Read Thado Chin Semtilbu 15 Bible Online

Semtilbu 15 - Thado Chin bible

Semtilbu 15

¹Hicheho nunghin Pakai thu chu Abram henga gaovin ahungin, ajah-a, Kicha hih-in, Abram, keima nalumdal le nakipa man lentah chu kahi, ati.

²Chuin Abram'in, Pakai Pathen, chabeija kaum dending namu nunga nangman keima ipi neipeh ding ham? Chule ka-insunga goulo dingla hiche Damascus mi Eliezar ahibouvin, ati.

³Chuin Abram'in, Vetan, nangman keima chi neikhaisah pon; chule Ven, ka-insunga penga chu kagou loding ahi, ati.

⁴Chuphatnin veuvin, Pakai thu chu ahenga ahung lhungin, ajah-a, Amachu nagoulo hilouding; amavang nangma taiguija penga bou chun nagou alo ding ahi, ati.

⁵ Chuin ama chu inpolama apuidoh-in, ajah-a, Vanlam khu vetemin, ahsi khu nasimjou dingle simtemin, ati. Chuin aman ajah-a, Nachilhah jong hijat khu hiding ahi, ati.

⁶ Chuin aman Pakai chu atahsan nin; chule aman hichu ama dingin chonphat na-in asimpeh tan ahi.

⁷Chuin Pakaiyin ajah-a, Keima hiche gamhi gouva nalo dinga Chaldea gam Ur khopi-a kona nahin puidohpa Pakai chu kahi, ati.

⁸Chuin aman, Pakai Pathen hiche kaloding chu iti kahet dingham? ati.

⁹Chuin aman ajah-a, Nangman kumthum lhingsa bongla khat toh, kumthum lhingsa kel-la khat toh, kumthum lhingsa kelngoichal khat toh, vakhu khat toh, vapal noukhat kahenga hinchoijin, ati.

¹⁰Chuin aman hicheng jouse chu ahin choijin, hiho chu ahapsatnin, hap langkhat le hap langkhat kingatton akoijin, ahin vachaho vang chu ahapsatpon ahi.

¹¹Chule muthong ho chu ahung len uva sathilong chunga chu achuh ji tengule, Abram'in adel mangjin ahi.

¹² Chuin nisa alhum konin, Abram chunga imut milna achutan; chule veuvin, kichat umtah muthim nasatah-in ahinkhutan ahi.

¹³ Chuin Pakaiyin Abram jah-a, Nachilhah te chu amaho gam hilou gamkhatna maljinna gaum diu; chule amahon amaho chu ajendiu; chule amahon amaho chu kum jali abolgenthei diu ahi tihi kichentah-in hen, ati.

¹⁴ Chule keiman aga jenu nam jong chu athu-u katan ding; chule amaho chu khonungle neile gou ninglhing setna hung potdoh diu ahi.

¹⁵Chule nangma napu napa te henga lhamonga nache ding; chule nangma natehkem kei teng vuija naum ding ahi.

¹⁶Amavang khang li lhin nale amaho chu hikoma hung kile kit diu ahi: ajeh chu Amor mite khangitlouna abulhing hih laije, ati.

¹⁷Chuin ahitin ahi, Nisa alhumma, mu ahung thim phatnin, veuvin, lhummei khucheichoi le meisel al lenglung chu sahap sat ho kahlah-a kitolin ahi.

¹⁸ Chuche nichun Pakaiyin Abram toh kitepna khat asemin, hitin aseije, Keiman nachilhahte henga hiche gamhi Egypt vadunga pat luilen, Euphrates vadunglen gei;

¹⁹Ken mite, Keniz mite, Kadmon mite,

²⁰Hit mite, Perizz mite, Rephaim mite,

²¹Chule Amor mite, Canaan mite, chule Jebus mite abonchauva kapeh ahitai, ati.