Read Ebaibuli 1961 Rusi 2 Bible Online

Rusi 2 - Ebaibuli 1961 bible

Rusi 2

¹ Ajai da Naomi onace loka ekileke, etuŋanan loecasit, ekabaran loka ekek loka Elimelek; ekekiror Boas.

² Kotema Rusi Amoabut Naomi atiar, “Mere kalot kwana mana airar aluŋuran nuka akima, ka aitup da ŋin yenikadumakini asianut kakonyeneke.” Kotema ŋes atiar, “Ape cabo, akokuka.”

³Abu kolot, kobu airar toma amana naesakiata ikasakak; ido kodum alukat naka amana naka Boas, loarai loka ekek leka Elimelek.

⁴ Ido koany, kobu Boas koBet-lekem, kotema ikasakak atiar, “EJAKAIT kojai kayes.” Koboŋokis ŋes ebe, “Kisirereŋ jo EJAKAIT.”

⁵Kosodi Boas atemar ekebulesit loetasaki ikasakak atiar, “Nakaŋai apese na?”

⁶ Abu ebulesit loetasaki ikasakak Koboŋok ŋes ebe, “Na ŋes apese Amoabut naaboŋunete kaNaomi anyoun kakwap naka Moab:

⁷Abu kiner ebe, ‘Keŋaiŋaito, kerarunun ka atukonokin da kaneasakiata ikasakak koisutan da’; kosodi do abunore, eswama apeanan katupuruc kiton kwana, mam eboŋorit ore.”

⁸Kosodi Boas atemar Rusi ebe, “Mere ipupi ijo, akokuka? Sirilosenenei airar mana ace, karaida anyoun kane, konye kojaenena die kapesuruka.

⁹Kojaenenas akonyekon mana naesakenenoo, kotupanar ijo da kes: mam kereka ecorakinit itelepai ebe Sirikitironorete jo? Ido da nakijakia akure, kolosenenei neejai amot komasi ŋun nuewokunete itelepai.”

¹⁰ Kosodi kibiror ebuburia, kisuded, kobala ŋesi ebe, “Inyo bo adumunia asianut kakonyenekon, ijo ajenun eoŋ, kwabo arai eoŋ amoit?”

¹¹ Koboŋok Boas kobala ŋes ebe, “Aponi kalimonokin cut kere nuibu kiswamak tataakon ageun kaneatwania ekilekon: ido kwape ibu ijo kopalia papakon ka totokon ka akwap da nakolo kiwurikinio, kobu otuŋa lumam apeŋo ijeni.

¹² Kotacak EJAKAIT jo akoniswam, ido EJAKAIT Edeke loka Isirael, loibu aimec kwap kabebenokake korop jo noi.”

¹³ Kotema atiar, “Mere kadum asianut kakonyenekon ejakaitika; naarai kitalaka, naarai inera kakonibulesit nuka asianut, karaida mam arai adiopet kotoma abulesinikon.”

¹⁴Kosodi nakedol apak nakainyam, abu Boas kobala ŋes ebe, “Bia ainyam atap, kicunyak aodunetekon odia loedwar.” Kiboikin ŋesi awai naka ikasakak; apotu koinakis ŋes imomwa luikawooritai, konyam kimonikin kokurwok.

¹⁵Kosodi kenyou airar, kicorak Boas iketelepai, kotema atiar, “Kirarunun ŋesi koisutan da konye siriretanakinete ŋes.

¹⁶Komudanakinete ŋes da koisutan, kinyeis, kirar ŋes alopet, konye mam ilimunete.”

¹⁷Kosodi ŋesi airar kamana aitiwar akwap; kicom nuabu kotukonokinite kodum bala epa [3] loka esairi.

¹⁸Kibwoko, koloma ore; abu tataake koany nuatukonokinit ŋesi; koyau koinak lunan edeuni ŋesi nakedau aimonikin.

¹⁹Kosodi tataake kobala ebe, “Ai bo lolo kirararit? Ido ai bo kiswamaarit? Koinakinai asuliany ŋol loabu kojen jo.” Kitejenik ŋesi tataake ŋol loeswamaete kaŋes, kinera ebe, “Ekiliokit lokiswamaa lolo ekekiror Boas.”

²⁰ Kobala Naomi ateranike ebe, “Kisirereŋ EJAKAIT ŋes, lomam enaŋi akesianut mama kalukajarak ka lukatwak da.” Naomi kobala ŋes ebe, “Ekiliokit ŋol ŋes lokokekiwok cut, ediopet ka lukalakunakawok.”

²¹Kiner Rusi Amoabut ebe, “Ee ba, abu ŋesi katema eoŋ ebe, ‘Kojaenena die kitelepaika aitodol naedauniata aisak nuka kere,’ ”

²²Kosodi Naomi atemar Rusi ateranike ebe, “Ejok, akokuka, koupananasi nepepe kabulesinike, kwabo kinyein adumun jo kamana ace kere.”

²³Kosodi ŋesi aapienena kabulesin nuka Boas airarenen aitodol naedaunere aisak esairi ka aisak akima; kiboienenei katataake.