Read Thado Chin Semtilbu 11 Bible Online

Semtilbu 11 - Thado Chin bible

Semtilbu 11

¹Chule vannoi leiset pumpi chun paokhat hamkhat athouvin ahi.

²Chuin ahitin ahi, amaho solama acheuvin ahile, Shinar gama phaicham khat amuvin; hia chun amaho acheng taovin ahi.

³Chuin amahole ama ho akihouvun, Hungun, eihon cheh dengu hitin, phatah in goutah-u hite, akitiuve. Chuin amahon song khelin cheh amangun, athoimatna khelin vahaibon amangun ahi.

⁴Chuin amahon, Hungun, eihon eiho dingin khopi khat le insang tah khat, aleh van ho sunphan sao hitin; chule iminu thansah-u hite, achuti louleh eiho vannoi leiset pumpi-ah kithecheh getnu hite, atiuve.

⁵Chuin mihem chate khopi leh insang sah chu ve dingin Pakai chu ahung kum lhan ahi.

⁶Chuin Pakaiyin, Veuvin, mihohi pumkhat le paokhat ahiuvin; chule hichehi amahon abol patnu ahitai: chule tu-a amahon boldinga alunggotnu chu imachan asuhtang loudiu ahi.

⁷Hungun, eiho kumsuh-u hitin, khatnin khat thusei ahetmo na diuvin, khu kom akhun apaovu gasucheh uhite, ati.

⁸Chuti chun Pakaiyin amaho chu chua kon chun vannoi leiset pumpi chungah akhenchehtan ahi. Chuin amahon akhopi sah-u chu adalha taove.

⁹Hijeh chun chukom mun chu Babel asah taove; ajehchu chukom munna Pakaiyin vannoi pumpi pao asuhcheh-a; chule chukoma kona chu Pakaiyin amaho chu vannoi leiset pumpi-a athecheh ahi.

¹⁰Hiche hohi Shem khanggui hochu ahiuve: Shem kum jakhat alhinin, twisanglet nung kumni jouvin Arphaxad ahingin ahi

¹¹Chule Arphaxad ahin nungin Shem kum janga ahingin, chapate le chanute ahingin ahi.

¹²Chuin Arphaxad kum jathum le somthum le nga alhinin, Shelah ahingin ahi.

¹³Chule Shelah ahin nungin Arphaxad kum jali le kum thum ahingin, chapate le chanute ahingin ahi.

¹⁴Chuin Shelah kum somthum alhinin, Eber ahingin ahi.

¹⁵Chuin Eber ahin nungin Shelah kum jali le kum somthum ahing nalaijin, chanute le chapate ahingin ahi.

¹⁶Chuin Eber kum somthum le kum li alhinin, Peleg ahingin ahi.

¹⁷Chule Peleg ahin nungin, Eber kum jali le kum somthum ahing nalaijin, chapate le chanute ahingin ahi.

¹⁸Chuin Peleg kum somthum alhinin, Reu ahingin ahi.

¹⁹Chule Reu ahin nungin Peleg kum jani le kum ko ahing nalaijin, chapate le chanute ahingin ahi

²⁰Chuin Reu kum somthum le kum ni alhinin, Serug ahingin ahi.

²¹Chule Serug ahin nungin Reu kum jani le kum sagi ahing nalaijin, chapate le chanute ahingin ahi.

²²Chuin Serug kum somthum alhinin, Nahor ahingin ahi.

²³Chule Nahor ahin nungin Serug kum jani ahing nalaijin, chapate le chanute ahingin ahi.

²⁴Chuin Nahor kum somni le kum ko alhinin, Terah ahingin ahi.

²⁵Chule Terah ahin nungin, Nahor kum jakhat le kum somleko ahing nalaijin, chapate le chanute ahingin ahi.

²⁶Chuin Terah kum somsagi alhinin Abram, Nahor, chule Haran ahingin ahi.

²⁷Tun hicheng hi Terah khanggui ahi: Terah in Abram, Nahor chule Haran ahingin, chule Haran-in Lot ahingin, ahi.

²⁸Chuin Haran chu apa Terah athi masangin apenna Chaldea gama Ur kho-a chun athitan.

²⁹Abram le Nahor vang chun ji anei gel lhonin: Abram jinu chu amin Sarai ahin, Nahor jinu min chu Milkah ahin, Haran chanu ahi; amahi Milkah le Iscah hingah apalhon ahi.

³⁰Ahivangin Sarai chu aching ahin, cha neilou ahi.

³¹Chuin Terah chun achapa Abram, atupa Haran chapa Lot, chule amounu Sarai, Abram inneipi chu apuijin, amaho chu Chaldea gama Ur'a konchun Canaan gama dingin ache taovin ahi. Chuin Amaho Haran alhungun, chukoma chun acheng taovin ahi.

³²Chuin Terah hinkho chu kum jani le kum nga ahin; Terah Haran mun'a athitan ahi.