Read Thado Chin Semtilbu 13 Bible Online

Semtilbu 13 - Thado Chin bible

Semtilbu 13

¹Chuin Abram Egypt gama konin apotnin, a-inneipi, anei chengse, chuleh Lot toh lhanglam ajon taove.

²Chuin Abram chu gancha, dangka chule sana in ahao lheh jengin ahi.

³Chuin ama lhanglama kon chun Bethel geijin achepeh-in, Bethel le Ai kah-a atilla apon in sonna mun geichun achen;

⁴Amasa-a maicham asem na mun chu ahung lhun tan ahi. Chukoma chun Abram Pakai minin ataovin ahi.

⁵Chule Abram toh lhonle Lot jong chun kelngoi hon, bonghon, chule pon in aneitan ahi.

⁶Chule amani chenkhom lhona dingin, agam chun adoltapon ahi: ajehchu aneilhon atam behseh jeh-in, amani achengkhom theilhon tapon ahi.

⁷Chuin Abram gancha ching hole Lot gancha chingho kah-a kinah na aumtan ahi. Chule chuche laichun gam sunga chun Canaan miho le Perizz miho achengun ahi.

⁸Chuin Abram'in Lot jah-a, Nahenga katao ahi, nangle kei kah-a, chule kagan ching te le nangma gan ching te kah-a kinah na umdahen, ajehchu eini sopikhat ihi.

⁹Gam apumpia namasanga um hilouham? Katao ahi, keima-a konin achomin umdoh tan; nangman veilam nakilhen leh, keima jetlama chengting; achuti louva nangma jetlama nache le, keima veilama cheng kate, ati.

¹⁰ Lot akhodah-in, Jordan phaicham chengse chu aven ahile muntin chu twi anengin, (Pakaiyin Sodom le Gomorrah asuhmang masang ahin,) Zoar jotna geichun Egypt gam toh abangin, Pakai hon toh abangin ahi.

¹¹Chujouvin Lot'in Jordan phaicham pumpi chu akilhenin, solam ngan achetan ahi. Chule amani khat chu khatna konin akikhen lhontan ahi.

¹²Abram chu Canaan gama chun achengin, Lot chu phaichama khopi ho-a chun achengin, chuin apon in chu Sodom lam ngan asongin ahi.

¹³Ahin Sodom miho chu Pakai mitmu-a khang giloutah leh chonsetah ahiuve.

¹⁴Chuin Abram'a kona Lot akikhendoh jouvin, Pakaiyin Abram jah-a, Tun khodah inlang, naum namun na kon chun sahlam, lhanglam, solam, chule lhumlam vetemin,

¹⁵ Ajehchu nangman namu gam chengse apumpia nangma le nachilhahte tonsotna dinga kapeh ding ahi.

¹⁶Chule keiman nachilhah te leisetna leivuijat kahisah ding; chule mikhatnin leiset chunga leivui asimjouva ahileh nangma chilhahte jong kisimjou ding ahi.

¹⁷Kipat doh-in, hiche gam hi adung avai chonchan len, ajehchu keiman hichehi nangma kapeh ding nahi, ati.

¹⁸Chujouvin Abram'in apon in chu achonin, ache achen Hebron gama Mamre gangpi phaicham koma chun achengin, chule chukoma chun Pakai dingin maicham khat asemin ahi.