Read Ebaibuli 1961 Apukokino 4 Bible Online

Apukokino 4 - Ebaibuli 1961 bible

Apukokino 4

¹ Akaulo kaŋun abu kete, ido koany, ekek loeŋaara toma akuj! Kobala da eporoto loagei eoŋ apupun inera keoŋ kwape loka arupepe, ebe, “Kodoku ne, eoŋ da ketodikini jo nuibusakinito ajaun akaulo kanu.”

² Atipet abu kajai kotoma Omoyo, ido koany, kibwaikinitete eicoloŋ toma akuj, ka loiboie koicoloŋ kaŋol!

³ Ŋol da lokiboie kotakani koputosi bala amoru naka ayaseper, ka naka sarudio, kirimorite etaluka eicoloŋ, kotakani koputosi bala emeralid.

⁴ Kirimorito iicoloŋo akaisaarei kaluoŋon eicoloŋ, kiboiete imakio akaisaarei kaluoŋon koicoloŋo kaŋul, konapito inapen lukakwaŋak, kojaas da abokoi nuka esabu akwesikec.

⁵ Kolomununei aimiliaunun koicoloŋ, ka iporotoi, ka agiro, konokete da atalai akanykaarei nuka akim koiŋaren keicoloŋ, kes Imoyon ikanykaarei luka Edeke;

⁶ ido kiŋaren keicoloŋ bala aŋolol naka aroet, koputosi bala agilasi. Kokidiŋ keicoloŋ, kowaitin da kere luka eicoloŋ, kejaas lukajarak iwoŋon, lukileleba akonye kiŋaren kokau da.

⁷ Keputosi lokajaran losodit bala eŋatuny, ka lokajaran lokiareit bala itaok, kejai lokajaran lokiwuniet ereet bala loka etuŋanan, ka lokajaran lokiwoŋonet da bala emorukaalet loeporitoi.

⁸ Lukajarak ŋul luoŋon kejaas ŋolidiopet abebenoka akanykape, kileleba akonye iwaitin kere, kotoma da, kwabo mam iyeŋete paaran ka kuare da ayoore ebe, “Lokalaunan, lokalaunan, lokalaunan, Ejakait Edeke Lokapedor kere, Lokejai, ido loejai, ido loebuni da!”

⁹ Ido napeinanakinete lukajarak loiboie koicoloŋ loejari ikar ka ikar aibuses, ka ayoŋio, ka aimal da,

¹⁰ kanen ibiroros imakio akaisaarei ka luoŋon kakonyen nuka ŋol kaloiboie koicoloŋ, emaete ŋol loejari ikar ka ikar, kocakanakinete abokoikec kiŋaren keicoloŋ, koyeete ebe,

¹¹“Ibusakinit ijo, Ejakaitikosi ka Edekekosi da, Adumun aibuses, ka ayoŋio, ka apedor, Naarai ibu ijo kosub iboro kere, Ijo kojaut, kesubio da kanuka akotekon.”