Read Ebaibuli 1961 1 Samuel 24 Bible Online

1 Samuel 24 - Ebaibuli 1961 bible

1 Samuel 24

¹ Kosodi kanen keboŋu Saul katupit Ipilisitian, aponi kolimokinai ŋes ebe, “Koany, ejai Daudi amodiŋ naka En-gedi.”

² Kosodi Saul ayaŋaar ituŋa ilukumin iuni luaseunio koIsirael kere, kolot amoot Daudi ka iketuŋa omorun luka akinei nuka ais.

³ Kobu mama ajaas anukia nuka amerekekin korot, neajai abua; koloma Saul aimukor akekeje, Eboiete Daudi ka iketuŋa kaiboisio nukotoma abua.

⁴ Kotemasi ituŋa luka Daudi ŋes atiar, “Koany, apaaran na abu EJAKAIT kobala jo ebe, ‘Koany, kejaikini lokasurupikon akanikon, iswamakini da ijo ŋes nuitojoki ijo.’ ” Kosodi Daudi anyoun, kotub atokitoit naka ekaso loka Saul kaiyeiyea.

⁵ Kosodi kokau, kokadak etau loka Daudi, naarai abu kotub atokitoit naka Saul.

⁶ Kotema iketuŋa atiar, “Madi akuj eoŋ aiswamakin ekajakait loinyonyoikinit EJAKAIT akinyet akirot ŋin, arior akakan asurokin ŋes, kajeni ebe erai loinyonyoikinit EJAKAIT akinyet.”

⁷ Kwaŋin kitikok Daudi iketuŋa kakiro kaŋun, mam abu kocamak kes asurokin Saul. Konyou Saul koloma kabua, kolot.

⁸Konyou Daudi da kokau, koloma kabua, kiworo ŋesi Saul ebe, “Ekajakait, ekabaka.” Kosodi keŋolea Saul kau, kokukum Daudi, kisuded.

⁹ Kotema Daudi Saul atiar, “Kanukinyo ipupio ijo akiro nuka ituŋa ebe, ‘Koany, ekot Daudi aiswamakin jo aronis?’

¹⁰Koany, aanyut akonikonye lolo kwape kejaikinitor EJAKAIT jo lolo akanika kotoma abua: kecorakis ice aiar jo: konye abu ketim jo: kabala ebe, ‘Mam ariori akakan asurokin ekajakait; naarai erai loinyonyoikinit EJAKAIT akinyet.’

¹¹ Bobo da, ipapa, koany, eebo, koany atokitoit naka ekasokon ejai akanika; naarai abu katub atokitoit naka ekasokon, komam kaari jo, kojen jo koany ebe emamei aronis karaida aibucaret kakanika, mam adiakarit kamakon, kwabo imoot ijo aikamun akaijar.

¹² Kirabak EJAKAIT eoŋ ka jo, kenyaŋ EJAKAIT eoŋ kamakon: konye mam akakan kisurokini jo.

¹³Kwape ebalar awaragan naka imakio lukolosek ebe, ‘Mama ejaas ikaronok ŋes elomunia aronis’: konye akakan mam kisurokini jo.

¹⁴ Iŋai nat elomunit ekabaka loka Isirael asurokin? Iŋai bo idopiat ijo? Ekiŋok lokatwan, idepidepit.

¹⁵ Kirabak EJAKAIT, kotubok da eoŋ ka jo, koany ŋesi, kapurok, kayuu da kakanikon.”

¹⁶ Kosodi kanen, napeŋetakini Daudi einer akiro ŋun mama ejai Saul, kotema Saul atiar, “Erai lo eporotokon, okokuka Daudi?” Kodelo Saul komony.

¹⁷ Kotema ŋesi Daudi atiar, “Idolit ijo adepar eoŋ: naarai kikonak eoŋ nuejok, kwabo kekonakinit jo nueroko.

¹⁸Ilimo lolo kwape kikonakinia eoŋ nuejok: naarai nakejaikinia EJAKAIT akanikon, mam ibu koar eoŋ.

¹⁹Naarai arai kedumu etuŋanan lokasurupike, ejalakini kereka ŋes alosit eŋalei? Kanuka ŋun kotacak EJAKAIT jo nuejok kanuka nukiswamak eoŋ lolo.

²⁰ Ido koany, ajeni ebe iraun ijo ekabaka, iticasio ajakanut naka Isirael kakanikon.

²¹Aso ca kiyapoikinoi kolimite EJAKAIT, ebe mam jo imudiari akaur nakatupanakini, ebe da mam imudiari ekakiror kokek loka papaka.”

²²Kiyapoik Daudi Saul. Kolot Saul ore; konye kolototo Daudi ka iketuŋa abua.