Read Ebaibuli 1961 1 Samuel 4 Bible Online

1 Samuel 4 - Ebaibuli 1961 bible

1 Samuel 4

¹ Kobu akirot naka Samuel mama ejai Isirael kere. Kolot Isirael aitiji Ipilisitian, kidukuroto Eben-eser: kidukuroto Ipilisitian da Apek.

²Kiderakinos Ipilisitian asurokin Isirael: kejioto, apotu Ipilisitian kodanyata Isiraelin: koarata kojie ituŋa kwape ilukumin iwoŋon luka ajore.

³Kosodete keboŋut ituŋa oidukurun kotemasi imakio luka Isirael atiar, “Kanukinyo kidanyia EJAKAIT oni lolo kakonyen nuka Ipilisitian? Mere kaomata asaduku naka aitutuket naka EJAKAIT koSilo, tetere ebuni mamawok, aitajar oni kakan naka lukasurupowok.”

⁴ Kijukasi ituŋa Silo, koyaut asaduku naka aitutuket naka EJAKAIT loka ajoresio, loiboie kokidiŋ kikerubin: odwe da luarei luka Eli, Kopuni ka Pinekas, ajaas ŋina kasaduku naka aitutuket naka Edeke.

⁵Kosodi kedolu asaduku naka aitutuket naka EJAKAIT oidukurun, kibwoŋ Isirael kere kelala loepol, kijau da akwap.

⁶Kepuputu Ipilisitian ecelet, kobalas ebe, “Anyoin apolou naka ecelet kaŋol loepol koidukurun luka Iburanian?” Kojenut do ebe adolu asaduku naka EJAKAIT oidukurun.

⁷Kokuriakata Ipilisitian, naarai abalas ebe, “Abu Edeke oidukurun.” Kobalas ebe, “Itukwi! naarai mam ber lem ibore yenikoni nen ejauna.

⁸Itukwi! Iŋai kiyuuni oni kakan naka idekesio lu luegogoŋ? Lu kes idekesio luadanyete Imisirian kiponesio kere luka atular kamodiŋ.

⁹ Kogogoŋoto, kitodiasi ekiliokone, yes Ipilisitian, tetere mam iraunos ibulesin luka Iburanian, kwape lem eraatatar kesi lukus: kitodiasi ekiliokone, kojioto.”

¹⁰ Kojioto Ipilisitian, kodanyai Isiraelin, kokerata kesi ŋinituŋanan owemake: kojai earit loepol; naarai kotwakata luka Isirael ituŋa ilukumin akaisauni lualosete kakeje.

¹¹ Koŋatarai asaduku naka Edeke; koarai da odwe luarei luka Eli, Kopuni ka Pinekas.

¹² Koker etuŋanan loka Benyamin kajore, kodolo Silo kapaaran kaŋin, kocilicila ikegoen, kojaas da alup akouke.

¹³ Kosodi kedolu, koany, eboie Eli koicoloŋoke kariri naka erot, kidari: naarai amarani eketau kanuka asaduku naka EJAKAIT, Kelomu etuŋanan ore, kolimo akirot, kodelo ere kere.

¹⁴Kepupu Eli eporoto loka adelor, kotema atiar, “Anyoin apolou naka ecelet kaŋol?” Kiwonya etuŋanan kolimok Eli.

¹⁵Kerai Eli loka ikar akaisakanykaoŋon ka lukanykauni, awariwarete akekonye, komam epedori asesen.

¹⁶ Kotema etuŋanan Eli atiar, “Eoŋ ŋol loabuni kajore, akeruni eoŋ lolo kajore.” Kotema atiar, “Ikote akiro ai, okokuka?”

¹⁷Koboŋok loayaun akiro ebe, “Aker Isirael kakonyen nuka Ipilisitian, ajaun da earit loepol kotuŋa, odwekon da luarei, Kopuni ka Pinekas atwaka, aŋatar da asaduku naka Edeke.”

¹⁸Kosodi kanen kelimu ŋesi nuka asaduku naka Edeke, kibiror Eli eidedia koicoloŋoke kariri naka erute, kobila emurisiŋike, kotwana; naarai amojoŋit ido alaŋir, Abu kirabakinite Isirael ikar akaisaoŋon.

¹⁹Apotie aberu naka okokuke Pinekas, koapie da aidoun: kepupu ŋin akiro ebe aŋatar asaduku naka Edeke, ido atwaka papaake ka okilenike, kokukum, kidou; naarai abu akeriebo kodolok ŋes.

²⁰ Napeapie ŋesi atwanare kolimokis ŋes aŋor nuabwoete kanen ebe, “Sirikikurianar, naarai idou esapat.” Konye mam abu Koboŋok, karaida apodokin.

²¹ Komaik ikoku Ikabod, kobala ebe, “Anyou aibusesukon, Isirael”: naarai aŋatar asaduku naka Edeke, ido kanuka papaake ka okilenike.

²²Kotema atiar, “Anyou aibuses koIsirael; naarai aŋatar asaduku naka Edeke.”