Read Thado Chin Semtilbu 14 Bible Online

Semtilbu 14 - Thado Chin bible

Semtilbu 14

¹Chuin Shinar lengpa Amraphel, Ellasar lengpa Arioch, Elam lengpa Chedorlaomer, chule namho lengpa Tidal alal laijuvin ahitin ahi.

²Hicheho hin Sodom lengpa Bera, Gomorrah lengpa Birsha, Admah lengpa Shinab, Zeboiim lengpa Shenaber, chule Zoar kiti Bela lengpa akisat piuvin ahi.

³Amaho abonun chi dillen pang Shiddim phaichama chun akikhomun ahi.

⁴Amahon kum somle kum ni Chedorlaomer anajenu ahin, kum som le kum thum channa-in akiphin taovin ahi.

⁵Chuin kum som le kum li alhin kum-in Chedorlaomer lengpan aumpi leng dang ho toh ahung konun, Ashteroth Karnaim gama Rephaim mite, Ham gama Juzim mite, Shaveh Kiriathaim gama Emim mite athat uvin,

⁶Chule Hor mite chu aum nau Seir Molsang gei le, gamthip gamgia um El Paran changei jin athat taovin ahi.

⁷Chuin amaho ahung kileuvin En-mishpat (hichu Kadesh ahi,) 'ah ahungun, Amalek mite gam pumpi le Hazezon-tamar-a cheng Amor mite chu athat kitnun ahi.

⁸Chuphat nin Sodom lengpa, Gomorrah lengpa, Admah lengpa, Zeboiim lengpa, chule Bela lengpa (Bela chu Zoar ahi;) chu akipat doh-un, amaho chutoh kisat dingin Siddim phaichama apangkhomun,

⁹Elam lengpa Chedorlaomer, namtin lengpa Tidal, Shinar lengpa Amraphel, chule Ellasar lengpa Arioch dounan, lengli chu leng nga chutoh akisat taovin ahi.

¹⁰Siddim phaichama chu vahaibon dimset ahin; hia chun Sodom lengpa le Gomorrah lengpa ajam nalam lhonna alhalut lhontan; chuleh amoh chengse chu molsang lamah ajam taovin ahi.

¹¹Chuin amahon Sodom le Gomorrah neile gou jouse, chule aneh achah jouse apouvin, achemang taove.

¹²Chuin amahon Sodom'a cheng Abram sopipa chapa Lot jong chu anei chengse toh apuimang taovin ahi.

¹³Chuin asohcha khatnin Hebrew mi Abram jah-a chun thu ahung lhutnin ahi; hichepetna chu ama Eshcol le Aner sopipa, Amor mi hotoh Mamre gangpi phaicham koma chun achengun ahi. Chule amaho chu Abram toh thukhat kisa-a ahiuve.

¹⁴Chuin Abram'in asopipa gal hinga akaiju ajah phatnin, ama insunga pengcheh, hilthemsa cheh asohte jathum le somleget akipuijin, Dan geijin anung deltan ahi.

¹⁵Chuin jan-in amaho nokhum dingin amale asohte chu akihom khenun, chuin amaho chu athatnun, Damascus sahlama um Hobah chan geijin adelun ahi.

¹⁶Chuin aman neile gou jouse, asopipa Lot jong chu aneile gou chengse toh, chule numei hole miho jong chu ahin lepuikit tan ahi.

¹⁷Chuin aman Chedorlaomer le aumpi lengho chu atha jouva ahung kile kit phatnin, Sodom lengpa chu Abram lamto dingin Shaveh phaichama achen ahi (hichu leng phaicham ahi).

¹⁸ Chuin Shalem lengpa Melchizedec'in changlhah le lengpitwi ahin choijin ahi; ama chu chungnung pen Pathen Thempu ahi.

¹⁹Chule Aman Abram chu phatthei aboh-in, Van le lei neipa chungnung pen Pathen'a konin Abram phatthei changhen.

²⁰Chule nagal mite nakhutna pedoh-a chungnung pen Pathen nunnom hen, ati. Chuin Abram'in amachu aneijouse hopsom-a hopkhat apen ahi.

²¹Chuin Sodom lengpan Abram jah-a, Miho chu keima neipen lang, thilkeo hochu nangma changtan, ati.

²²Chuin Abram'in Sodom lengpa jah-a chun, Keima van le leiset neipa, chungnung pen Pakai Pathen henga kakhut kadop sang ahi.

²³Keiman pat jang kengchot khao te jeng jong, nanga pou pou chu kalah louding ahi, atiloule, Keiman Abram kahao sahtai, tiget nin nate.

²⁴Gollhang hon aneh mangu chule kalhonpi Aner, Eshcol, chule Mamre hiteho chu achan ding dol changu hen, ati.