Read Ebaibuli 1961 Apukokino 8 Bible Online

Apukokino 8 - Ebaibuli 1961 bible

Apukokino 8

¹ Naapukoria Imerekek aipucet nakikanyetekaarei, kejai aililiŋ toma akuj bala apak naka atutubet naka esawa.

² Kasodi kaany imalaikan ikanykaarei luebwoenenete kakonyen nuka Edeke, koinakinai kes arupepen akanykaarei.

³ Kobu emalaika ece kobwo koiŋaren ketem, kejai aisupurunet naka esabu; koinakinai ŋes lukisupurununo luipu tetere ibwaikin nepepe kailip naka lukalaunak kere otem loka esabu lokejai kiŋaren keicoloŋ.

⁴ Kopurio apuru naka lukisupurununo nepepe kailip naka lukalaunak, kakan naka emalaika, kakonyen nuka Edeke.

⁵ Kolem emalaika ŋol aisupurunet, kilelebik akim nakejai otem, kocakak akwap; kojau agiro, ka iporotoi, ka eimilia, ka amaran da naka akwap.

⁶Kokapakinos imalaikan ikanykaarei lukejaas arupepen akanykaarei tetere ekusete.

⁷ Kokut losodit akerupepe, kojau akako ka akim inyalakina kaokot, kocakakinai akwap; kicwea atutubet nakiwuniet naka akwap, kicwea da atutubet nakiwuniet naka ikito, kicwea da anya kere nuepalal.

⁸ Kokut emalaika lokiareit akerupepe, kocakakinai yenesubit bala eroŋat loepol, loenoki akim, toma aŋolol;

⁹koraun atutubet nakiwuniet naka aŋolol aokot, kotwana atutubet nakiwuniet naka isuban lukejaas toma aŋolol lukejai aijar; komudiarai atutubet nakiwuniet naka atakerin.

¹⁰ Kokut emalaika lokiwuniet akerupepe, kibirun aacerit nakapolon kotoma akuj, enoki kwape akalas, kibirokin atutubet nakiwuniet naka icorin, ka atanin da nuka akipi.

¹¹ Ekiror loka aacerit ŋes Adwaris. Koraun atutubet nakiwuniet naka akipi adwaris, kotwaka ituŋa luipu kanuka akipi kaŋun, naarai etadwaritai.

¹² Kokut emalaika lokiwoŋonet akerupepe, kinomai atutubet nakiwuniet naka akoloŋ, ka atutubet nakiwuniet naka elap, ka atutubet nakiwuniet da naka aacer, tetere itumutonio atutubetekec nakiwuniet, kinye atutubet nakiwuniet naka apaaran acaun, akuare da kwape kwaŋin.

¹³ Kasodi kaany, keira da emorukaalet ediopet, loeporitoi kokidiŋ kakuj, ebala keporoto loepol ebe, “Itukwi, itukwi, itukwi ŋul luiboiete kakwap, kanuka iporotoi ice luka arupepen nuka imalaikan iuni lukekapakina aikut!”