Read Ebaibuli 1961 Apukokino 6 Bible Online

Apukokino 6 - Ebaibuli 1961 bible

Apukokino 6

¹ Kasodi kaany naapukoria Imerekek adiopet naka aipuceta akanykaarei, keira da ediopet ka lukajarak luoŋon inera bala eporoto loka agiro ebe, “Bia!”

² Kaany, ido koany, ebalasit lokakwaŋan, kejai ekebwaneniton da akabwa; koinakinai aboko, koloma da aipikor, ido ipikori.

³Naapukoria ŋesi aipucet nakiareit, keira lokajaran lokiareit ebala ebe, “Bia!”

⁴ Kolom do ebalasit ece, loereŋ; koinakinai ekebwanenitonike alemar ainapakin kotoma akwap, tetere ituŋa earas; koinakinai da ŋes ekileŋ loepol.

⁵ Naapukoria ŋesi aipucet nakiwuniet, keira lokajaran lokiwuniet ebala ebe, “Bia!” Kaany, ido koany, ebalasit lokirionon, kejai ekebwanenitonike aitemis akanike.

⁶Keira bala eporoto kokidiŋ lukajarak luoŋon ebala ebe, “Aitemis naka akiria naka adenari, ka aitemisio auni nuka esairi nuka adenari, kwabo mam imunaari akinyet karaida ebino!”

⁷Naapukoria ŋesi aipucet nakiwoŋonet, keira eporoto loka lokajaran lokiwoŋonet ebala ebe, “Bia!”

⁸ Kaany, ido koany, ebalasit loekwele, ekebwanenitonike da ekekiror Atwanare, kotupa ŋes Okatwak; koinakinai kes apolou kama katutubet nakiwoŋonet naka akwap, koarete kekileŋ, ka ebeli, ka atular, ka itiaŋ luededeŋ luka akwap.

⁹ Naapukoria ŋesi aipucet nakikanyet, kaany kokwap ketem, imoyon luka ŋul kalukeario kanuka akirot naka Edeke, kanuka ajenanut da nakejaatar.

¹⁰ Kiworoto keporoto loepol ebe, “Ijo Ejakait, Lokalaunan, lokabeit, itodoli ai mam kitubokini, karaida ainyaŋ aokotokosi kama ejaas ŋul luiboiete kakwap?”

¹¹ Koinakinai kes ŋinidiopet anapito nakakwaŋan, kolimokinai da kes aiyeŋun bobo apak naedit, kiton naitodolikinor etiai loka ibulesin lukaupakec, ka ikeceinacan, luepote aario kwape kakesi.

¹² Naapukoria ŋesi aipucet nakikanyetekape, kaany, kejai amaran naepol naka akwap; kirioniar akoloŋ bala epuko loka ajul nukirionok, koluor elap da kere bala aokot,

¹³ kibirununos aacer nuka akuj toma akwap, kwape eraraununia etini araitoke nuelidio naejanijaŋia ekwam loepol.

¹⁴ Kilicarai akuj bala eitabo loenunukitoi, kolemarai ŋoliroŋat ka ŋinipujan kaiboisike.

¹⁵ Kosodete ikabakan luka akwap, ka ikapolok, ka ikapolokitok iserikalei, ka ikabarak, ka ikagogoŋok, ka ŋinibulesit ka yenejakakai, koŋopata kotoma abuai, ka atiiban nuka iroŋan,

¹⁶ kobalas iroŋan ka atiiban ebe, “Kibirunos mamakosi, kitoŋopai sio kakonyen nuka ŋol kaloiboie koicoloŋ, ka anyunyura da naka Imerekek;

¹⁷ naarai adol apaaran naepol naka anyunyurakec, iŋai bo do epedori aibwo?”