Read Thado Chin Semtilbu 16 Bible Online

Semtilbu 16 - Thado Chin bible

Semtilbu 16

¹Tun Abram inneipi Sarai'in amachu cha ahin peh pon ahi. Chule amanun Egypt mi amin Hagar kiti soh numei khat aneijin ahi.

²Chuin Sarai'in Abram jah-a, Tun vetan, Pakaiyin keima chahing dingin eiphaltapoi: nahenga katao ahi, amanu-a kona chapang kaneithei khatle, kasohnu koma galut nin ati. Chuin Abram'in Sarai thu chu angaitan ahi.

³Chuin Abram Canaan gama kumsom achen jouvin, Abram inneipi Sarai'in asohnu Egypt mi Hagar chu apuijin, a-inneipu Abram jidingin agapetan ahi.

⁴Chuin ama Hagar henga chun alutnin ahile, amanun nao avoptan ahi. Chuin amanun anaovop akihet phatnin, apinu chu anoisetan ahi.

⁵Chuin Sarai'in Abram jah-a, Kabolkhel hi nangma mopohna ahi: Kasohnu na-angsunga dingin kapein; chule aman anaovop akihet phatnin einoisetai. Pakaiyin nang le kei kah-a thu tanhen, ati.

⁶Ahin Abram 'in Sarai jah-a, Ven nasohnu nakhut na um ahi; nangman pha nasah bang chun achunga boltan, ati. Chuin Sarai'in amanu chu abolgenthei lhehjeng phatnin, amanu ama angsunga konin ajamtai.

⁷Chuin Pakai vantil'in amanu chu Shur jotna lampi pam, gamthipma twikhuh khat koma amudoh tan ahi.

⁸Chuin aman, Sarai sohnu Hagar, hoija hungkon nahi-a, chule hoija cheding nahim? ati. Chuin amanun, keima kapi nu Sarai angsunga kona jam-a kahi, ati.

⁹Chuin Pakai vantil chun amanu jah-a, napinu henga kilekitnin, chule akhut noija kipelutnin, ati.

¹⁰Chuin Pakai vantil chun amanu ajah-a, Keiman nachilhah hapuna kapunsah ding; atam behseh jeh uva simseng hilou dingu ahi, ati.

¹¹Chuin Pakai vantil chun amanu jah-a, Ven, nangma naovop nahin, chule chapa khat nahin ding ahi: Nangman amin Ishmael nasahding ahi, ajehchu Pakaiyin nakibol hesohna najahpeh tai.

¹²Chule amachu miphamo tah [2] hiding; aman mijouse douna akhut alapding, chule ama douna-a mijousen akhut alapdiu ahi. Chule ama asopite jouse angsunga chengding ahi, ati.

¹³Chuin amanun akihoupi Pakai minchu, nangma eimu-a Pathen [3] tin asah tai. Ajehchu amanun, keima eimu-a amachu keiman jong kamu hitam? ati.

¹⁴Chuche jeh chun chukom twikhuh minchu Beer-Lahai-Roi akisah tai. Veuvin, hichu Kadesh le Bered kah-a um ahi.

¹⁵ Chuin Hagar'in Abram chapa khat ahinpehtan; chule Abram'in Hagar toh ahin achapa min chu Ishmael asahtai.

¹⁶Chule Hagar'in Abram dinga Ishmael ahinpeh chun, Abram kum somget le kum gup alhingtai.