Read Thado Chin Semtilbu 12 Bible Online

Semtilbu 12 - Thado Chin bible

Semtilbu 12

¹ Tun Pakaiyin Abram jah-a, Nagama kon, naphung chanpi ho-a kon, chule napa insunga konin potdoh inlang, keiman nangma kavetsah ding gama chun chen;

²Chule keiman nangma nam lentah khatna kasemding, chule keiman nangma phatthei kaboh-a, namin kaloupisah ding; chule nangma phatthei boh chang nahiding, ahi.

³ Chule nangma phatthei naboh ho chu keiman phatthei kabohding, chule na gaosap hochu kagaosap ding ahi; chule nangma-a kona leisetna insung jouse phatthei chang diu ahi, ati.

⁴Chuti chun Pakaiyin ajah-a aseibang chun Abram akipatdoh tan; chule Lot jong amatoh akilhonin ahi. Chule Haran'a kona akipatdoh chun Abram kum somsagi le kum nga ahitai.

⁵Chuin Abram'in a-inneipi Sarai, asopipa chapa Lot, alamdoh thil jouse, chule Haran'a peng amite jouse chu akipuijin; Canaan gam jonin akipat doh-un; chule Canaan gam chu ahung lhung taove.

⁶Chuin Abram'in gamsung chu Shechem gei, gangpi thing kena Moreh gei achonsoh-in ahi. Chuche laichun agama chun Canaan miho achengun ahi.

⁷ Chuin Pakai chu Abram henga akilah-in, ajah-a, Hiche gamhi nachilhah te henga kapeh ding ahi, ati. Chuin aman ahenga hung kilah Pakai ding chun chukoma chun maicham khat asemin ahi.

⁸Chuin ama chukoma konchun Bethel solama Molsang khat na akichonin, Bethel lhumlam le Ai solam kah-a apon in asongin ahi; chukoma chun Pakai dingin maicham asemin, Pakai min akouvin ahi.

⁹Chuin Abram chu lhanglam jonin achepeh nalaijin ahi.

¹⁰Chuin gamsunga chun kel alhan: chule Abram Egypt gama cham dingin achesuh tan ahi; ajehchu gam sunga chun kel akhoh lheh jengin ahi.

¹¹Chuin ahitin ahi, Egypt gam alutding konin, a-inneipi Sarai jah-a, Tun vetan, nangma vetdinga numei melhoitah nahi ti kahei.

¹²Chuti ahijeh-a chu hung hiti ding ahi, Egypt mihon namu tenguleh, hiche hi a-inneipi ahi, atidiu; chule amahon keima eitha uva, nangma vang nahinghoi dingu ahi.

¹³Nangma vanga phatah-a kaum theina dingle, nangma jala kahinthei na dingin, anaonu kahi tin seijin, tia katao ahi, ati.

¹⁴Chuin ahitin ahi, Abram Egypt gam alhun phatnin, Egypt mihon numei chu amuvin, amel chu hoi asalheh jengun ahi.

¹⁵Pharoah semanghon jong amanu chu amuvin, chule Pharoah jah-a aseiphaovin ahi. Chuin numeinu chu Pharoah insunga apuilut taovin ahi.

¹⁶Chuin aman Abram chu amanu jal chun abol pha lheh-in ahi. Chule aman kelngoi, bongchal, sanganchal, soh pasal, soh numei, sangan nu, chule sangongsao aneitan ahi.

¹⁷Ahivangin Abram inneipi Sarai jeh chun Pakai chun Pharoah leh a-insung mite chu hise nasatah-in asugenthei tan ahi.

¹⁸Chuin Pharoah'in Abram chu akouvin, ajah-a, Kachunga nathil bol hi ipi hitam? Na-inneipi ahichu ipi dinga neisei peh lou ham?

¹⁹Ipi dinga kanaonu ahi nati ham? Hijehchu ahi ka-inneipi dinga kana kipui lona chu; hijeh chun tun na inneipi hi ven, kipuijin lang chemang tan, ati.

²⁰Chuin Pharoah'in ama chung changa chun amite chu thu apen; amahon amachu a-inneipi toh, anei chengse toh asolmang taovin ahi.