Read Ebaibuli 1961 1 Samuel 21 Bible Online

1 Samuel 21 - Ebaibuli 1961 bible

1 Samuel 21

¹ Kosodi Daudi abunore Nob mama ejai Akimelek esasedoti: kobu Akimelek airiamun kaDaudi komarani, kotema ŋes atiar, “Kanu kinyo ijaar ijo bon, komamei etuŋanan kajo?”

² Kotema Daudi Akimelek esasedoti atiar, “Kecorakinit ekabaka eoŋ aswam, katema eoŋ atiar, ‘Kinyek idiotuŋanan ajenun akirot naka aswam nakejukaritor, nakecorakinit da: ecorakinit eoŋ ikatumunak abore kamutan.

³Aso do inyo bo ejai akanikon? Koinakinai imugatin ikany akanika, arai icebore kere yenejai kajo.’ ”

⁴ Koboŋok esasedoti Daudi ebe, “Emamei emugati loduc kakanika, konye ajaas imugatin lukalaunak; arai mam ca ikatumunak eperito kaŋor.”

⁵ Koboŋok Daudi esasedoti atiar, “Abeit mam sio kiperit kaŋor apaarasia nu auni; naanyounio eoŋ alaete iboro luka ikatumunak, karaida kerai alosit nakaduc; elaete do noi ikeceboro lolo,”

⁶ Koinak do esasedoti ŋes imugatin lukalaunak; naarai amamei emugati dimarai imugatin luka aitodikin, lualemunio kakonyen nuka EJAKAIT ibwaikinio imugatin luemwaka kapaaran naelemarere ŋul.

⁷ Ajai etuŋanan loka ikejaanakinak luka Saul nen kapaaran kaŋin, loetapaikinitai akonyen nuka EJAKAIT; ekekiror Doeg Edomait, ekapolon loka ikecokok luka Saul.

⁸Kotema Daudi Akimelek atiar, “Emamei kane kakanikon akwara atai ekileŋ? Naarai mam ayaunit ekakileŋ karaida lujiisika, naarai abu aswam naka ekabaka kesuburia.”

⁹ Kotema esasedoti atiar, “Ekileŋ loka Goliat Epilisitiat, loiari ijo kaditot naka Ela, koany, ejai ne ienienitai kegoe kokau kepod: arai ikoto ayaŋaar, koyaŋa: naarai emamei ece kane dimarai ŋol.” Kotema Daudi atiar, “Emamei ece loeputotor ŋol; koinakinai.”

¹⁰Konyou Daudi koker kapaaran kaŋin kanuka ayoŋit Saul, kolot mama ejai Akis ekabaka loka Gat.

¹¹ Kotemasi ikejaanakinak luka Akis ŋes atiar, “Mere lo Daudi ekabaka loka akwap? Mam kes apotu koyeonokinos kokosio ebe, “Aar Saul ilukuminike, Ka Daudi da ikelukumin itomon?”

¹² Kibwaik Daudi akiro ŋun otauke, kokurianar noi Akis ekabaka loka Gat.

¹³ Kijulak ejauteneke kakonyenekec, kosub bala ebaŋ kakaninikec, koram ikirigin lukorute, kojalak akeimul eleleete kopenekike.

¹⁴Kosodi Akis atemar ikekejaanakinak atiar, “Okwe ikatuŋa, kianyut ebe ebaŋaana etuŋanan ŋol: kanukinyo kiinuniata?

¹⁵Emameete eoŋ ibaŋiok, tape iyaunete etuŋanan lo asubit ebaŋ kakonyeneka? Elomuni kereka etuŋanan lo oreka?”