Read Ebaibuli 1961 1 Samuel 9 Bible Online

1 Samuel 9 - Ebaibuli 1961 bible

1 Samuel 9

¹ Kojai etuŋanan loka Benyamin, ekekiror Kis, okoku loka Abiel, okoku loka Seror, okoku loka Bekorat, okoku loka Apia, okoku loka Ebenyamit, etuŋanan loagogoŋ loabarit.

² Kejai ŋes okokuke, ekekiror Saul, ekatumunan loejok loetemelel: amamei kodwe luka Isirael yenadeparit ŋes katemelel: aoja ŋesi anyoun kokeperinike adepar ituŋa kere.

³Apotu kooliosi asigiria nuka Kis, papa loka Saul. Kotema Kis Saul okokuke atiar, “Koyaŋa ediopet kobulesin konyou, kolot aimo asigiria.”

⁴ Kitor akwap nakiukon naka Epuraim, kitor da akwap naka Salisa, konye mam apotu kodumut kes: kosodete aitor akwap naka Saalim, komameete kanen da: kitor akwap naka Ibenyamin, konye mam apotu kodumut kes.

⁵ Kedolut akwap naka Sup, kotema Saul ebulesit loaupatar atiar, “Bia, kaboŋosi; elemuni enyeki papaka apod asigiria kosodi apod oni.”

⁶ Kobala ŋes ebe, “Aso koany, ejai toma ore lo etuŋanan loka Edeke, erai da etuŋanan loeyoŋitai, edolenenete kere nuelimuni: aso kaloto ŋina; diat kilimokini nuka alositewok.”

⁷ Kosodi Saul atemar ekebulesit atiar, “Konye koany, arai kiilot, inyo kiinari oni etuŋanan? Naarai adaun emugati koriaginiwok, emamei ainakinet nakiinari etuŋanan loka Edeke: inyo bo ejai oni?”

⁸Koboŋok ebulesit Saul bobo atiar, “Koany, ejai akanika idiopet kooŋon yenika esekel loka epuesa: ainakini ŋin etuŋanan loka Edeke, kodwarak oni ewokorot.”

⁹ (Lem sek ko Isirael, naelosio ituŋanan aiŋitun Edeke, kobala kwanata ebe, “Bia, kaloto mama ejai ekadwaran”; naarai ŋol loenyaritai. Kwana Enabi anyaritai lem sek Ekadwaran.)

¹⁰Kosodi Saul atemar ekebulesit atiar, “Iner ejok; bia, kaloto.” Kolototo ore neajai etuŋanan loka Edeke.

¹¹ Edokete kesi ore, apotu kodumut apesur elomunete aiwok akipi, kotemasi kes atiar, “Ejai ekadwaran nee?”

¹² Koboŋokis kesi atiar, “Ejai; koany, ejai kiŋarenikus: aso kiwonyasi, naarai ebunit lolo ore; naarai einakinete ituŋa lolo asubanit kaibois naicelelei:

¹³Napeidolioto yesi ore, irasakinete aanyun ŋes, eroko ŋes keloto aibois naicelelei ainyam: naarai mam ituŋa enyamete aitodol neebunio ŋesi, naarai ŋes ilipakini asubanit arereŋ; akauloke enyamete ŋul luenyaritai. Aso do, kodokasi, naarai kapak kana ianyunete ŋes.”

¹⁴Kodokasi ore; napelomarete kesi ore, koany, kiriamunos kesi ka Samuel elosi aibois naicelelei.

¹⁵ Abu EJAKAIT kopukokinite Samuel apaaran adiopet eroko Saul kebuno ebe,

¹⁶ “Moi, osawa lopelo kejukakini jo etuŋanan loka akwap naka Benyamin, inyonyoikini ŋes akinyet araun ekapolon loeyait ikatuŋa Isirael, itajari ŋesi ikatuŋa kakan naka Ipilisitian: naarai ete ikatuŋa, naarai adolu aimonyokec mama ajai.”

¹⁷ Keanyu Samuel Saul, kotema EJAKAIT ŋes atiar, “Koany etuŋanan loabu kalimokinite jo nuke! Lopelo ŋes eyai ikatuŋa.”

¹⁸Kikuny Saul orute mama ejai Samuel, kotema atiar, “Keŋaiŋait, kolimokinai neejai etogo loka ekadwaran.”

¹⁹Koboŋok Samuel Saul ebe, “Eoŋ ŋes ekadwaran; kodoka kiŋaren aibois naicelelei, naarai imorete keoŋ ainyam lolo: moi tupuruc katwaria jo, kalimokini kere nuejaas otaukon.

²⁰Konye sirikipodokin asigiriakon nuaoliorete apaarasia auni nuatuboros; naarai adumunos. Ido lukaŋai iboro kere luimielas luka Isirael? Mere lupekon, ka ekek kere loka papakon.”

²¹ Koboŋok Saul ebe, “Mere eoŋ Ebenyamit, loka ateker naedit noi katekerin nuka Isirael? Ekekika da loedit noi kokekia kere luka ateker naka Benyamin? Kanukinyo inerar keoŋ nuikote nen?”

²²Koyaŋa Samuel Saul ka ebulesitike, koyaŋau kes agola naka ipejok, kisiboik kes aiboisio nukapolou neajaas luanyaritai, luemwaasi ituŋa akaisauni.

²³Kotema Samuel ekepoon atiar, “Koyau einer loabu kainak jo, loabu kalimok jo ebe, ‘Kidar ŋes.’ ”

²⁴ Koyaŋa ekepoon amurwo ka akwalikwalike, kibwaik akonyen nuka Saul. Kotema Samuel atiar, “Koany, ŋin naaponi kiŋadakinai! Kibwaik akonyenekon, konyam; naarai kiŋadakinitai jo aitodol apak naaseikinitai, naarai abu kabala ebe, Anyaraunit ituŋa.” Kwaŋin komorata Saul ka Samuel kapaaran kaŋin.

²⁵ Kosodi kijesunos kesi kaibois naicelelei toma ore, kinerata ŋesi ka Saul kokuju togo.

²⁶Kodilokis anyoun: kosodi kanen kiwala akwap, konyara Samuel Saul kuju togo, kobala ebe, “Konyou, katwar jo kolot.” Konyou Saul, kouparos kiŋa, ŋes ka Samuel.

²⁷Ijesaros kesi alomar kore, kotema Samuel Saul atiar, “Kolimok ebulesit kotubor kiŋarenewok, (kotubori ŋesi,) konye kobwo ijo kanepekane, tetere kesiirari jo akiro naka Edeke.”