Read Ebaibuli 1961 Apukokino 22 Bible Online

Apukokino 22 - Ebaibuli 1961 bible

Apukokino 22

¹ Kosodi ketodik eoŋ ecor loka akipi nuka aijar, loemwekimweki kwape aroet, eleleuni kotoma oicoloŋ loka Edeke ka loka Imerekek,

² kokidiŋ kerot loka ere, kojai ekitoi loka aijar epuai ka epuai kecor, loerai araito nukiponesio itomon kaluarei, loerai araitoke ŋolilap; keraas akui nuka ekitoi nuitaŋaleunete atekerin.

³ Mam ejaun bobo ekenit; ejaun eicoloŋ loka Edeke ka loka Imerekek da tomake; ijaanakinete ŋes ikebulesin;

⁴ eanyunete akekonyen, ejaun da ekekiror oreetake.

⁵ Mam ejaun bobo akuare; mam ipudasi aica naka atala, ka aica da naka akoloŋ, naarai icaikini kes Ejakait Edeke, irumete kesi ikar ka ikar.

⁶ Katema ŋesi eoŋ atiar, “Eraas akiro nu numunon ido nukabeit. Ejuku Ejakait Edeke loka imoyon luka inabin ekemalaika aitodikin ikebulesin nuekotosi ajakut atipet.

⁷ Ido koany, abunit atipet.” Isirereŋitoi yenerici akiro nuka adwarasit naka eitabo kalo.

⁸ Eoŋ Yokana abu kapup ka aanyun da ŋun, Ido naapupunio ka aanyun abu kebiror aima koiŋaren kakeje nuka emalaika loketodikini ŋun.

⁹Katema ŋesi eoŋ atiar, “Koany, sirikiswama kwaŋin! Arai eoŋ ebulesit aupakon lokoinacanakon inabin, ka ŋul da luericito akiro nuka eitabo kalo. Koma Edeke.”

¹⁰ Kabala eoŋ ebe, “Sirikipucak aipucet akiro nuka adwarasit naka eitabo kalo, naarai eapie apak ŋin.

¹¹ Yeniswamai numam edolito, kiyatak aswam amamus adolit, yenesiliana da, kiyatak asilianar, yenedolit da kiyatak aswam nukadolit, yenikalaunan da kiyatak aitalaunio.”

¹² “Koany, abunit eoŋ atipet, ayauni eropitika da, atacia ŋinituŋanan kwape ejaar akeswam.

¹³ Arai eoŋ Alupa ka Omega, losodit ka lokawasia, ageunet ka esaŋe da.”

¹⁴ Isirereŋitoi luilosete anapitokec, tetere ejaunos kapedor kokitoi loka aijar, elomarete da ore itorete oruteike.

¹⁵ Ejaas iŋokwo kiŋa, ka ikacudak, ka idotea, ka ikaarak, ka luemaete aputosia, ka ŋinituŋanan kere yenemin ka aswam da aiŋal.

¹⁶ “Eoŋ Yesu ejuk emalaikaka aitejenun yes ŋun kanuka ikanisan. Arai eoŋ aliasit ka etatait loka Daudi, aacerit naemwekimweki naka atupuruc.”

¹⁷ Ebalas Emoyo ka ateran ebe, “Bia.” Yenepupuni da kobala ebe, “Bia.” Ŋin da yenejakit akure kobu; yenekoto kooko atai akipi nuka aijar.

¹⁸ Etejenikini ŋinituŋanan yenepupuni akiro nuka adwarasit naka eitabo kalo ebe: Arai kiyataki ituŋanan kotomakec, iyatakini Edeke tomakeŋ aiticaneta nuiwadikatai toma oitabo lo,

¹⁹ bobo da arai elemari ituŋanan kotoma akiro nuka eitabo loka adwarasit kana, elemari Edeke akorakineteke kokitoi loka aijar, kore da lokalaunan, nuiwadikatai toma oitabo lo.

²⁰Loitejenunit nu inera ebe, “Eebo, abunit atipet.” Amen. Kobia, Ejakait Yesu!

²¹Asianut naka Ejakait Yesu kojai ka lukalaunak; Amen.