Read Thado Chin Semtilbu 1 Bible Online

Semtilbu 1 - Thado Chin bible

Semtilbu 1

¹ Atilin Pathen'in van le leiset aseme.

²Chuleh leiset chu agong umlou le agohkeo ahin; twi thuhtah chunga chun muthim akikhange. Chule Pathen lhagao chu twiho chunga chun alenglen ahi.

³ Chuin Pathen'in, Vah umhen atile, vah chu aumtan ahi.

⁴Chuin Pathen'in vah chu amun, hichu pha asan: hichun Pathen'in vah chu muthima konin akhen tan ahi.

⁵Chuin Pathen'in vah chu sun asah in, muthim chu jan asah tai. Hitichun nilhah le jingkah chu ni masa ni ahitai.

⁶ Chujouvin Pathen'in, Twilah-a chun vanlaijol hung umhen, chule hichun twiho chu twiho-a konin homkhenhen, ati.

⁷Hitichun Pathen'in vanlaijol chu asemin, vanlaijol noija um twiho chu vanlaijol chunga um twiho-a kon chun ahomkhenin ahi. Chuin chuti chun aumtan ahi.

⁸Chuin Pathen'in vanlaijol chu van asah tai. Hitichun nilhah le jingkah chu ni nina ahitai.

⁹Chuin Pathen'in, Vannoi'a twi ho chu mun khatna kigom khom henlang, gamgo hung kisepdoh hen, ati. Chuin chuti chun aumtan ahi.

¹⁰Chuin Pathen'in gamgo chu leiset asah-in, chule twi kigom khom hochu twikhanglen asah tai. Chuin Pathen'in hichu amun, pha asan ahi.

¹¹Chuin Pathen'in, leisetnin hampa, achi nei hamkung, chule ama ama chi dungjuija aganei theiphung, aga sunga achi um leisetna hin hinsepdoh hen, ati. Chuin chuti chun aumtan ahi.

¹²Chuin leiset nin hampa, chule ama ama chi dung juija ga, aga sunga achi um thingphung ganei ahin sodoh tan ahi. Chuin Pathen'in hichu amun pha asan ahi.

¹³Hiti chun nilhah le jingkah chu nithum ni ahitai.

¹⁴Chuin Pathen'in, Sun chu jana kona chomkhen dingin van'a vanlaijola vah ho umhen; chule hiho chu melchihna ho, phat bihho, chule nikhoho hetna dingin pangu hen.

¹⁵Chule hiho chu leiset chunga vah pedingin van'a vanlaijola vahho hiuhen ati. Chuin chuti chun aumtan ahi.

¹⁶Hiche chun Pathen'in vah lentah ni asemin; vah lenjo chu sun vaipo dingin, chule vah neojo chu jan vaipo dingin apansahtan ahi. Aman ahsi ho jong aseme.

¹⁷Pathen'in hiho chu leiset chunga vah peding van'a vanlaijola chu akoijin,

¹⁸Chule sun le jan chunga vaipo ding le muthima kona vah khendingin akoitan ahi. Chuin Pathen'in hichu amun pha asan ahi.

¹⁹Hiti chun nilhah le jingkah chu nili ni ahitai.

²⁰Chuin Pathen'in, Twiho chun achat loh thei hinna nei ganhing tamtah hinsepdoh henlang, vachate jong leiset chung van'a vanlaijol onghom-ah leng leuhen, ati.

²¹Hiti chun Pathen'in ngapi lentah ho asemin, chule twijin ama ama chi dungjuija ninglhing setna ahinsepdoh achatloh thei hinna nei ganhing namkim le lhaving nei vacha namkim chu ama ama chi dungjui jin asemin ahi. Chuin Pathen'in hichu amun pha asan ahi.

²²Chule Pathen'in amaho chu phatthei aboh-in, Chiphaovin lang pung theijun, twikhanglen twiho lo dimun, chule vachate jong leiset chunga punguhen, ati.

²³Hitichun nilhah le jingkah chu ni ngani ahitai.

²⁴Chuin Pathen'in, leisetnin ama ama chi dungjui cheh in hinna nei ganhing, gancha hon, akithol tho ganhing, chule leisetna gamsaho ama ama chi dungjui jin hin sepdoh hen ati. Chuin chuti chun aumtan ahi.

²⁵Chuin Pathen'in leisetna gamsa ama ama chi dung juijin, ganchaho ama ama achi dung jui cheh-un, leiset chunga akithol tho ganhing namkim ama ama chi dung jui cheh-in asemtan ahi. Chuin Pathen'in hichu amun pha asai.

²⁶ Chuin Pathen'in, Eihon eiho lim bangin, eiho bangtah-in mihem semu hitin; chule amahon twikhanglen na ngaho, vanlaijola vachate, ganchaho, chule leiset pumpi chung le leichunga akitholtho ganhing namkim chungah vaihomu hen, ati.

²⁷ Chuti chun Pathen'in ama lim bangin mihem asemin, aman amapa chu Pathen lim bangin asemin ahi; aman amani chu pasal le numei jin aseme.

²⁸ Chujou phatnin Pathen'in amani chu phatthei aboh-in, chule Pathen'in amani jah-a chun, Chipha lhonin, pung lhonin, vannoi leiset lodimsoh lhonin lang, nathun nunsah lhonin; chule twikhanglen na ngaho, vanlaijola vachate, chule leiset chunga vahle hinna nei ganhing jouse chungah thuneina neilhonin, ati.

²⁹Chuin Pathen'in, Ven, vannoi leiset pumpi chunga amunei hampa jouse le, asunga amu um thingphung gathei jouse kapeh lhon ahin; hichu nangni dinga na an lhon hiding ahi.

³⁰Chule leiset na gamsa namkim, vanlaijola vacha namkim, leiset chunga a-opma kithol ganhing namkim, hinna nei jouse dinga hampa louhing eng jouse a-an diuva kapeh ahitai, ati. Chuin chuti chun aumtan ahi.

³¹Chuti chun athilsem namkim chu aven, chule veuvin, hichu aphalheh jengin ahi. Chuin nilhah le jingkah chu nigup ni ahitai.