Read Ebaibuli 1961 1 Samuel 26 Bible Online

1 Samuel 26 - Ebaibuli 1961 bible

1 Samuel 26

¹ Kopotu Isipin Gibea neejai Saul, kobalas ebe, “Mam kereka Daudi eŋopit koukot loka Kakila, loitei amodiŋ”

²Kosodi Saul anyoun, kolot amodiŋ naka Sip, kojaas kituŋa luseuna luka Isirael ilukumin iuni amoot Daudi amodiŋ naka Sip.

³Kidukur Saul oukot loka Kakila loitei amodiŋ ariri naka erot, Konye eboie Daudi kamodiŋ, koany da ebe ibwapunit Saul ŋes amodiŋ.

⁴Kanuka ŋun kijuka Daudi ikarotak, kojen cut ebe abu Saul.

⁵ Konyou Daudi, kobu aibois naedukurit Saul: koany Daudi aibois naaperio Saul, ka Abiner okoku loka Ner ekapolon loka ajoreke: aperi Saul kokidiŋ kagalin, kidukurito ituŋa alukun ŋes.

⁶ Kosodi Daudi aboŋokin kotema Akimelek Ekitit, ka Abisai okoku loka Seruia, onace loka Yoab, ebe, “Iŋai kiupar keoŋ oidukurun neejai Saul?” Kobala Abisai ebe, “Kiupar eoŋ kajo.”

⁷Kwaŋin kopotu Daudi ka Abisai neejaas ituŋa kuare: ido koany, aperi Saul kojotoi kokidiŋ kagalin, kodupakina akekwara kwap kakouke: koperete Abiner ka ituŋa alukunite ŋes.

⁸ Kosodi Abisai atemar Daudi atiar, “Kijaik Edeke lokasurupikon akanikon lolo: aso keŋaiŋait kocamakinai kecum ŋes kakwara aipelor kiton alup aicumet adiopet, mam erucakini aicum ŋes nakiareit.”

⁹Kotema Daudi Abisai atiar, “Sirikiar ŋes: naarai iŋai eriori akekan aluikin loinyonyoikinit EJAKAIT akinyet, komam egwaun akirot?”

¹⁰ Kotema Daudi atiar, “Kwape ejaria EJAKAIT, inomi EJAKAIT ŋes; diat edoluni apaaran naka atwanareke; elemuni kolot ojie, koarakinai ŋina.

¹¹ Madi akuj eoŋ arior akakan aluikin loinyonyoikinit EJAKAIT akinyet: konye, keŋaiŋait, kolem akwara naejai akouke, ka etuo loka akipi, kaloto.”

¹² Kwaŋin kolem Daudi akwara ka etuo loka akipi kakou naka Saul; koloto, mam ituŋanan yenabu koany karaida ajenun, karaida idio akwenyun: naarai ajotoete kere; naarai etojotoorit EJAKAIT kes ajo nuipu.

¹³Kosodi Daudi alosit oitela je, kobwo kaidi naka eroŋat kama elwana; kojai apak naelal noi kidiŋikec.

¹⁴Kiworo Daudi ituŋa, ka Abiner okoku loka Ner ebe, “Abiner, mam jo iboŋokini?” Kosodi Abiner aboŋokin ebe, “Iŋai ijo loiworot ekabaka?”

¹⁵Kotema Daudi Abiner atiar, “Mere jo etuŋanan loititiŋ? Iŋai da iputotor ijo koIsirael? Aso kanukinyo mam jo idaritor ekonijakait ekabaka? Naarai abu ediopet kotuŋa kobu aiar ekabaka ekonijakait.

¹⁶Mam ejok ibore ŋin yeniswama ijo, Kwape ejaria EJAKAIT, ibusakinit yes atwakare, naarai mam ipotu kidara ekusijakait, loinyonyoikinit EJAKAIT akinyet. Aso do koany, neejai akwara naka ekabaka ka etuo loka akipi loajai akouke.”

¹⁷ Kojen Saul eporoto loka Daudi, kotema atiar, “Erai ŋol ekoniporoto, okokuka Daudi?” Kotema Daudi atiar, “Eebo, ekajakait, wu ekabaka, ŋes ekaporoto.”

¹⁸ Kotema atiar, “Kanukinyo idopiator ekajakait ekebulesit? Eswama anyoika? Ido aronis anyoin ejai akanika?

¹⁹ Aso, keŋaiŋait, kopup ekajakait ekabaka akiro nuka ekebulesit, arai erai EJAKAIT kituluikinit jo eoŋ, kocam ŋesi ainakinet: konye arai eraas idwe luka ituŋa, kikenoi kes kakonyen nuka EJAKAIT; naarai kereŋeasi eoŋ lolo kenyek aidoŋ airumet naka EJAKAIT kobalas ebe, ‘Kolot, kijaanak icedekesio.’

²⁰ Aso do, kinyeis akaokot abukokinio akwap naemamei EJAKAIT: naarai alomu ekabaka loka Isirael amoot idepidepit, kwape emejaa ituŋanan atapeŋ koroŋan.”

²¹ Kosodi Saul atemar atiar, “Adiaka eoŋ: koboŋ, okokuka Daudi: naarai mam bobo keswamakini jo aronis, naarai ibu koyoŋ akaijar lolo: koany, eswama nukabaŋaanut, apaa da noi.”

²²Koboŋok Daudi ebe, “Koany akwara, wu ekabaka Aso do kobu ediopet kokatumunak koom.

²³ Ikonakini EJAKAIT ŋinituŋanan kwape ejaar akedolit ka amunonutuke: naarai abu EJAKAIT kijaik jo akanika lolo, konye mam abu kario akakan aluikin loinyonyoikinit EJAKAIT akinyet.

²⁴Ido koany, kwape abu kayoŋia akoniijar lolo, koyoŋai do akaijar da kakonyen nuka EJAKAIT, kayuu da eoŋ kocan kere.”

²⁵ Kosodi Saul atemar Daudi atiar, “Kisirereŋi ijo, okokuka Daudi: iswamai ijo nukagogoŋ, ipikori da.” Kolot Daudi orotoke, koboŋo Saul da aiboisike,