykaarei nukawasia, kinera keoŋ, kobala ebe, “Bia, ketodikini jo ateran, aberu naka Imerekek.”

¹⁰ Kadaka kotoma Omoyo oroŋat loepol, loeoja, ketodik eoŋ ere lokalaunan Yerusalem, ijesun kotoma akuj kama ka Edeke,

¹¹ ejaas kaibuses naka Edeke, koputosi aicake bala amoru naka akais nuipu noi, kwape amoru naka ayaseper naipiororoi noi.

¹² Kejai arwatat naepol, naeoja, kejaas irutei itomon ka luarei, kejaas imalaikan itomon ka luarei orutei, kiwadikatai da ikiroria luka atekerin atomon ka nuarei nuka idwe luka Isirael orutei.

¹³Kide irutei iuni, agolitomei irutei iuni, eŋalakimak irutei iuni, to da irutei iuni,

¹⁴Kojaas apeteta atomon ka nuarei arwatat naka ere, kotomakec da ikiroria itomon ka luarei luka ikiyakia itomon ka luarei luka Imerekek.

¹⁵ Kojai ŋol lokinera keoŋ egada lokitemis loka esabu, tetere itemio ere, ka iruteike, ka arwatatake.

¹⁶ Etirianitai da ere iwaitin kere, aojauke koriakasi kalalau. Kitem ŋesi ere kegada amairon alukumit ka akwat akany; koriakanara aojauke ka alalauke ka amukururuke da.

¹⁷Kitem da arwatatake ikubitin[3] akwatat ka akaisaoŋon ka luoŋon, kwape ejaar aitemis naka etuŋanan, ŋes naka emalaika.

¹⁸ Adukio naka arwatatake korai naka ayaseper, ere da korai loka esabu loelai, kwape aroet naelai.

¹⁹ Kisiritete apeteta nuka arwatat naka ere kaŋinimoru kere naka akais nuipu; apetetait nasodit ayaseper, nakiareit asapiro, nakiwuniet aget, nakiwoŋonet emeralid,

²⁰nakikanyet naemelomelot; nakikanyetekape asadia; nakikanyetekaarei akurusoliso; nakikanyetekauni aberul; nakikanyetekaoŋon atopasit; nakitomonet akurusopuraso; nakitomonet ka nadiopet ayasit; nakitomonet kanuarei da ametusit,

²¹Keraas irutei itomon ka luarei ilulun itomon ka luarei, ŋolidiopet korutei kerai elulu ediopet; erot da loka ere kerai esabu loelai bala aroet naipiororoi.

²²Mam abu kaany eyekalu kore, naarai eyekaluke ŋes Ejakait Edeke Lokapedor kere ka Imerekek.

²³ Mam ere ipuda akoloŋ karaida elap acaikin ŋes; naarai inwakakinit aibuses naka Edeke, atalake da ŋes Imerekek.

²⁴ Elosenenete da atekerin kaicake, eyaunete ikabakan luka akwap aibusesukec tomake;

²⁵ mam cut egolokinio iruteike paaran, naarai mam ejaun akuare ŋina;

²⁶einunete ŋes aibuses ka ayoŋio nuka atekerin.

²⁷ Ido mam elomari cut ibore kere tomake yenemunaara, karaida yeniswamai nukasilianut, ka aiŋalanut, dimarai ŋul bonik luiwadikatai toma oitabo loka aijar loka Imerekek.