Read Ebaibuli 1961 1 Samuel 8 Bible Online

1 Samuel 8 - Ebaibuli 1961 bible

1 Samuel 8

¹ Kosodi kanen kemojoŋ Samuel, kodakak odweke atubokin Isirael.

²Ekiror loka ekiyaike ŋes Yoel; ka ekiror loka lokiareit Abiya: keraas ikatubok koBeer-seba.

³ Mam odweke apotu kotupasi ikeponesio, konye apotu kopaasi adumun apesan, apotu kijaut ainakineta nuitumudakete akonye, kitirioto etube.

⁴Kosodete imakio kere luka Isirael atukokin, kopotu Rama neajai Samuel.

⁵ Kolimokis ŋes atiar, “Koany, imoion ijo, odwekon da mam etupito ikoniponesio: aso koseikinai sio ekabaka atubonokin sio kwape katekerin kere.”

⁶ Konye kitakadik akirot Samuel, naalimunioto ebe, “Koseikinai sio ekabaka atubonokin sio.” Kilip Samuel mama ejai EJAKAIT.

⁷ Kotema EJAKAIT Samuel atiar, “Kopupok eporoto loka ituŋa kakiro kere nukilimokinete: naarai mam kiŋerito jo, konye kaŋeroto eoŋ, kenyek araut ekabakakec.

⁸Kwape ejaatar aswamisio kere nueswamata ageun kapaaran naetolomunia kes koMisiri aitodol lolo, kwape kajaliata eoŋ, ejaanakiniata icedekesio, kikonakis jo kwaŋin.

⁹Aso do kopupok ekeceporoto: konye itejenikini kes kaitebeikin, itodikini da epone loka ekabaka loeyai kes.”

¹⁰Kolimok Samuel ituŋa luelipitos ŋes ekabaka akiro kere nuka EJAKAIT.

¹¹ Kotema atiar, “Ikoni neta ekabaka lokiyai yes: eyaŋaari odwekus, eseuni kes kanuka agalinike, araun ikebwanenok ibalasinike; ekerete da koiŋaren kagalinike:

¹²Eseuni kes araun ikapolok luka ilukumin, ka ikapolok luka akaisakany; eseuni ice akor akelup, ka aisak ikenyamat, aiswamaun da iboroke lujiis, ka iboro luka agalinike.

¹³Eyaŋaari adwekus araun nuinyalete nueur maa, araun da akepook, araun akapeok imugatin.

¹⁴ Eyaŋaari da imanikoriakus, ka amanatakus nuka emusabibu, ka amanatakus nuka iseitunin, nuitelekarit ajokis kakesi, einakini kes ikekejaanakinak.

¹⁵Eyaŋaari idiopet kotomon yenika ikinyomokus, yenika amanatakus da nuka emusabibu, einakini ijakake ka ikekejaanakinak.

¹⁶Eyaŋaari ibulesinikus, ka abulesinikus, ka ikatumunakakus luejok noi, ka asigiriakus, aitwasam akeswam.

¹⁷Eyaŋaari idiopet kotomon yenika isipaninikus: yesi da iraunos ikebulesin.

¹⁸ Imonyete yesi kapaaran kaŋin kanuka ekabakakus loiseunete yesi; mam EJAKAIT kiboŋokini yes kapaaran kaŋin.”

¹⁹ Konye koŋero ituŋa apupokin eporoto loka Samuel; kotemasi atiar, “Mam; konye kikoto ekabaka lokiyai sio;

²⁰Tetere kiputokin katekerin kere; tetere da ekosikabaka kitubokini sio, kiŋarenenokini da, ejie ijiisiokosi.”

²¹Kopup Samuel akiro kere nuka ituŋa, kitatam kes kaki nuka EJAKAIT.

²² Kotema EJAKAIT Samuel atiar, “Kopupok ekeceporoto, koseik kes ekabaka.” Kotema Samuel ituŋa luka Isirael atiar, “Aso kolototo, ŋinituŋanan oreke.”